Na Fuut meafu so Aw na Aggimemmang
12
Sitan keppay a tiyempu so Aw na Aggimemmang na Hudyuwera, nattalebad i Jesus anneno disipulunera so nammulan si trigu. Mabisin ino disipulunera, antu narruddut ira si ungkay na trigu e nginangngatda. 2 Sin maitayaweno Fariseowera, kunda sike Jesus, “Itannuweno disipulum ira! Akakwandeno ammena meyannut so Aw na Aggimemmang!”3 Kunna i Jesus sikwara, “Ammeyu kad nabibbid ino inangwa i David anneno bulunnera sin nabisinan ira? 4 Tinumallung i David so balay i Diosa e inakkandeno tinapay a newalli sike Dios. Meantu so katunungan, pariyera lamang yo meyannut a mangngan sitan a tinapay. 5 Ammeyu kad a nabibbid so katunungan i Moises a kada Aw na Aggimemmang e mattara-tarabafuweno pariyera so Templu? Ammena iyaw meyannut so Aw na Aggimemmang udde ammera nakaliwat! 6 Itunduk sikwayu, ana sitaweno mas kaawan ammat so Templu. 7 Udde nu maintindiyan diyaw nad lamang yo kanggamma sapitan ino neturak a sapit i Dios, ‘Mas kaawan sikwak a minaggikallak kayu si kasittoleyu ammat so iwalliyu sikwak,’b ammeyu nad ninunut ino tolayera a awan liwatda. 8 Se ikkanak a yo Anak na Tolay e ana pakandamak a manundun maski nenay maawag a akwan so Aw na Aggimemmang.”
Na Paralitiku
9 Nanaw i Jesus sinay a lugar e tinumallung baggina so sinagoga. 10 Ana lalaki sinay a ammena makaguyuweno tata kamatna. Ana pay sinayeno korwan a tolayera a mintu-intufuk si pangakiranda a mapaliwat i Jesus. Finuutda sikwana, “Meyannut kad so katunungan a makapammapiya si matakit so Aw na Aggimemmang?”
11 Kunna i Jesus sikwara, “Gangngaryan, tata sikwayu e ana karneruna a madannag so bufun so Aw na Aggimemmang, ammeyu kad siddarat iyaw a igaddang? 12 Mas kaawan yo tolay ammat so karneru! Antu meyannut so katunungan na Hudyuwera a mangwa si mapiya so Aw na Aggimemmang.”
13 Kunna i Jesus so lalaki, “Isoyyadnuweno kamatnu!” Nesoyyadneno kamatna e nammapiya. 14 Nanaweno Fariseowera e nattataretabbag ira nu kasannara ipapatay i Jesus.
Na Gumasserbi a Pinili i Dios
15 Sin naammuwanna i Jesus ino gakkad na Fariseowera, nanaw baggina sinay a lugar. Oddu yo tolayera a dinumandan sikwana, e pinammapiyana amminan ino matakit ira. 16 Udde tinunannera a ammera itundu si korwan ira nu yanya baggina. 17 Si kunna sinay, naparulot ino sinapit i Dios sike profeta Isaias meafu sike Mesiya,
18 “Antuweyaw yo gumasserbik a pinilik.
Na iddukangku anna pakaanggammangkuwengke.
Iyaddaknga sikwaneno pakapangwa a maggabwat si Espirituk,
anna ibalaggawnana nu kasannaknga a mapatunung ino tolayera si aggitak.
19 Ammena makitinnulyat onnu makiginnarawa si korwan.
Anna ammena mabid si madappa so dalan ira.
20 Minaggikallak baggina si tolayera a makafuy yo angngurugga
anna minaggiyattam baggina si tolayera a amme maduffunan yo baggira.c
Ibali-balinnana a akwan iyaw makiyad si mangaffut ino mapiya si maral.
21 Anna amminan a bakkan a Hudyuwera e mainanamana sikwana.”d
I Jesus anni Beelsebul
22 Neyang ino tolayera sike Jesus ino tata lalaki a bulag anna gumal a naaffunan si demonyu. Pinammapiyana i Jesus ino lalaki, makaabirin anna makaiten baggina. 23 Nalaggat ino amminan a tolayera so inangwa i Jesus e kunda, “Antuweyawin nakuy i Mesiya a gaka i Patul David?”
24 Udde sin nadingngag iyaweno Fariseowera, kunda, “Awan korwan a nangadda sikwana si pakapangwa a mappaanaw si demonyuwera nu bakkan i Beelsebule a afu-afu na demonyuwera.”
