Nedasalna i Jesus ino Disipulunera
17
Akkabalinna a sinapit iyaw i Jesus, nattangaw baggina si langit e kunna, “Ama, dinumatangngin ino tiyempuk. Padayawannak a Anakngu tapenu mapadayawan taka. 2 Se inindannak si pakapangwa a mattangngal so amminan a tolayera takesi amminan a netalakngu sikwak e matolena a bulun i Dios amu-amu. 3 Antuweyaw yo angat a bulungka, yo maammu-ammuraka, yo mittata anna gakkurug a Dios, anna maammu-ammurak a yo Jesu Kristo a nedundunnu. 4 Nepaitak ino kadayawannu sito lubag megafu si pangibali-balingku so amminan a nepaangwam sikwak. 5 Antu sitoye, Ama, iyaddam sikwak ino kadayawan nanu anaaknga imman sikwam a kakunna yo kadayawan a ana sikwak sin mabbulun eta liyena kepay maparatu yo talubaggan.6 “Nepaammu takan so tolayera a netalakngu sikwak a naggabwat so tolayera a ammena nebilang sikwam. Akwam ira e netalaknguwera sikwak anna kinuruggeno sapitnu. 7 Sitoye, ammuran a yo amminan a netalakngu sikwak e gakkurug a naggabwat sikwam, 8 se netunturuk sikwareno sapit ira a neyaddam sikwak, e inarasora pay. Ammuran a ikkanak e gakkurug a naggabwat sikwam, anna mangurug ira a ikka lud ino nanundun sikwak.
9 “Idasallangkuwera. Bakkan amminan a tolayera e idasa-dasalku nu bakkan ino amminan lamang a netalakngu sikwak gumafu se akwam ira. 10 Akwam amminan a akwak, e akwak pay amminan a akwam e mapadayawanak megafu sikwara. 11 E sitoye, anawangku yo talubaggan e muliyak sikwam, udde yo tolayera a netalakngu sikwak, anawangkuweran sito talubaggan. Amak, ikka a mepangngat a dayawan, imurannuwera megafu si pakapangwa a neyaddam sikwak takesi nu kasanna a ikka anna ikkanak e tattata, kunna keppay a mattatera. 12 Daggun a bulundak, inimurangkuwera megafu si pakapangweno ngannu, yo ngan a neyaddam sikwak. Tinabbudkuwera e awan a mesina sikwara, fuwera so tolay a mintufuk si kapeligruwanna, takesi maparulot ino neturak so sapitnu.
13 “Sitoye, paumangakun sikwam udde sapitangku iyawera sikwak a anaak kepay sito talubaggan takesi ammena makkurang ino pammalamuwang ino disipuluk ira. 14 Netundukun sikwareno netundum sikwak e kinalussawereno tolayera gumafu se bakkan iran a kakunna yo tolayera sito talubaggan, kakunnak a bakkan a taga-talubaggan. 15 Ammek arangngan a appannuwera anna matay sito talubaggan nu bakkan tabbutannuwera takesi ammera maaffut i Satanas a Maral. 16 E netundukun a bakkan iran a kakunna yo tolayera sito talubaggan, kakunnak a bakkan a taga-talubaggan. 17 Isinam ira takesi serbiyan daka megafu si kagakkuruwan. Na sapitnuweno kagakkuruwan. 18 Kakunna sin dinundunnak sito talubaggan, kunna keppay, nedundungkuwera sito talubaggan. 19 Gumafu sikwara isinak sikwam yo baggik takesi mesinera pay a masserbi sikwam megafu si kagakkuruwan.”
Nedasallanna i Jesus ino Amminan a Mangurug
20 “Bakkan lamang yo disipuluk ira yo idasallangku, nu bakkan kunsi kunnapay inoyera a mangurug sikwak gumafu so tunturura meafu sikwak. 21 Ama, mattatera nad amminan. Kakunna a ikka e ana sikwak anna ikkanak a ana sikwam, kunna keppay, mattatera nad sikwata takesi yo tolayera sito talubaggan e mangurug a ikkeno nanundun sikwak. 22 Neyaddak sikwareno kadayawan a neyaddam sikwak takesi mattatera, kakunnam anna ikkanak a tattata. 23 Anaak sikwara e anaka sikwak takesi mattatera anna maammuwan ino tolayera a ikkeno nanundun sikwak anna maammuwanda pay a iddu-iddukannuweno disipuluk ira kakunna yo piddukngu sikwak.
24 “Ama, kanggammangku a inoyera a netalakngu sikwak e bulungku nu sintaw yo nagyanangku takesi maitareno kadayawan a neyaddam sikwak gumafu se iniddukngak liyena kepay a naparatuweno talubaggan. 25 Amak a matunung, ammeraka ammuweno tolayera sito talubaggan udde ammu taka anna ammuweno disipuluk ira a ikkeno nanundun sikwak. 26 Nepaammu takan sikwara e ibali-balingku a ipakaammu taka sikwara takesi makkaiddu-idduk ira a kunnapay yo piddukngu sikwak anna sigigyanak sikwara.”