Na Akkagafut i Jesus
18
Sin nabalin i Jesus a naddasal, nanaw baggina bulunneno disipulunera e naddammang ira so danak na Kidron e tinumallung ira so pammulan si kayuwera a olibu. 2 I Judas a mattraydorna sike Jesus e ammuna inay a lugar se maumid a umang sinay i Jesus anneno disipulunera. 3 Antu inang i Judas sinay bulunneno sundaluwera anneno guwardiyera na Templu a dinundun ino afu-afu a pariyera anneno Fariseowera. Nangikangkalin ira si allamparan ira, sirwat ira anna armas ira. 4 Gumafu se ammuna i Jesus amminan ino makwa sikwana, dinafungngera e kunna, “Yanya yo intufukan diyaw?”5 Kunda, “I Jesus a taga-Nazaret.”
E kunna i Jesus sikwara, “Ikkanak.”
Bulunda pay sinay i Judas a nattraydor sikwana. 6 Sin sinapit i Jesus, “Ikkanak,” napadandal anna nabaletwak ira. 7 Sin nakagumbwat iran, naffuut imman i Jesus sikwara, “Yanya kad yo intu-intufukan diyaw?”
E kunda, “I Jesus a taga-Nazaret.”
8 Tinumabbag i Jesus, “Ikkanak kungku lud sikwayu. Nu ikkanak ino intufukan diyaw, purayan diyaw a makaanaweno disipuluk ira.” 9 Antuweyaw yo kunna takesi maparulot ino sinapitna “Ama, awan ingke nawawan so tolayera a netalakngu sikwak.”
10 Tinukkut i Simon Pedro ino duluna e kinabbangngeno diwanan a layag i Malco a imbut na katannangan a pari na Hudyuwera.
11 Kunna i Jesus sike Pedro, “Iyalagngu iyan dulum. Maawagku a attamman ino paddiriyat a planu i Ama sikwak.”
Netallang i Jesus so Sanhedrin
12 Antu ginafut anna siniggutan ino sundaluwera a Romano bulundeno afura anneno guwardiyera na Templu i Jesus. 13 Neyangga abbu i Jesus sike Anas a katuwangan i Caifas a katannangan a pari sitan a dawun. 14 I Caifas ino nattabarang so afu-afuwera na Hudyuwera a tammapiya para sikwara a tata tolayeno matay para si pammakapiyan ino kalubbunannera.
Neyambafagnga i Pedro i Jesus
15 Dinumandan sike Jesus da Simon Pedro anneno tata kepay a disipulu i Jesus. Gumafu se ammu-ammuweno katannangan a pari iyaw a disipulu, antu gafuna a nebulun sike Jesus a tinumallung so lagwerta na balayeno katannangan a pari. 16 Udde nindag i Pedro aranni so pattallungan. Antu nuliyeno bulunna a ammu-ammuweno katannangan a pari e kinatetabbagngeno bafay a magguwardiya-guwardiya so pattallungan anna pinatallungnga i Pedro. 17 E sinapit ino bafay sike Pedro, “Bakkang kad a tataka pay so disipuluwera inay a tolay?”
Kunna i Pedro, “Bakkanak.”
18 Gumafu se malabbat sinoy, naggangab ino imbut ira anneno guwardiyera na Templu. Nattaddag ira so lebut na afuy tapenu mapatuwan ira. Nakilamud i Pedro sikwara e nappapatu pay.
Naimbistigeno Kaatannangan a Pari sike Jesus
19 Inimbestigan ino katannangan a pari i Jesus meafu so disipulunera anna so itunturunera. 20 Tinumabbag i Jesus, “Sibubukkatak a nassapit so tolayera. Maumirak a manunturu so sinagogera anna so lagwerta na Templu a passosoronnungan ino Hudyuwera. Awan sinapitku a paimad so tolayera. 21 Saay se fuutandak? Fuutan diyaweno tolayera a nakadingngag sikwak. Ammureno sinapitku.”
