Binubbuwan ino Bafay si Pabangug a Lana ino Ulu i Jesus
12
Annam a aw liyeno Fiyesta na Attalebad, inang i Jesus so Betania a lubbun i Lazaro a pinantotolena. 2 Tata pananggafiyeno neparan sinay para sikwana. I Lazaro ino tata so katallang ira i Jesus e i Marta pay yo manuffu-nuffun a masserbi sikwara. 3 Nangappa pay i Maria si gadwa na litru na mangina a pabangug a lana a naangwa si fulut a nardo. Binubbuna iyaw so takki i Jesus e finunatanna si būknga. Nassiwarak so interu balayeno dallu na pabangug.4 Udde i Judas Iscariote a tata so disipuluwera i Jesus antu yo mattraydor sikwana e kunna, 5 “Nelaku nad lamangin ino pabangug si talluwatut a dinaryua anna neyaddeno pirak so madidiyat ira.” 6 Sinapit iyaw i Judas bakkan a gumafu se ikalowneno madidiyat ira, kunsi gumafu se tata baggina a gumakkokot. Baggineno gumàimfun si pirakda anna koko-kokotanna iyaw.
7 Udde kunna i Jesus, “Purayannu baggina. Neparanna iyaw a pabangug para so aw na akkatanamku. 8 Maumid a bulun diyaweno madidiyat ira, udde ammerak a maumid a mabulu-bulun.”
Na Gakkad a Pamapatay sike Lazaro
9 Oddu a Hudyuwera ino makaammu a ana i Jesus so Betania. Antu inang ira sinay bakkan pelamang sike Jesus nu bakkan kanggamda pay a maita i Lazaro a pinantotolena. 10 Antu plinanu pay yo afu-afu a pariyera a ipapatay i Lazaro, 11 gumafu sikwana, oddu a Hudyuwera ino nakikatway sikwara anna nangurug ira sike Jesus.
Na Pattallung i Jesus so Jerusalem
12 Kadaddaramatanna, naammuwan ino odduwengke a tolayera a nakifiyesta a i Jesus e paumang so Jerusalem. 13 Nangappera si panga-panga na palmera e nallawan ira so lubbun takesi dafunganda i Jesus. Naggira-girawera, “Hosanna!b Mapiya i Dios sikwana a dumatang si pakapangwa i Afu!c Baggineno Patul na Israel!”
14 Nakaita i Jesus si ubbun a asno e antu yo nattakayanna, kakunna yo sinapit so nakaturak a sapit i Dios,
15 “Amme kayu mattalaw, ikkayu a taga-Jerusalem!d
Itan diyaw, gumumwangin ino patul
a nakatakay si ubbun a asno!”e
16 Ammera maintindiyan iyaweno disipulunera sinoy. Udde kapiyena nantotolay i Jesus anna pinadayawan i Dios, nadandamdeno nakaturak patamu sikwana antu kunna sinayeno nedemmu sikwana.
17 Nebali-balin a nebaga pay yo tolayera a bulun i Jesus ino inangwana a panantotolay sike Lazaro. 18 Antu oddu a tolayera a nanafung sikwana gumafu se naammuwandeno milagru a inangwana. 19 Antu nattaretabban ino Fariseowera, “Itan diyaw, awan maangwatam se amminan a tolayera e dumaladandan sikwana!”
Kanggam a Itan ino Bakkan a Hudyuwera i Jesus
20 Ana korwan a bakkan a Hudyuwera a inang nakifiyesta takesi maddayaw sike Dios. 21 Inang ira sike Felipe a taga-Betsaida na Galilea e kunda sikwana, “Wayi, kanggammi a maita i Jesus.” 22 Inang a netundu i Felipe sike Andres ino sinapitda antu inang ira adwa sike Jesus e nepaammura sikwana.
23 Tinabbagngera i Jesus, “Dumatangin ino tiyempu a ikkanak a yo Anak na Tolay e mapadayawan. 24 Gakkurug yo itunduk sikwayu, makiyad si ammena madannag so lubag ino bukal na trigu e matay, tattata pelamang iyaw. Udde nu matay iyaw, mamunga iyaw si odduwengke. 25 Na tolay a ikengana yo angatna sito lubag e ammena matolay a bulun i Dios amu-amu. Udde nu ammena ikengan yo angatna sito lubag e matolena a bulun i Dios amu-amu. 26 Seanya yo manggam a masserbi sikwak e maawag a dumandan sikwak. Anna maski sintaw yo angangku sinay pay yo angan na gumasserbik. Dayawan i Amak ino amminan a masserbi sikwak.”
