I Jesus anni Zakeo
19
So paddoyug i Jesus paumang so Jerusalem nattalebad ira so lubbun na Jerico. 2 Ana tata tolay sinay a mingan si Zakeo. Baggineno afu-afu na gumattukiyera si biyenes sinay a kalubbunan e dammak baggina. 3 Kinumanannengke a maita i Jesus takesi maammuwanna nu yanya baggina, gumafu se bitang baggina, ammena a maita i Jesus so kaoddu yo tolayera. 4 Antu nakkarantut baggina so allangan na tolayera e nunek so tata kayu na sikamoro takesi maitana i Jesus a mattalebad.5 Nattangaw i Jesus sin nadutungngeno nagyanan i Zakeo e kunna sikwana, “Zakeo, palanannu a mullug, se maawagku a magyan so balem sito aw.”
6 Nappalan a nullug i Zakeo, anna maanggam ingke a inarasawna i Jesus so balena. 7 Nattu-attul ino tolayera a nakaita e kunda, “Nakitallang baggina so tata tolay a sinaliwat.”
8 Nattaddag i Zakeo e kunna sike Jesus, “Dingngaggannu, Afu! Iyaddak ino gadwa na pakkukwak ira so madidiyat ira e nu ana a nadarogatku, itolik sikwara si mamippat mas kepay so inappak.”
9 Kunna i Jesus sikwana, “Dinumatangngin sitoyeno pannabbut i Dios sitaw a familya, gumafu se nepaitam pay nattalakka sike Dios kakunna yo inangwa i gakam a i Abraham. 10 Inangngak sito lubag, ikkanak a yo Anak na Tolay takesi intufukangku anna tabbutangkuweno nawawan ira.”
Na Pangarig na Tafulu a Imbut
11 Nangarig imman i Jesus sikwara a naningnga-ningngag ino tolayera sikwana, gumafu se aranniyen baggina so Jerusalem, e arig ino tolayera a aranniyen ino pattangngalan i Dios.
12 Antu kunna, “Ana tata lalaki a atannang ino akkatolena a inang so aroyu a lubbun takesi arasawanneno kalangananna a mappatul anna akkabalinna iyaw e siddarat a muli baggina so lubbunna. 13 Udde liyena a nanaw, inayanneno tafulu so imbutna anna inindannera si sittata minaa. Kunna sikwara, ‘Usan diyaw iyaw a pirak a pamefuyu si pallaku e paoddun diyaw makiyad si pannulik.’ 14 Udde makalussaw sikwaneno kalubbunannera antu nanundun ira si bafulundera takesi itundura so naddutuk sikwana se ammera kanggam baggina a mappatul sikwara.
15 “Udde pinattabalira baggina si patul. Sin nakauliyen baggina, nepaayagngeno imbutnera a inindanna si mina takesi maammuwanna nu pigyeno naganansiyara. 16 Inumaranni sikwaneno palungu e kunna sitaweno netunduna, ‘Afu, ino tata mina a neyaddam sikwak e nagganansiya si tafulu.’ 17 Kunneno patul sikwana, ‘Mapiya yo inangwam, mapiyaka a imbut! Gumafu se matalakkangka si bisang a neyadda sikwam, pattangngalan taka si tafulu a lubbun.’
18 “Inumaranni pay yo meka-adwa e kunna, ‘Afu, yo mina a neyaddam sikwak e nagganansiya si lima.’ 19 Antu kunneno patul so imbut, ‘Pattangngalan takana si lima a lubbun.’
20 “Inumaranni pay yo tata imbut e kunna, ‘Afu, iyaw pay yo mina a neyaddam e binabbattangku si panyok anna netawuk. 21 Inangwak iyaw gumafu se mattalawak sikwam anna istriktuka ingke, appa-appannuweno ammem a nappakelan anna buwa-buwatannuweno ammem a nemula.’
22 “Kunneno patul sikwana, ‘Maralka a imbut! Nunutan takana gumafu so netundum. Ammum kena a istriktuwak ingke anna appa-appangkuweno bakkangku a akwa anna buwa-buwatangkuweno bakkangku a nemula. 23 Saay se ammem a nedeposito so bangkuweno pirakku? Ana nad appangku a ganansiya liyek a dumatang.’ 24 Anna kunna so tolayera a nakataddag sinay, ‘Appan diyaw sikwaneno mina anna iyaddayu so ana tafulu a minana.’