25 Ammuna i Jesus ino ana so nonotda e kunna sikwara, “Kada talubbunan a ammena massittarata e madaralna anneno tolayera so tata lugar onnu familya a maumid a mappaparakwa e ammena pay massittarata. 26 Kakunna keppay sike Satanas, nu paanawanneno bafulunnera, ammena mabbayag ino pattangngalanna. 27 Nu kun diyaw a i Beelsebul yo nangadda sikwak si pakapangwa a mappaanaw si demonyuwera, seanya pay yo nangadda si pakapangwa so disipiluyuwera a mappaanaw si demonyuwera? Irana keppay yo manaddag a amme kayu mannono-nonot si fustu. 28 Udde nu paanawangkuweno demonyuwera megafu si pakapangwa i Espiritu i Dios, antuweyaw yo mangipaita a yo pattangngalan i Dios e anen sikwayu. 29 Awan a makatallung so balayeno tata matuyag a tolay anna makkokot si amminan a ana so unagngeno balena nu ammena abbu siggutan baggina.
30 “Inoyera a ammena mebulun sikwak, ira yo mattulyat anna ammena manuffun sikwak a mangammung si tolayera takesi makimoray sikwak, ira yo mappapasarina so tolayera sikwak.
31 “Antu itunduk sikwayu, mapakoman amminan ino liwa-liwat ino tolayera anna maski sanna a passipitta sike Dios, udde yo passipitta sike Espiritu i Dios e ammenana mapakoman. 32 Seanya yo massapit si maral metulyat sikwak a yo Anak na Tolay e mapakomanna, udde yo massapit si maral metulyat sike Espiritu i Dios e ammenana mapakoman maski sitoye a tiyempu onnu so dumatang a tiyempu.”
Na Kayu anneno Bungana
33 Nebalinna i Jesus a nakkun, “Nu mapiya yo tata kayu, mapiya pay yo bungana. Nu maral ino tata kayu, maral pay yo bungana. Memunuwan ino tata kayu so bungana. 34 Manilla kayu nagita a irawera! Kasanna kayu kad a massapit si mapiya e maral kayu ke? Se yo sapitan na tata tolay e maggabwat si nakamma. 35 Na mapiya a tolay e mapiya yo sapitanna gumafu se mapiya yo ana si nakamma udde yo maral a tolay e maral ino sapitanna gumafu se maral ino ana si nakamma. 36 Itunduk sikwayu, so Aw na Pannunut i Dios so tolayera, ikkayun keppayeno manabbag so amminan a sinapit diyaw a awan serbina. 37 Se yo sapit diyawera e usannana i Dios a mannunut sikwayu nu matunung onnu nu nalliwat kayu.”
Naarangngan i Jesus si Milagru
38 Ana korwan a mapoporay si katunungan anneno Fariseowera a nakkun sike Jesus, “Mestru, paitan dakami si tata milagru a mangipaita a dinundun naka i Dios.”
39 Tinumabbag i Jesus, “Maral kayu a diyafuwan anna amme kayu makurug sike Dios! Mara-arang kayu si milagru udde awan mepaitak sikwayu fuwera so milagru a kakunna yo nedemmu sike profeta Jonas siin nabayagin a tiyempu. 40 Kakunna i Jonas a ana so kuyung ino dokal ingke a busilad si tallu aw anna tallu gafi,f si kakunna keppay yo mededemmu sikwak a yo Anak na Tolay. Tallu aw anna tallu gafiyak pena so pattanammangku. 41 So Aw na Pannunut, mattestiguneno tolayera a taga-Nineveh metulyat so diyafuwan gumafu se nabboboliyera so annunturuwera i profeta Jonas. Anaak sikwayu sitoye udde amme kayuwengke nabboboli e mas atannangak ingkepay ammat sike profeta Jonas! 42 So Aw na Pannunut, testigu pay yo reyna na Sheba metulyat sito diyafuwan se naggabwat kepay baggina so aroyuwengke a lubbun takesi maningngag so angngammu i patul Solomon. Anaak sikwayu sitoye udde ammeyu kanggam a maningngag sikwak e mas atannangak ingkepay ammat sike patul Solomon!”
Na Pannuliyeno Demonyu
43 Nebalinna i Jesus a nakkun, “Nu mallawan ino demonyu so baggiyeno tolay, manondoyug iyan so namma a luga-lugar takesi mintarak si pimemmanganna, udde awan matumpalanna. 44 Kunna si baggina, ‘Muliyaknga so tolay a naggabwatangku!’ So pulina, madatanganneno tolay a kakunna yo balay a awan migigyan, malinis anna mainggud ammat siin. 45 Antu mayag ino demonyu si pitu kepay a demonyu a mas maral ammat sikwana takesi bulunnera a magyanna sinay. Mas maralnengkeno akkekwana iyan a tolay ammat sin palunguna. Kunnapay sitan yo mededemmu so maral a diyafuwan sitoye.”
Na Nebilang a Ina anna Wawwayi i Jesus
46 Sikwana a massapi-sapit i Jesus so tolayera, dinumatang ino inana anneno wawwayinera a lalaki. Sin anera so lawan na balay, kanggamda a makaabid baggina. 47 Ana nangitundu sike Jesus, “Ana so lawan i inam anna wawwayim a lallakiyera e kanggam daka a makaabid.”