I Jesus ino Dalan a Paumang sike Ama
14
Kunna i Jesus so disipulunera, “Amme kayu maburung. Mattalak kayu sike Dios anna mattalak kayu pay sikwak. 2 Oddu pagyanan so balay i Amak si langit. Ammek sapitan iyaw nu ammena gakkurug. Mapalunguwak a umang sinay tapenu mangiparanak si pagyanan diyaw. 3 Nanu umangak anna neparangkun ino pagyanan diyaw, muliyak e ibulun takayu takesi nu sintawak, ana kayu pay sinay. 4 E ammuyuweno dalan a paumang so angangku.”5 Kunna i Tomas, “Ammemi ammu nu sintaw yo angannu, kasannami a maammuwan ino dalan a paumang sinay?”
6 Kunna i Jesus sikwana, “Ikkanak ino dalan, ino kagakkuruwan anneno angat. Awan a makaumang sike Ama, nu bakkan sikwak lamang. 7 Nu ammurak, ammuyun pay i Amak. Mamefu sitoye, ammuyun baggina anna naitayun.”
8 Kunna i Felipe, “Afu, ipaitam nad i Ama sikwami e makuntentu kamin.”
9 Kunna i Jesus sikwana, “Felipe, nabayagakun sikwayu, udde ammenak kad kepay ammu-ammu? Seanya yo nakaita sikwak e nakaiten pay sike Ama. Saay sapitannu a, ‘Ipaitam sikwami i Ama?’ 10 Ammeka kad mangurug a i Ama anna ikkanak e tattata? Amminan ino sinapitku sikwayu e ammena naggabwat so nakamku ingkepay nu bakkan sike Ama. I Ama a ana sikwak antu yo mangwa-angwa si aggangwana megafu sikwak. 11 Mangurug kayu a i Ama anna ikkanak e tattata. Nu ammeyu kuruwan iyaw a sapi-sapitangku, kuruwandak gumafu so milagruwera a akakwangku. 12 Gakkurug yo itunduk sikwayu, ino mangurug sikwak e makaangwa si milagruwera a akakwangku anna mas kepay gumafu se muliyakun sike Ama. 13 Akwangku maski sanneno arangngan diyaw gumafu so pakikkawayyana diyaw sikwak takesi mapadayawan i Ama megafu sikwak a Anaknga. 14 On, akwangku a akwan gumafu so pakikkawayyan diyaw sikwak.”
Na Tamba Meafu sike Espiritu i Dios
15 Nebalinna i Jesus a nakkun, “Nu iddukandak, makimoray kayu so dundungkuwera. 16 E arangngangkuna sike Ama a manundun si korwan a Taga-duffun, antu yo magyan sikwayu amu-amu. 17 Baggineno Espiritu na kagakkuruwan, a amme maarasaweno tolayera gumafu se ammera maita baggina onnu matakkilalan. Udde ammuyun baggina, gumafu se anen baggina sikwayu anna sigigyan baggina sikwayu.
18 “Amme takayu anawan a manilla ulilera. Muliyaknga keppay sikwayu. 19 Ammena mabbayag, ammerakunna a maiteno tolayera sito lubag udde ikkayu a mangurug sikwak, maitaraknga gumafu se mantotolayak, mantotolay kayu pena. 20 Sitan a tiyempu, maammuwan diyaw a ikkanak anni Ama e tattata, anna ikkanak anna ikkayu pay e tattata anna anaak sikwayu. 21 Na tolayera a maningngag anna makimoray so Tunkuwera, antu yo midduk sikwak. E ino midduk sikwak, indukan pay i Amak e iddukangku pena anna mappaammu-ammuwak ingkena sikwana.”
22 Kunna i Judas (bakkan i Judas Iscariote) sikwana, “Afu, saay sikwami pelamang yo pappakaammuwannuwengke anna bakkan so korwan a tolayera?”
23 Tinumabbag i Jesus, “Na tolayera a midduk sikwak e makimoray so sapitku. Iddukan ira i Amak anna umang kami a makiigyan sikwara. 24 Seanya yo ammena midduk sikwak e ammena makimoray so sapitkuwera. Ammena naggabwat sikwak ino sapit ira a nadingngag diyaw, nu bakkan naggabwat sike Ama a nanundun sikwak.
25 “Sapi-sapitangku iyawera sikwak a anaak kepay sikwayu. 26 Udde yo Taga-duffun a Espiritu i Dios a pannakabaggik e manunturu si amminan sikwayu anna ipadandamma amminan a sinapitku.
27 “Piya yo ibattangku sikwayu. Na piya a ana sikwak yo iyadda-addak sikwayu, bakkan a kakunna iyaweno piya a iyadda-adda na talubaggan. Amme kayu maburung anna mattalaw. 28 Nadingngag diyaweno sinapitku a anawan takayu udde muliyaknga keppay sikwayu. Nu gakkurug a iddu-iddukandak, maanggam kayu nad, se umangak sike Ama a mas kaawan ammat sikwak. 29 Netundukun iyaw sikwayu liyena kepay a medemmu, takesi nanu makwana, mangurug kayu sikwak.
30 “Ammekun pabayaggan a makitetabbag sikwayu, se gumumwangin i Satanas a antu yo mattangngal so tolayera sito lubag. Awan a pakapangwana sikwak. 31 Udde akwangkuweno netunna i Ama sikwak takesi maammuwan ino tolayera a iddukangku i Ama.
“Intamun. Manaw etamun!”