25 Kunda so patul, ‘Afu, anen sikwaneno tafulu a mina!’
26 Kunneno patul, ‘Itunduk sikwayu, so amminan a tolayera a ana pintindira si sapit i Dios e maindannera si mas oddu a pintindi, udde so inoyera a awan pintindira maski arigga a maintindiyanda e maawanna keppay sikwara. 27 Kunna keppay so kapakwak ira a ammera kanggam a ikkanak ino mattangngal sikwara, iyang diyawera sitaw se patayan diyawera sito allangangku!’ ”
Na Pattallung i Jesus so Jerusalem
28 Kapiyena nangarig i Jesus, napalungu baggina a inang so Jerusalem. 29 Sin aranniyeran so Betfage anna Betania, so idagngeno Dangutul na kakayuwan a Olibu, nepapalunguna i Jesus ino adwa a disipulunera. 30 Kunna sikwara, “Umang kayu so metufad a tarabbunan a angantam, paddatang diyaw sinay, matumpalan diyaw siddarat ino tata ubbun a asno a nakasiggut a ammena kepay nataka-takayan. Uttaran anna iyang diyaw sitaw. 31 Se nu ana maffuut sikwayu, ‘Saay se utta-uttaran diyaweno ubbun a asno? Kun diyaw, ‘Maawag inay i Afu.’ ”
32 Antu inang ino dinundunnera e natumpalandeno ubbun a asno, meantu so netundu i Jesus sikwara. 33 Sin utta-uttarandeno ubbun a asno, finuut ino makan-akwa, “Saay se utta-uttaran diyaw iyan a ubbun a asno?”
34 Kunda, “Maawag iyaw i Afu.” 35 Nekangkalinda sike Jesus ino ubbun a asno, inappinanda si tafál ino addag na ubbun a asno anna pinatakera i Jesus.
36 Sikwana a nakatakay paumang so Jerusalem, iyafa-afak ino tolayera yo tafálda so pallakaranna. 37 Sin aranniyen i Jesus so Jerusalem, padolam so Dangutul na kakayuwan a Olibu, mangga-anggam ingke amminan ino disipulunera anna naggirawera a naddayaw sike Dios gumafu so amminan a milagru a naitara. 38 Kunda,
“Mapiya i Dios so patul a dumatang si pakapangwa i Afu!
Gumafu sikwana, ana piya gumafu so mapiya a pakikkawayyan sike Dios!
Hosanna a ana si kaatannangan si langit!”
39 Sinapit pay sikwaneno korwan a Fariseowera a bulun na kaodduwan, “Mestru, pasinakkannuweno disipulum ira!”
40 Tinumabbag baggina, “Itunduk sikwayu, nu suminak ira, ino batuweran ino maggira-girawa.”
Netunduna i Jesus ino Akkadaral na Jerusalem
41 Sin aranniyen i Jesus so Jerusalem, tinangitanna iyaw gumafu se naitaneno tolayera sinay. 42 Kunna, “Nu ammuyu nad lamang nu nenay a makaiyadda sikwayu si piya sito aw! Udde sitoye netawu iyaw so aggitayu. 43 Dumatangngeno awera a medemmu iyaw sikwayu se yo kapakwayuwera e lasangngandeno lebut diyawera anna dambalan dakayu takesi amme kayu makalawan. 44 Darallan dakayu anna patayandana amminan ino tolay a migigyan so lugar diyaw. Darallanda amminan ino interu a lugar diyaw gumafu se ammeyu a inarasaweno paggannon i Dios a manabbut sikwayu.”
Pinatamangnga i Jesus ino Gumallakuwera a Ana so Templu
45 Paddatangga so Jerusalem, inang i Jesus so lawan na Templu e pinatamangngeno gumallakuwera sinay. 46 Kunna sikwara, “Neturak so sapit i Dios,
‘Na balek e maayanna si balay a paddasallan ino tolayera.’b
udde inangwayu si pattawan na gumakkokot ira.”c