Na Tunturuwera i Jesus meafu si Akkatway
10
Nanaw da Jesus anneno disipulunera so Capernaum e inang ira so lubbu-lubbun na Judea a lampas na māt na Jordan. Nammu-ammung imman ino oddu a tolayera so lebutna e tinunturuwannera se antu yo maumid a akakwanna.2 Inumaranni sikwaneno korwan a Fariseowera a mamureba sikwana. Naffuut ira, “Meyannut kad si katunungantam a yo lalaki e damana a ikatwayeno atawana?”
3 Tinumabbag i Jesus, “Nenay a nedundun i Moises a angwan diyaw?”
4 Kunda sike Jesus, “Nepabulun i Moises ino tata lalaki a mangwa si katurakkan a pakaitan a nakkatwayera liyena paanawan.”
5 Udde kunna i Jesus sikwara, “Neturak i Moises iyan a dundun para sikwayu gumafu so taggat ino ureyu. 6 Udde sin pinefunan i Dios a namaratu si talubaggan, ‘Pinaratuwera i Dios a lalaki anna bafay.’ 7 ‘Antuweyaw yo gafuna a anawannaneno lalaki yo gagginafannera e makidagga so atawana. 8 Antu yo adwa e mattatenna.’ 9 Kunnantu, awan a tolay a makapakkatway so pinattata i Dios.”
10 Sin dinumatang ira so balay a paffunduwanda, finuut imman ino disipulunera sikwana meafu si akkatway. 11 Kunna i Jesus sikwara, “Na lalaki a mangikatway si atawana anna mangatawa si korwan a bafay e nakaliwat so atawana si pakikkarallaw. 12 E kakunna pay yo bafay a mangikatway si atawana anna mangatawa si korwan a lalaki e nakaliwat so atawana si pakikkarallaw.”
I Jesus anneno Abbing ira
13 Ana tolayera a nangiyang si abbinggera sike Jesus tapenu ipotunna yo kamatna sikwara takesi arangnganna sike Dios a indannera si mapiya a akkatolay, udde pinallangngan ino disipuluwera yo tolayera. 14 Udde sin naitana i Jesus ino inangweno disipuluwera, nakaallang e kunna, “Paumangan diyaweno abbing ira sikwak. Ammeyuwera fuwaddan a umang sikwak se yo kakunnara yo mebilang so pattangngalan i Dios. 15 Gakkurug yo itunduk sikwayu, seanya yo ammena mappatangngal sike Dios e ammena mebilang so pattangngalanna. Maawag a kakunnana yo tata abbing a awan pabbabangnga.”
16 Inakkuyna i Jesus ino abbing ira e nepotunneno kamatna sikwara e naddasal baggina sike Dios a maindan ira si mapiya a akkatolay.
Na Dammak a Lalaki
17 Sin ginumikka-gikkat i Jesus, nakkarantut ino tata lalaki paumang sikwana. Nammalitud so allanganna e naffuut, “Mapiya a Mestru, nenay maawag a akwangku takesi matolayaknga a bulun i Dios amu-amu?”
18 Kunna i Jesus sikwana, “Saay kad se kunnu a mapiyaak? Awan korwan a mapiya nu bakkan i Dios lamang. 19 Ammum ino dundun ira i Dios, ‘Ammeka mamapatay, ammeka makikkarallaw, ammeka makkokot, ammeka maddakkig, ammeka mangilloku si kasittolem. Dayawannu i amam anni inam.’ ”
20 Kunneno lalaki, “Mestru, naangwakun amminan iyan a dundun ira makiyad kepay sin akkabbingku.”
21 Initana i Jesus ino lalaki e inidduknga. Kunna sikwana, “Ana kepay yo tata makurang sikwam. Umangngu ilaku amminan a pakkukwam ira. Iyaddam amminan so madidiyat ino nallakkuwannuwera e maindangkana si wara-wara si langit. Nu maangwam iyan, mulika e dandanannak.”
22 Sin nadingngag iyaweno lalaki, nanaw baggina a maraddam ingke gumafu se oddu yo pakkukwanera sito lubag.
23 Nilanga-langana i Jesus ino tolayera e kunna so disipulunera, “Madiyat ingke si dammak ira a mebilang so pattangngalan i Dios!”
24 Nalaggat ino disipulunera sin nadingngaggeno sinapitna. Udde kunna imman i Jesus sikwara, “Wawwayik ira, madiyat ingke si dammak ira a mebilang so pattangngalan i Dios! 25 Mas malonggon a tumallung ino kamelyu so abbut na bilat ammat si tata dammak a mappatangngal sike Dios.”
