Binagguwanna i Jesus ino Takkiyeno Disipulunera
13
Liyena dumatang ino Fiyesta na Attalebad, ammuna i Jesus a dinumatangngin ino tiyempu a anawanna yo talubaggan takesi muliyen sike Amana. Iddukanneno gumaladandannera sito lubag e iddukannera makiyad so uddina.2 Kagafiyananna, nananggafi i Jesus bulunneno disipulunera. Sinussuwan i Satanas i Judas a anak i Simon Iscariote a traydoranna i Jesus. 3 Ammu i Jesus a neyaddana i Amana amminan a pakapangwa sikwana. Ammuna pay a naggabwat baggina sike Dios e muli keppay sike Dios. 4 Maski nu kunna sinay, nattaddag i Jesus sikwara a mangnga-angngan. Inarineno makan-lawan a barasina e nabbabbat si tuwalya so siwaknga. 5 Akkabalinna, nangiyekwa baggina si danum so palanggana e pinefunanna a bagguwan ino takki na disipulunera anna finunatanna si tuwalya a nakababbat so siwaknga.
6 Sin inumaranni i Jesus sike Simon Pedro, kunna i Pedro sikwana, “Afu, bagguwannu kad yo takkik ira?”
7 Kunna i Jesus, “Ammem kepay maintindiyan yo akakwangku sitoye, udde ammena mabbayag maintindiyannu keppena.”
8 Kunna i Pedro sike Jesus, “Ammeknengke ipabaggu yo takkik ira sikwam.”
Tinumabbag i Jesus, “Nu ammek bagguwan iyan takkim ira, ammekan mebilang si disipuluk.”
9 Antu kunna i Simon Pedro, “Afu, bakkan lamang yo takkik ira yo bagguwannu, udde maski pay yo kamatkuwera anna uluk!”
10 Kunna i Jesus sikwana, “Na tolay a nakadiyutin, ammenan maawag a bagguwan. Na takkina lamang yo mabagguwan. E ikkayu, malinis kayun amminan, fuwera lamang yo tata.” 11 Se ammu i Jesus nu yanya yo mattraydor sikwana antu kunna a bakkan amminan sikwara e malinis.
12 Sin nabagguwanin i Jesus ino takkirera, neyallungnga keppay yo makan-lawan a barasina anna nakituttud sikwara. Kunna sikwara, “Naintindiyan diyaweno inangwak sikwayu? 13 Ayandak si Mestru anna Afu, e fustu kayu se ikkanak lud inay. 14 Nu ikkanak a Afu anna Mestruyu e namaggu si takkiyuwera, maawag pay a bagguwan diyaweno takki na bulun diyawera. 15 Inangwak inay tapenu wara tuntulan diyaw. Antu akwan diyaw pay yo kunneno inangwak sikwayu. 16 Gakkurug yo itunduk sikwayu, awan a imbut a mas kaawan ammat sike amuna, e awan pay a nedundun a mas kaawan ammat so nanundun sikwana. 17 Mapiya i Dios sikwayu nu maintindiyan diyaw iyawera anna akwan diyaw.”
18 Kunna kepay i Jesus, “Na sinapitku e bakkan a patamu sikwayu amminan. Ammuk ino pinilik ira. Udde maawag a maparulot ino nakaturak a sapit i Dios a kunna, ‘Trinaydornak ino tolay a nakiakkan sikwak.’a 19 Itunduk iyaw sikwayu liyena medemmu, takesi nanu nedemmuwen e kuruwan diyaw a Ikkanak i Mesiya. 20 Gakkurug yo itunduk sikwayu, na tolay a mangarasaw so idundungku e mangarasaw sikwak, anneno mangarasaw pay sikwak e mangarasaw so nanundun sikwak.”
Nepakaammuna i Jesus nu Yanya yo Mattraydor Sikwana
21 Akkabalinna a sapitan iyaw i Jesus, makungku-kungkul ino nakamma e kunna, “Gakkurug yo itunduk sikwayu, tata sikwayu a mattraydorna sikwak.”
22 Nakkakainniteno disipulunera se ammera ammu nu yanya sikwareno kanggamma sapitan. 23 Na karebbing i Jesus antu yo disipulu a iddukannengke. 24 Sinenyattan baggina i Simon Pedro tapenu fuutanna i Jesus nu yanya sikwareno kanggamma sapitan.
25 Antu nassandig ino disipulu sike Jesus e naffuut baggina, “Afu, yanya sikwamiyeno kanggammu sapitan?”
26 Kunna i Jesus sikwana, “Nu yanya yo pangiyaddangku sito isosawku a tinapay, baggina inay.” Antu nesosaw i Jesus ino tinapay anna neyaddana sike Judas a anak i Simon Iscariote. 27 Sin maarasaw i Judas ino tinapay, inumunag i Satanas sikwana. E kunna i Jesus sikwana, “Akwannun siddarat ino akwannu.” 28 Awan maski yanya so katallang ira i Jesus ino nakaintindi nu saay sinapitna inay. 29 Arig ino korwan ira a sinapit i Jesus sike Judas a umang maggatang si maawagga so fiyesta onnu umang mangiyadda so madidiyat ira gumafu se baggineno gumàimfun si pirakda.
30 Sin nabalin a inakkan i Judas ino tinapay, siddarat a nanaw baggina. Gafiyenin sinoy.
Na Bawu a Dundun
31 Sin nanaw i Judas, kunna i Jesus, “Sitoye mapadayawanin ikkanak a yo Anak na Tolay anna megafu sikwak e mapadayawan pay i Dios. 32 Anna nu megafu sikwak e mapadayawan i Dios, ipakaammu pay i Dios ino kadayawangku e siddarat akwanna iyaw. 33 Wawwayik, ammekun mabbayag sikwayu. Intufukandaknga udde sapitangku pay sikwayuweno sinapitku so afu-afuwera na Hudyuwera, ‘Amme kayu makaumang so angangku.’ 34 Antuweyaw yo bawu a itungku sikwayu, makkaiddu-idduk kayu. Kakunna yo piddukku sikwayu, kunna penad ino akwan diyaw a makkaiddu-idduk kayu. 35 Se nu makkaiddu-idduk kayu, maammuwan ino amminan a tolayera a disipulu takayu.”
Nepakaammuna i Jesus ino Pangiyambafag i Pedro
36 Finuutna i Simon Pedro sike Jesus, “Afu, sintaw yo angannu?”
Kunna i Jesus, “Ammeka dama a dumandan sikwak sitoye, udde dandanannak keppena.”
37 Naffuut kepay i Pedro, “Afu, saay ammek dama dumandan sikwayu sitoye? Nakaparanak a matay para sikwayu.”
38 Tinumabbag i Jesus, “Nakaparangka kad a matay para sikwak? Gakkurug yo itunduk sikwam, liyena massirallok ino lalung, mamillunaknga a iyambafag.”