22 Kapiyena sinapit i Jesus inay, tinampalan baggineno tata so guwardiyera na Templu a nakataddag sinay e kunna, “Bakkan si kunna sitan ino annabbagngu so katannangan a pari!”
23 Tinumabbag i Jesus sikwana, “Nu ana maral so sinapitku, taddannu! Udde nu gakkurug yo sinapitku, ammenak nad a tinampalan.”
24 Akkabalinna iyaw, nepaiyang i Anas i Jesus sike Caifas a katannangan a pari. I Jesus e nakasiggut kepay.
Neyambafagnga Imman i Pedro i Jesus
25 Sikwana a mappapatu i Pedro so karebbing na afuy, kundeno korwan ira sikwana, “Bakkang kad a disipulu naka pay inay a tolay?”
Udde neyambafag i Pedro a nakkun, “Bakkanak!”
26 Finuut pay baggineno tata so imbut ira na katannangan a pari a kawayyan keppay yo tolay a kinabbang i Pedro ino layagnga, “Bakkang kad ikkeno naitak a bulun i Jesus so pammulan ino kayuwera a Olibu?”
27 Udde neyambafag imman iyaw i Pedro e siddarat a nassirallok ino lalung.
Neyang i Jesus sike Pilato
28 Maggibat kepay sin neyangga i Jesus so dokal a balay i Gubernador Pilato a naggabwat so balay i Caifas. Udde ammera tinumallung so balayeno Gubernador, gumafu so gagangera a nu tumallung ira so balena bakkan a Hudyu, ammera dama a makiakkan so Fiyesta na Attalebad. 29 Antu nallawan i Pilato e kunna sikwara, “Nenay yo ipaliwat diyaw sitaw a tolay?”
30 Tinumabbag ino afu-afuwera na Hudyuwera, “Nu ammena a nalliwat, ammemi nad neyang sikwam.”
31 Antu kunna i Pilato sikwara, “Appan diyaw baggina e nunutan diyaw meantu so katunungan diyaw.”
Udde tinumabbag ino Hudyuwera, “Awan pakapangwami a mannunut si patay maski yanya a tolay. 32 Si kunna sinay, naparulot ino sinapit i Jesus meafu sin nepaginnana nu kasanna yo akkapatena.
33 Tinumallung imman i Pilato so balena e nepaayagnga i Jesus. Finuutna i Jesus, “Ikka kad yo Patul na Hudyuwera?”
34 Tinumabbag i Jesus, “Naggabwat kad iyan a fuutnu so nakammu onnu ana korwan a nassapit sikwam?”
35 Kunna i Pilato, “Hudyuwak kad? Na kalubbunannuwera anneno afu-afu a pariyera ino nangidawawa sikwam sitaw. Nenay kad yo liwatnu?”
36 Tinumabbag i Jesus, “Bakkan sito lubag yo pattangngalangku. Se nu sito lubag, dinefensandak nad yo disipuluk ira takesi ammek medawawa so Hudyuwera. Udde bakkan sito lubag yo pattangngalangku.”
37 Kunna i Pilato sikwana, “Nu kunna sinay, tataka antu a patul?”
Tinumabbag i Jesus, “Sinapitnun. Antuweyaw yo gafuna a neyanakak anna inangngak sito lubag takesi ipakaammuk ino kagakkuruwan. Maningngag sikwak inoyera a mangurug si kagakkuruwan.”
38 Fuut i Pilato, “Nenay yo kagakkuruwanna?”
Nasentensiyan i Jesus a Matay
Akkesapit iyaw i Pilato, nallawan baggina e kunna so afu-afuwera na Hudyuwera, “Awan maitak a liwatna. 39 Udde ana yo gagangeyu a kada Fiyesta na Attalebad a mangilawanak si tata fukuk. Kanggam diyaw kad a pallawanangkuweno Patul na Hudyuwera?”
40 Negirawara, “Bakkan iyan a tolay! I Barabbas ino kanggammi a ilawannu.” I Barabbas, tata tulisan a nangontra so gubyernu.