16
“Sinapitku iyawera sikwayu takesi amme kayu mibbat a mangurug sikwak. 2 Ammera kayun a arasawan so sinagogera. Dumatangngeno aw a seanya yo mappatay sikwayu e arigga a masserbi baggina sike Dios. 3 Anna akwandana iyaw gumafu se ammera ammu i Ama onnu ikkanak. 4 Sinapitku iyawera sikwayu takesi nanu dumatangngeno tiyempu a medemmu iyawera, madandam diyaw a sinapitkun sikwayu.”Na Akwan ino Espiritu i Dios
“Ammek sinapit iyaw sikwayu sin palunguna gumafu se bulundak kepay. 5 Udde sitoye muliyakun so nanundun sikwak. Udde awan ingke sikwayu a naffuut nu sintaw yo angangku. 6 Sitoye sinapitkun sikwayu, kurwengke a narraddam kayu. 7 Udde gakkurug yo itunduk sikwayu, pammakapiyan diyaw keppay nu manawak. Nu ammek manaw, ammena gumumwang ino Taga-duffun diyaw. Udde nu manawak, ipeyangkuna baggina sikwayu. 8 Paddatangnga, ipruwebana so tolayera a ammena fustuweno pintindira meafu si liwat, nu nenay yo matunung meafu sike Dios anna so pannunutna sikwara. 9 Ammena fustuweno pintindira meafu si liwat gumafu se ammera mangurug sikwak. 10 Ammena fustuweno pintindira nu nenay yo matunung meafu sike Dios gumafu se umangak sike Ama e ammerakunna maita. 11 Ammena fustuweno pintindira meafu si pannunut i Dios, gumafu se nanunutin i Satanas a afu-afu na iyaw a talubaggan.
12 “Oddu kepay nad yo kanggammangku a itundu sikwayu, udde ammeyu kepay a maintindiyan sitoye. 13 Udde paddatang ino Espiritu na kagakkuruwan, igiya nakayu si amminan a kagakkuruwan a naggabwat sike Dios se yo sapitanna e bakkan a naggabwat si nakamma, nu bakkan ino nadingngagnga anna ipakaammuna sikwayuweno mededemmuwera so dumatang a tiyempu. 14 Dayawannaknga gumafu se ipakaammunana sikwayu nu nenay yo kanggammangku a ipakaammu sikwayu. 15 Amminan a akwa i Ama e akwak, iyaweno gafuna a sinapitku a ipakaammunana sikwayu nu nenay yo kanggammangku a ipakaammu sikwayu.”
Na Raddam Mattabali si Anggam
16 Kunna kepay i Jesus, “Amme mabbayag, ammerakunna maita, udde ammena keppay mabbayag e maitarak keppena.”
17 Nattataretabbag ino korwan a disipulunera e kunda, “Nenay nakuyeno kanggamma sapitan a ammena mabbayag e ammetamma maita baggina anna ammena mabbayag maitatamma keppay baggina. Kunna kepay, ‘Gumafu se umangak sike Amak.’ 18 Nenay nakuy kanggamma sapitan ino, ‘Ammena mabbayag’? Ammetam a maintindiyan ino sapi-sapitanna.”
19 Ammu i Jesus a kanggamda a maffuut sikwana, antu kunna sikwara, “Mappipinnakifut kayu kad meafu so sinapitku a ‘ammena mabbayag e ammerakunna maita anna ammena keppay mabbayag e maitarak keppena’? 20 Gakkurug yo itunduk sikwayu, mattangit anna marraddam kayuna, udde mammalamuwangngeno tolayera a ammena mangurug sikwak. Marraddam kayuna udde mataliyanna si anggam.
21 “Nu massikallin ino tata bafay, malowan baggina se dumatangin ino orat a panaknga. Udde nanu meyanakin ino kalubit, makalyawannaneno lowna gumafu si anggamma a nangiyanak si kalubit sito talubaggan. 22 Kunna keppay sikwayu, marraddam kayu sitoye udde maita takayu imman anna maanggam kayunengke. Awan makapaimemmak si anggam diyaw. 23 Nanu dumatangnga inay a tiyempu, awanin a ipakifut diyaw sikwak. Gakkurug yo itunduk sikwayu, nu marang kayu maski sanna sike Ama, iyaddanana sikwayu gumafu so pakikkawayyana diyaw sikwak. 24 Makiyad sitoye, awan kepay inarang diyaw sike Dios gumafu so pakikkawayyan diyaw sikwak. Marang kayu sikwana takesi ammena makkurang ino anggam diyaw.
25 “Sapi-sapitangku amminan iyaw sikwayu si pangarig. Udde dumatangngeno tiyempu a ammekunna mangngarig sikwayu meafu sike Ama. 26 Sitan a aw, marang kayu sike Ama gumafu si pakikkawayyan diyaw sikwak. Ammenan maawag a ikkanak kepay yo marang sike Ama para sikwayu 27 se iddukan nakayu i Ama, gumafu se iniddukdak anna nangurug kayu a naggabwatak sike Dios a Amak. 28 Naggabwatak lud sike Ama e inangngak sito talubaggan. Sitoye, anawangku yo talubaggan anna muliyak sike Ama.”
29 Kunneno disipulunera, “Sitoye, maintindiyammin ino sinapitnu se ammekan massapit si pangarig. 30 Maitamin a ammum amminan. Tabbaggannuweno fuutmiyera maski liyemi kepay a ifuut sikwam. Gumafu sitaw, mangurug kami a naggabwatka sike Dios.”
31 Kunna i Jesus, “Mangurug kayun? 32 Aranniyen a dumatang ino tiyempu e sitoyen lud a makkakaratway kayu. Ikka-ikkayu ingkepay yo muli so baleyu e ibattanggak a tattata. Maski nu kunna sinay, ammek gakkurug a mattata se bulungku i Ama sikwak. 33 Sinapitku iyaw sikwayu takesi suminak ino nakam diyaw gumafu si pakisittatayu sikwak. Ilupe-lupet dakayuweno tolayera a ammena mangurug sikwak, udde patuyaggan diyaweno nakam diyaw, se inaffutkun ino talubaggan!”