Na Matabbut Ira
26 Tattullot a nalaggat ingkeno disipuluwera anna kunda si siggatatan, “Danya yo matabbut antu ay?”
27 Initanera i Jesus e kunna sikwara, “Na ammena dama makweno tolayera e dama makwa amminan i Dios.”
28 Kunna i Pedro sikwana, “Dengke sikwami, inanawammi amminan e dinandanammika.”
29 Kunna i Jesus sikwara, “Gakkurug yo itunduk sikwayu, seanya yo inanawanna yo balena, wawwayinera, gagginafannera, anakngera onnu lubagngera gumafu sikwak anna gumafu si Mapiya a Baga, 30 makaarasawna si mamintatut kepay sitawera. Sito talubaggan makaarasawna baggina si oddu a balayera, wawwayinera, inera anna anak ira anna lubag ira udde ilupe-lupetneno tolayera baggina. Udde so talubaggan a dumatang e matolena pay baggina a bulun i Dios amu-amu. 31 Udde odduna yo palunguwera a mauddina, anna oddu yo mauddi pay a mapalunguna.”
Na Meka-tallu a Pappakaammu i Jesus meafu so Akkapatena anneno Panantotolena
32 Sin mallaka-lakad i Jesus anneno bulunnera paumang so Jerusalem, napalungu i Jesus sikwara. Nalaggat ino disipulunera anna natalawan ino tumuntufad ira sikwana. Anna inayanna imman i Jesus ino tafulu adwa a apostolnera a ira-ira pelamang anna pinefunannera a tinunduwan nu nenay yo medemmuna sikwana,
33 Kunna i Jesus sikwara, “Maningngag kayu! Umang etam so Jerusalem anna ikkanak a yo Anak na Tolay e medawawana so afu-afu a pariyera anna so mapoporay si katunungan e sentensiyandaknga a matay anna idawawaraknga so bakkan a Hudyuwera. 34 Yoyungandaknga, luppa-luppandaknga, lassi-lassitandaknga anna patayandaknga udde mantotolayaknga so meka-tallu a aw.”
Na Arangngan da Santiago anni Juan
35 Inumaranni sike Jesus yo anak ira i Zebedeo da Santiago anni Juan e kunda, “Mestru, kanggammi a akwannuweno arangngammi sikwam.”
36 Anna kunna i Jesus sikwara, “Nenay a meduffungku sikwayu?”
37 Anna kunda sike Jesus, “Iyannutnu a makituttud kami sikwam, tata so diwanannu anna tata so dawirim dengkem a mattangngal a ana dayom.”
38 Udde kunna i Jesus sikwara, “Ammeyu ammuweno ara-arangngan diyaw. Damayu kad a attamman yo passufriyera a medemmuna sikwak onnu damayu kad a matay kakunna yo patay a paddalanangkuna?”
39 Netabbagga, “On, damami.” Antu kunna i Jesus sikwara, “Gakkurug a yo passufri a medemmuna sikwak e mapureban diyaw pena anna maattamman anna matay kayuna a kakunnak. 40 Udde yo mattuttudna so diwanangku anna so dawirik, awan pakandamak a mappili se piniliyen i Dios inoyera a mattuttud sinay.”
41 Sin nadingngag iyaweno tafulu a disipuluwera, nakaallang ira sike Santiago anni Juan. 42 Antu inayannera amminan i Jesus e kunna sikwara, “Ammuyu a inoyera a afu-afu na bakkan a Hudyuwera e nappadiyat so inoyera a tangngallanda anna inoyera a dammak e ifuwersara a ilillin a ira yo matuntul. 43 Udde ammena nad a kunna sitan ino akwan diyaw. Seanya sikwayuweno manggam a kaawan ingke, maawag a masserbi baggina sikwayu. 44 Anna seanya sikwayuweno manggam a mattabali si afu-afu, maawag a masserbi baggina sikwayu. 45 Se ikkanak a yo Anak na Tolay e ammek inang sito talubaggan a mappaserbi udde masserbi anna matay takesi oddu a tolayera a matubbutna so akkakastigura so liwa-liwatda.”
Pinammapiyana i Jesus ino Bulag a Mammalimut
46 Dinumatang i Jesus anneno disipulunera so Jerico. Anna sin paanawera so lugar, nebulun ino disipuluwera anneno odduwengke a tolayera. Tinalebarandeno tata mammalimut a bulag a i Bartimeo a anak i Timeo e nakatuttud so idag na dalan. 47 Sin nadingngagnga a nattalebad i Jesus a taga-Nazaret, naggirawa baggina a nakkun, “Jesus, gaka i David,a ikallakngak!”
48 Pinassapitan ino oddu a tolayera a suminak baggina udde tattullot a negirawana, “Gaka i David, ikallakngak!”
49 Nimemmak i Jesus e kunna, “Iyang diyaw sitaw baggina.”
E inayanda i Bartimeo anna kunda sikwana, “Patuyaggannuweno nakammu! Mattaddagka se aya-ayan naka i Jesus.”
50 Nebarad i Bartimeo ino tafálna e siddarat a inumaranni sike Jesus.
51 Kunna i Jesus sikwana, “Nenay kanggammu a akwangku sikwam?”
Kunneno bulag, “Mestru, kanggammangku a makaita imman.”
52 Kunna i Jesus sikwana, “Mulikan! Nammapiyaka gumafu si angngurugngu sikwak.” Siddarat a nakaiteno bulag e dinumandan sike Jesus so dalan.