Na Paralitiku
3
So korwan a Aw na Aggimemmang, tinumallung imman i Jesus so sinagoga. Ana tata tolay a ammena makaguyuweno tata kamatna. 2 Nilangngaddandeno mapoporay si katunungan anneno korwan a Fariseowera i Jesus nu makapammapiya baggina so Aw na Aggimemmang takesi makaintufuk ira si pakàakusan sikwana. 3 Anna kunna i Jesus so lalaki a kinumappat ino kamatna, “Kataw sito allangammi.” 4 Anna finuutna i Jesus so Fariseowera anna so mapoporay si katunungan, “Meyannut kad si katunungantam a mangwa si mapiya onnu mangwa si maral so Aw na Aggimemmang, mangisalak si angat onnu mappatay?” Udde ammera nammimmit.5 Nakaallang i Jesus a nangita sikwara e malowengkeno nakamma gumafu se mataggat ino urera. Antu kunna so lalaki, “Isoyyadnuweno kamatnu.” Antu nesoyyadneno kamatna e nammapiya. 6 Nanaweno Fariseowera anna siddarat a nattataretabbag ira bulundeno gumaladandan ira i Patul Herodes nu kasannara ipapatay i Jesus.
Nammu-ammung ino Tolayera so Dappit na Bebay
7 Nanaw i Jesus anneno disipulunera e inang ira so idag na Balanaw na Galilea. Odduwengke a tolayera a dinumandan sikwana a naggabwat so Galilea. 8 Sin nadingngag ino tolayera ino inangwa i Jesus, odduwerengke a inang sike Jesus a naggabwat so Judea, Jerusalem, Idumea, so tafik na māt na Jordan anna so lubbu-lubbun na Tiro anna Sidon.
9 Gumafu so kaodduweno tolayera, netunduna i Jesus so disipulunera a mangiparan si barangay a pagyananna takesi ammerana maipit baggina. 10 Inang ira sinay gumafu se oddu a tolayera a pinammapiyana anna nassidaratang ino matakit ira a manenggid sikwana. 11 Kada maiteno naaffunan si demonyuwera i Jesus, nallabbera so allanganna anna naggirawera, “Ikkeno Anak i Dios!” 12 Udde nengangngadna a tinunan ino demonyuwera a ammera itundu si korwan ira nu yanya baggina.
Nappili i Jesus si Tafulu Adwa a Apostolnera
13 Akkabalinna iyaw, inang i Jesus so dangutul e inayanna inoyera a pinilina a mebulun e dinumandan ira sikwana. 14 Nappili i Jesus si tafulu adwa sikwara e pinanganannera si apostolnera a bulu-bulunna anna medundun a mebalaggaweno sapit i Dios, 15 Anna naindan ira si pakandama a mappaanaw si demonyuwera.
16 Iyawera yo tafulu adwa a pinilina,
I Simon a pinangananna si Pedro,
17 da Santiago anni Juan a anak ira i Zebedeo, a pinanganannera si Boanerges a kanggamma sapitan, Anak ira na Addug,
18 i Andres,
anni Felipe,
anni Bartolome,
anni Mateo,
anni Tomas,
da Santiago a anak i Alfeo,
anni Tadeo,
anni Simon a pinangananda si Makalubbun a mangikalow so lubbunna,
19 anni Judas Iscariote a nattraydor sike Jesus.
I Jesus anni Beelsebul
20 Sin nuli imman i Jesus anneno disipulunera so balay a nagyananda, narimummung ino odduwengke a tolayera, nabu ammeran matabbud yo mangngan. 21 Antu sin nadingngag iyaweno familyana, inangga inappa baggina gumafu se sapi-sapitan ino tolayera a pallaw baggina.
22 E yo mapoporay si katunungan na Hudyuwera a naggabwat so Jerusalem e kunda a naaffunan baggina i Beelsebula a afu-afu na demonyuwera. Iyan ino pangappanna si pakapangwa a mappaanaw si demonyuwera.
23 Gumafu sitaw, inayanna i Jesus ino tolayera e nangarig baggina sikwara. Kunna, “Amme fuwersanna i Satanas ino demonyunera a mallawan so tolayera. 24 Na talubbunan a amme mattatarateno tolayera e madaralna. 25 Kunnapay yo familya a mappaparakwa e ammena mattatarata. 26 Kakunna keppay, nu kapakwanna i Satanas ino bulunna a demonyuwera, ammenana mabbayag ino pattangngalanna e matamfutneno pakapangwana.
27 “E awan makatallung so balayeno matuyag a tolay nu bakkan a igakadna abbu baggina akkabalinna iyan e kokotanna amminan ino ana so unagngeno balena.
28 “Gakkurug yo itunduk sikwayu, mapakomanna amminan ino liwa-liwat ino tolayera anna maski sanna a passipitta a metulyat sike Dios. 29 Udde seanya yo massipitta sike Espiritu i Dios e ammenengkena a mapakoman udde liwatnana iyan amu-amu.”
30 Kunna iyaw i Jesus se sapi-sapitanda a naaffunan baggineno demonyu.
Na Nebilang a Ina anna Wawwayi i Jesus
31 Dinumatang ino ina anneno wawwayinera i Jesus. Sin anera so lawan na balay, pinaayagga baggina. 32 Oddu a tolayera a nakatuttud so lebutna e kunda sikwana, “Ana i inam anneno wawwayim a lallakiyera so liwan e kanggam daka a makaabid.”