Na Gakkurug a Fungal na Ubas
15
Nangarig i Jesus meafu sikwana, “Ikkanak ino gakkurug a fungal na ubas anni Ameno taga-tabbud. 2 aIyudduneno kada pangak a ammena mamunga anna gabbunganna anna linisanneno pangak ira a mamunga tapenu annanot a mamunga si odduwengke. 3 Kakunnayu yo pangera a ginabbungku gumafu se nangurug kayu so sinapitku sikwayu. 4 Sigigyan kayu sikwak e sigigyanak pay sikwayu. Ammena mamungeno panga na ubas nu ammena a sigigyan so fungalna. Kakunnayu keppay nu amme kayu sigigyan sikwak.5 “Ikkanak ino fungal na ubas, ikkayuweno pangak ira. Na sigigyan sikwak, anna ikkanak sikwana e mamunga si odduwengke, gumafu se awan a makwayu nu nesina kayu sikwak. 6 Na ammena sigigyan sikwak e kakunna yo panga a metappol anna mangu. Na kunna sinay a pangera e maammung anna metappol so afuy anna mataggab. 7 Nu sigigyan kayu sikwak anna manolay kayu meantu so sapitkuwera, maski sanneno arangngan diyaw meyaddana sikwayu. 8 Mapadayawan i Amak nu ikkayu e kakunna yo tata panga a bastante a mamunga anna nu kunna sitaweno akwan diyaw mepaitayu a ikkayuweno disipuluk ira. 9 Nu kasanna a iniddukngak i Ama, kunna keppay yo piddukku sikwayu. Sigigyan kayu si piddukku. 10 Nu makimoray kayu so dundungkuwera, sigigyan kayu so piddukku, kakunnak, makimorayak so dundun ira i Amak anna sigigyanak si pidduknga.
11 “Sinapitku iyawera sikwayu takesi ammena makkurang ino anggam diyaw. 12 Antuweyaw yo itungku sikwayu, makkaiddu-idduk kayu kakunna yo piddukku sikwayu. 13 Awan a dokal a pidduk a kakunna yo pidduk na tata tolay a mangiyadda si angatna para si kolakngera. 14 Kolak takayu nu makimoray kayu so dundungkuwera. 15 Amme takayun a ibilang a imbut ira, se ammena ammuweno imbut nu nenay yo akakwan ino amuna. Nu bakkan, ibilang takayu a kolakkuwera, gumafu se sinapitku sikwayuweno amminan a nadingngagku sike Amak. 16 Ammerak a pinili, nu bakkan ikkanak ino nappili sikwayu. Dinutukan takayu a umang manundu si sapitku anna kakunna yo tata panga, mamunga kayu si oddu a mabbayag amu-amu, takesi nu nenay yo arangngan diyaw sike Ama e iyaddana gumafu so pakikkawayyanb diyaw sikwak. 17 Iyaddak sikwayuweno dundungkuwera takesi makkaiddu-idduk kayu.”
Na Akkalussaweno Tolayera so Disipuluwera
18 Kunna kepay i Jesus, “Nu makalussaweno tolayera a ammena mangurug sikwak, dandamman diyaw a ikkanak ino palungu a kinalussora. 19 Nu tata kayu so tolayera a ammena mangurug sikwak, iddukan dakayu gumafu se nebilang kayu sikwara. Udde bakkang kayun a kakunnara se pinili takayu a mesina sikwara antu kalussaw dakayu. 20 Dandamman diyaw nad yo sinapitku sikwayu a awan a imbut a mas kaawan ammat so amuna. Nu nelupetdak, ilupet dakayu pena. Nu nakimorayera so sinapitku, makimorayera pena so sapitan diyaw. 21 Akwandana amminan iyaw sikwayu gumafu se mangurug kayu sikwak, anna gumafu se ammera ammuweno nanundun sikwak. 22 Nu ammek inang sito talubaggan anna nanundu so tolayera, ammera masapit a ammera nakaliwat si pammayda sikwak. Udde sitoye, awanin a pangakiranda so liwatdera. 23 Seanya yo makalussaw sikwak, makalussaw pay sike Amak. 24 Awan nad a pakaliwatanda nu ammek nangwa si milagruwera a awan korwan a makaangwa. Udde sitoye, maski naitaran ino inangwak e nekalussorak kepay anni Amak. 25 Udde nakwa iyaw anna neyakkurug ino kunna so nakaturak a sapit i Dios, ‘Nekalussorak maski awan a gafuna.’ ”c