Na Pakegafuwan na Pakaliwatan
17
Namitta aw, kunna i Jesus so disipulunera, “Gakkurug a dumatangngeno pakegafuwan na pakaliwatan, udde pakekkallak ino tolay a paggabwatanna iyaw! 2 Mas mapiya kepay a bassinan ino tangngadna si tata dokal a aggilingan a batu anna itappol so bebay, ammat si pakegafuwan na pakaliwatan ino tolayera a ibbafeno akkatolera. 3 Langngaddan diyaweno agguyu-guyuwan diyaw!“Nu makaliwat ino wayim, passapitannu, anna nu mabboboli baggina, pakomannu. 4 Nu mamimpitu baggina a nakaliwat sikwam si tata aw, anna mamimpitu pay a marang si pakoma e sapitanna sikwam, ‘Mabboboliyak,’ maawag a pakomannu baggina.”
Angngurug sike Dios
5 Namitta aw, kundeno apostol ira sike Afu, “Patuyaggannuweno angngurugmi sike Dios!”
6 Kunna i Afu sikwara, “Nu ana angngurug diyaw kakunna yo bisang ingke a bukal, maski nu bisang e mattalofuna anna mattabalina si dokal a kayu. Damayu a sapitan sitaw a kayu na amoras,a ‘Masiddut anna memulaka so bebay,’ e makimorayera.”
Na Kalanganan na Imbut
7 Nebalinna i Jesus a nakkun, “Gangngaryan tata sikwayu e ana imbutna a maara-aradu onnu mattabbu-tabbud si karneruwera so pastu, kunnu kad sikwana, ‘Palanannu se mangngangkan!’ 8 Bakkang kad se sapitannu sikwana, ‘Iparannuweno pananggafik, mattalika anna serbiyannak sikwak a mangnga-angngan. Akkabalingku a mangngan, damamunna pay a mangngan.’
9 “Ammena pabbala-balattan ino imbut gumafu se inangwana lamang yo kalangananna. 10 Kunna keppay sikwayu, nu inangwayun ino amminan a nedundu-dundun sikwayu, kun diyaw, ‘Imbut kami lamang i Dios, inangwami pelamang yo kalanganammi.’ ”
Pinammapiyana i Jesus ino Tafulu a Tolay a ana Kurwengke Takit si Gaddang
11 So paddoyug i Jesus anneno disipulunera paumang so Jerusalem, nattalebad ira so nallatanan na Samaria anna Galilea. 12 Sin dinumatang ira so tata tarabbunan, dinafunggera na tafulu a tolay a kurwengkeno takitda si gaddang. Nattaddag ira so aroyu si bisang 13 anna naggirawera, “Jesus! Afu! ikallak dakami!”
14 Sin naitera i Jesus, kunna sikwara, “Umang kayu mappaita so pariyera so Jerusalem.”
Sikwara a ana so dalan, nammapiyera amminan. 15 Sin naiteno tata nammapiyen baggina, nuli baggina sike Jesus e naggira-girawa a naddaya-dayaw sike Dios. 16 Nallabba baggina so dunan na takki i Jesus e nappabala-balat sikwana. Samaritano iyaw a tolay.
17 Kunna i Jesus so bafulunnera, “Bakkang kad se tafuluweno pinammapiyak? Ope yo asiyam? 18 Saay se iyaw lamang a tata ipping yo nuli a mappabalat sike Dios?” 19 Kunna i Jesus sikwana, “Mattaddagka anna mulikan. Gumafu so angngurugngu sikwak e nammapiyaka.”
Na Pattangngal i Dios so Tolenera
20 Namitta aw, finuutdeno Fariseowera sike Jesus nu nainsa a mamefuweno pattangngalan i Dios. Kunna i Jesus sikwara, “Awan pemunuwan a maita a mamefuwen ino pattangngalan i Dios. 21 Udde awan pay a makkun, ‘Itannu, ana baggina sitaw a mappatu-patul!’ onnu ‘Ana baggina sinay a mattangnga-tangngal!’ Se yo kagakkuruwanna e anen sikwayuweno pattangngalan i Dios.”
22 Antu kunna i Jesus so disipulunera, “Dumatangngeno tiyempu a kanggamdak ingke maitara, ikkanak a yo Anak na Tolay a mappatul udde ammeyu iyaw a maita. 23 Kundeno korwan a tolayera sikwayu, ‘Itan diyaw baggina sinay!’ onnu ‘Itan diyaw baggina sitaw!’ Ammeyuwera kuruwan onnu dumandan sikwara. 24 Kunnapay yo mededemmu so paddatang na fustu a tiyempu, ikkanak a yo Anak na Tolay e dumatangnga a manilla mabaggaw a kilat a maita-ita na amminan. 25 Udde liyena makwa iyaw, maawagku a attamman ino kurwengke a pammadiyat anna pammayandak ino tolayera sitoye a diyafuwan.
26 “Iyan a tiyempu e kakunnaneno pallinang so tiyempu i Noah. 27 Sinoy a tiyempu, liyena nallinang, nangnga-angngan, ninu-inum anna nata-ataweno tolayera makiyad so aw a tinumallung i Noah so arka. Nallinang e nalimat ira amminan. 28 Kunna keppay yo nedemmu siin tiyempu i Lot. Amminan a tolayera e nangnga-angngan, ninu-inum, naggata-gatang, nallaku-laku, nammula-mula anna nappata-pataddag ira si balay. 29 Udde so aw a nanaw i Lot so Sodoma, nuran si afuy anna si asufre a naggabwat si langit antu natayera amminan a nabattang sinay. 30 Kunnapay yo mededemmu so aw na pannulik a yo Anak na Tolay.
31 “Sinoy a aw, ino ana so atap e ammenan a mullug anna tumallung so unagngeno balena tapenu appanneno rumentanera. Kunna keppay yo ana so uma e ammenan muli so balena. 32 Dandamman diyaweno nedemmu so atawa i Lotb! 33 Seanya yo mangikenga pelamang si angatna e ammena matolay a bulun i Dios amu-amu, anna seanya yo manggam a matay maipegafu sikwak e matolena a bulun i Dios amu-amu. 34 Itunduk sikwayu, si gafina inoy a pannulik, nu ana adwa a tolay a matu-maturug so tata piddan, appan i Dios ino tata mangurug sikwak anna mabattangngeno tata. 35 Nu ana adwa bafabbayera a maggili-giling si baggat, appanna i Dios ino tata a mangurug sikwak anna mabattang ino tata. 36 Ana pay adwa lallakiyera a mattara-tarabafu so uma, appan i Dios ino tata anna mabattang ino tata.”
37 Kunneno disipulunera, “Sintaw iyan a medemmu, Afu?”
Kunna i Jesus sikwara, “Nanu muliyak, ammuyunengke megafu si pemunuwan ira a maitayu a manilla nu maitayuweno buwitrera a makkaya-kayaf so kalawatan, ammuyu a ana natay a aggayam ira sinay.”