Nepakaammuna i Jesus ino Akkapatena
27 Kunna kepay i Jesus, “Makungku-kungkul ino nakamku sitoye. Sapitangku kad sike Ama a tabbutannak so paddiriyatku. Ammena, se iyaweno gafuna nu saay a inangngak sitaw. 28 Ama, padayawannuweno ngannu.”
Tata ngaral a naggabwat si langit a nakkun, “Pinadayawangkun iyaw, e padayawangkuna imman.”
29 Nadingngag ino tolayera a nakataddag sinayeno ngaral e arigga si addug. Udde kundeno korwan ira, “Tata anghel ino nakitetabbag sikwana.”
30 Kunna i Jesus sikwara, “Na ngaral a nadingngag diyaw e bakkan a para sikwak nu bakkan para si pammakapiyan diyaw. 31 Sitoyen ino tiyempu a nunutan i Dios ino tolayera sito talubaggan anna affutanna i Satanas a gumattangngal sito talubaggan. 32 Nu ikkanak e metulluna takesi matay, paaranniyangkuweno tolayera a mangurug sikwak.” 33 Sinapit iyaw i Jesus takesi ipakaammuna nu kasanna baggina a matay.
34 Tinabbag ino tolayera baggina, “Kunna so katunungan a i Mesiya e matolena amu-amu. Kasannam a sapitan a yo Anak na Tolay e metullu takesi matay? Yanya kad iyaw a Anak na Tolay?”
35 Nangarig i Jesus meafu si baggina, “Bisang lamangin a tiyempu a bulun diyaweno sirwat. Mallakad kayu daggun a bulun diyaw kepay yo sirwat takesi amme kayu madatangngan ino lammuk. Ammena ammuweno mallaka-lakad so kalammukan nu sintaw yo anganna. 36 Daggun a ana kepay yo sirwat, mangurug kayu si sirwat takesi mattabali kayu a anak na sirwat.”
Ammena Nangurug ino Hudyuwera sike Jesus
Akkabalinna a sinapit iyaw i Jesus, nanaw baggina sinay e ammenan nappaita sikwara. 37 Maski oddu a milagru a inangwa i Jesus a naiteno Hudyuwera, ammera kepay nangurug sikwana. 38 Nedemmu iyaw takesi maparulot ino sinapit i profeta Isaias,
“Afu, awan ingke kad a nangurug so sinapitmi?
Nangipaitannuweno pakapangwam?”f
39 Anna ammera lud ingke mangurug se kakunna yo sinapit i profeta Isaias,
40 “Binulagnga i Dios ino matara takesi ammera makaita,
anna pinataggatneno nakamda takesi ammera makaintindi,
E kunna i Dios, ‘Tantaro muliyerana sikwak
e pammapiyangkuwera.’ ”g
41 Sinapit iyaw i Isaias gumafu se naitaneno kadayawan i Jesus anna nepakaammuneno meafu sikwana.
42 Maski nu kunna sinay, oddu a afu-afuwera na Hudyuwera ino nangurug sike Jesus. Udde ammera iyaw a nepaammu gumafu se mattalawera so Fariseowera tantaro nu paanawandera so sinagoga 43 se mas kinanggammanda a dayawan ira yo tolayera ammat si dayawan ira i Dios.
Na Sapit i Jesus ino Mannunut so Tolayera
44 Antu nedappa i Jesus a nassapit, “Seanya yo mangurug sikwak bakkanak lamang yo kuruwanna nu bakkan maski so nanundun sikwak. 45 Anna seanya yo nakaita sikwak, naitanan pay yo nanundun sikwak. 46 Inangngak sitaw a sirwat na talubaggan takesi seanya yo mangurug sikwak e ammera magyan so kalammukan. 47 Ammek nunutan ino tolay a maningngag so sapitkuwera anna ammena makimoray sitawera, se ammek inang a nunutan ino tolayera udde tabbutan ira. 48 Seanya yo mammay sikwak anna ammena mangurug so sapitkuwera, ana mannunut sikwana. Na sapitkuwera antu yo mannunut sikwara so Aw na Pannunut. 49 Se ammek nassapit a naggabwat lamang so nakamku nu bakkan naggabwat sike Ama a nanundun sikwak. Baggineno nanundun sikwak nu nenay yo sapitangku anna ipakaammuk. 50 Anna ammuk a yo dundunna e mangiyadda si angat a bulun i Dios amu-amu. Antu yo sapi-sapitangku antu pay yo ipesapi-sapit i Ama sikwak.”