Na Pangarig megafu so Balu anneno Gumannunut
18
Nangarig i Jesus so disipulunera a maawag a maumid ira a maddasal anna ammera maawanan si inanama. 2 Kunna, “Ana tata gumannunut so tata tarabbunan a awan talona sike Dios anna awan pangilawana si kasittolena. 3 Sitan keppay a tarabbunan, ana tata balu a bafay sinay a maumid a umang so gumannunut takesi marang si duffun e kunna, ‘Duffunandak a makaintufuk si ustisya so kapakwak ira.’ 4 Nabayag a tiyempu a ammena nekabeng baggineno gumannunut. Udde si kauddiyanna, nanonot keppay yo gumannunut e kunna si nakamma, ‘Maski awan a talok sike Dios anna awan ilawak a tolay, 5 iyaddakun ino ustisya a ara-arangnganna iyaw a balu, gumafu se maumid a talantanannak e matappagakun a makauli-uli baggina sitaw.’ ”6 Anna kunna i Afu, “Dingngaggan diyaweno sinapit na maral a gumannunut! 7 Ammena kad nakuy a duffunan i Dios ino tolenera a marang si duffun sikwana si aw anna si gafi? Ammena kad palanan a manuffun sikwara? 8 Itunduk sikwayu, siddarat a iyaddana i Dios sikwareno ustisya. Udde so pannulik a yo Anak na Tolay, ana kad kepay nakuy a maintarakanna a tolayera a mangurug sikwana sito lubag?”
Na Pangarig na Fariseo anneno Gumattuki si Biyenes
9 Nangarig i Jesus so tolayera a arigga a matunung ira anna yoyungandeno kasittolera. 10 “Ana adwa lallakiyera a inang so Templu takesi maddasal ira, Fariseo ino tata anna gumattuki si biyenes ino tata. 11 Nattaddag ino Fariseo anna naddasal e kunna, ‘O Dios, mabbala-balatak sikwam gumafu se bakkanak a kakunna yo korwan ira a makkoko-kokot, maddaro-darogat, makikkara-karallaw, onnu kakunna yo gumattuki si biyenes. 12 Mamidwaak a mangngilin si tata linggu anna mangiyadda-addaak si katafulu na amminan a intufukku.’ 13 Udde yo gumattuki si biyenes e nakataddag so aroyu anna ammenengke a makatangaw si langit. Sinuntu-suntukngeno taggangnga e kunna, ‘O Dios, ikallakngak se sinaliwatak ingke!’ 14 Itunduk sikwayu, napakomanin amminan a liwa-liwatna iyaw a tolay a nuli so balena udde bakkan ino Fariseo. Seanya yo mappeyatannang e maawananna si dayaw, anneno mappataibbafa e mapadayawanna.”
I Jesus anneno Abbing ira
15 Namitta aw, ana tolayera a nangiyang maski yo abbinggera sike Jesus tapenu ipotunna yo kamatna sikwara takesi arangnganna sike Dios a indannera si mapiya a akkatolay. Sin naita iyaweno disipuluwera, pinallangandeno tolayera. 16 Udde pinaarannina i Jesus ino abbing ira sikwana e kunna so disipulunera, “Purayan diyaweno abbing ira a umang sikwak. Ammeyuwera fuwaddan a umang sikwak se yo kakunnara yo mebilang so pattangngalan i Dios. 17 Gakkurug yo itunduk sikwayu, seanya yo ammena mappatangngal sike Dios e ammena mebilang so pattangngalanna. Maawag a kakunnana yo tata abbing a awan pabbabangnga.”
Na Dammak A Lalaki
18 Ana tata afu-afu na Hudyuwera a naffuut sike Jesus, “Mapiya a Mestru, nenay maawag a akwangku takesi matolayaknga a bulun i Dios amu-amu?”
19 Kunna i Jesus sikwana, “Saay kad se kunnu a mapiyaak? Awan korwan a mapiya nu bakkan i Dios lamang. 20 Ammum ino dundun ira i Dios, ‘Ammeka makikkarallaw. Ammeka mamapatay. Ammeka makkokot. Ammeka maddakkig. Dayawannu i amam anni inam.’ ”
21 Kunneno lalaki, “Naangwakun amminan iyan a dundun makiyad kepay sin akkabbingku.”
22 Sin nadingngag iyaw i Jesus, kunna sikwana, “Ana kepay yo tata makurang sikwam. Umangka e ilakum amminan a pakkukwam ira. Iyaddam amminan so madidiyat ino nallakkuwannuwera e maindangkana si wara-wara si langit. Nu maangwam iyan, mulika e dandanannak.”
23 Udde sin nadingngag iyaweno lalaki, narraddam ingke gumafu se dammak ingke baggina.
24 Naitana i Jesus a narraddam ingkeno lalaki antu kunna sikwana, “Madiyat ingke si dammak ira a mebilang so pattangngalan i Dios! 25 Mas malonggon a tumallung ino kamelyu so abbut na bilat ammat si tata dammak a mappatangngal sike Dios.”
Na Matabbut Ira
26 Nadingngag ino tolayera yo sinapit i Jesus e kunda, “Danya yo matabbut antu ay?”
27 Kunna i Jesus sikwara, “Na ammena dama makweno tolayera e dama makwa amminan i Dios.”
28 Kunna i Pedro, “Dengke sikwami, inanawammiyeno balemi e dinandanammika.”
29 Kunna i Jesus sikwara, “Gakkurug yo itunduk sikwayu, seanya yo inanawanna yo balena onnu atawana, wawwayinera, gagginafanna onnu anakngera maipegafu so pattangngalan i Dios 30 e makaarasawna si mas oddu sitawera sito talubaggan anna so talubaggan a dumatang e matolena pay baggina a bulun i Dios amu-amu.”
Na Meka-tallu a Pappakaammu i Jesus meafu so Akkapatena anneno Panantotolena
31 Sin nesinana i Jesus ino tafulu adwa a disipulunera, kunna sikwara, “Maningngag kayu! Umang etam so Jerusalem e maparulot na amminan sinayeno neturak na profetera meafu sikwak a yo Anak na Tolay. 32 Idawawaraknga so bakkan a Hudyuwera, yoyungandaknga, iyatataldaknga, anna luppa-luppandaknga. 33 Lassi-lassitandaknga anna patayandaknga, udde mantotolayaknga so meka-tallu a aw.”
34 Udde awan a naintindiyanda so amminan a nadingngagga sikwana. Netawu sikwara nu nenay kanggamma sapitan inay anna ammera naintindiyan ino sinapi-sapitnera.
Pinammapiyana i Jesus ino Bulag a Mammalimut
35 Sin aranniyen i Jesus so Jerico, ana tata lalaki a bulag a nakatuttud so idag na dalan e mammalimut. 36 Sin nadingngagnga a oddu a tolayera yo mattale-talebad, finuutna nu nenay a mededemmu.
37 Kunda sikwana, “Nattalebad i Jesus a taga-Nazaret.”
38 Antu naggiraweno bulag e kunna, “Jesus, gaka i David!a Ikallakngak!”
39 Pinassapitan ino tolayera a ana so allangan na dalan a suminak baggina udde tattullot a naggirawa e kunna, “Gaka i David, ikallakngak!”
40 Nimemmak i Jesus anna pinaayanneno bulag takesi iyangga sikwana. Sin inumaranniyeno bulag, finuutna i Jesus sikwana, 41 “Nenay kanggammu a akwangku sikwam?”
Kunna, “Afu, kanggammangku a makaita imman.”