Neyannutna i Pilato a Mepatak i Jesus so Kurut
19
Antu nepaappana i Pilato i Jesus e nepalassitna so sundalunera. 2 Nangappeno sundaluwera si sinaasit a barasibit e inangwara a manilla korona a nesingatda sike Jesus. Binarasiyanda baggina si kulor ubi a tafál. 3 Iniyoyunganda baggina e kunda, “Mattolay, Patul na Hudyuwera!” E tinampa-tampalanda i Jesus.4 Nallawan imman i Pilato e kunna so Hudyuwera, “Itan diyaw, ipatallangkuna sikwayu takesi maammuwan diyaw a awan maitak a liwatna.” 5 E nelawan i Jesus a nasingattan si asit anna nabarasiyan si kulor ubi a tafál. Kunna i Pilato sikwara, “Itan diyaw iyaw a tolay!”
6 Akkeyita sikwaneno afu-afu a pariyera anneno guwardiyera na Templu, naggirawera, “Ipatak baggina so kurut! Ipatak baggina so kurut!”
Udde kunna i Pilato sikwara, “Appan diyaw baggina, ikkayun ino makaammu a mappatak sikwana so kurut, awan maitak a liwatna.”
7 E tinumabbag ino afu-afuwera na Hudyuwera, “Meantu so katunungammi, maawag a matay baggina se sapi-sapitanna a Anak baggina i Dios.”
8 Sin nadingngag i Pilato inay a sinapitda, natalawan ingke baggina. 9 Tinumallung imman so balena e finuutna i Jesus, “Taga-sintawka kad?” Udde ammena tinumabbag i Jesus. 10 Naffuut imman i Pilato sikwana, “Saay ammem a tumabbag? Ammem kad ammu a ana pakandamak a mappalubbak onnu mappapatak sikwam so kurut?”
11 Tinumabbag i Jesus, “Awan a pakandamam sikwak nu bakkan a neyadda sikwam i Dios, antu mas madammat ino liwat ino nangidawawa sikwak sikwam.”
12 Sin nadingngag iyaw i Pilato, annanot a kanggammannengke a palawanan i Jesus. Udde naggiraweno Hudyuwera, “Nu pinalawannu iyan a tolay, bakkangka a kolak i Emperador. Seanya yo massapit si patul baggina e mekontra so Emperador.”
13 Sin nadingngag i Pilato inay a negirawara, nepalawanna i Jesus so balena e inang nattuttud so attutturan na pannunutan so lugar a maayan si “Plataforma,” onnu Gabata so sapit na Hudyu. 14 Mattangnganawin sinoy so Aw na Pangiparan so Fiyesta na Attalebad e kunna i Pilato so Hudyuwera, “Iyaweno patul diyaw!”
15 Naggirawera, “Patayan baggina! Patayan baggina! Ipapatak baggina so kurut!”
Fuut i Pilato sikwara, “Kanggam diyaw kad a ipapatakkuweno patul diyaw so kurut?”
Tinumabbag ino afu-afu a pariyera, “Awan korwan a patulmi nu bakkan ino Emperador!”
16 Antu nedawawa i Pilato i Jesus sikwara tapenu mepatak baggina so kurut.
Na Akkepatak i Jesus so Kurut
Antu inappareno sundaluwera i Jesus. 17 Nepabuttungga sikwaneno kurutna paumang so lugar a maayan si “Lugar na Balangkag,” onnu Golgota so sapit na Hudyu. 18 Sinayeno nangipatakanda sike Jesus so kurut, bulunneno adwa a lallakiyera, tata so diwananna anna tata so dawirina.
19 Ana nepeturak i Pilato a nepeyekwana so kurut i Jesus a kunna, “I Jesus a taga-Nazaret, yo Patul na Hudyuwera.” 20 Neturak iyaw so sapit na Hudyu, Roma anna Griyego. Oddu a Hudyuwera ino nakabibbid se aranni so Jerusalem yo nangipatakkanda sike Jesus.
21 Antu inang ino afu-afu a pariyera sike Pilato e kunda, “Antataliyannuweno nepeturakngu a ‘Na Patul na Hudyuwera.’ Ipeturakngu, ‘Kunna iyaw a tolay, ikkanak yo Patul na Hudyuwera.’ ”
22 Udde tinumabbag i Pilato, “Na nepeturakku e ammenan maangkakwa.”
23 Sin nepatakdan i Jesus, inappeno sundaluwereno neyallungngera e binalle-ballera si appat, taggi-tatera. Inappara pay yo pang-unag a barasina, a awan dētna anna nasinnun si interu mamefu so uttun makiyad si dolam. 24 Antu nattataretabbag ira, “Ammetam pissayan, mangiyattu etam si namarkan a batuwera takesi maammuwantam nu yanya sikwatam ino makaappa.” Inayeno inangwara. Nakwa iyaw e naparulot ino neturak a sapit i Dios a kunna,
“Binalle-balereno neyallungkuwera,
anna so barasik, nangiyattuwera si namarkan a batuwera.”a
Kunna sinayeno inangweno sundaluwera.
25 Daggun, nakataddag so idagngeno kurut i Jesus ino inana anneno wayina a bafay, i Maria a atawa i Cleofas, anni Maria a taga-Magdala. 26 Sin naita i Jesus ino inana anneno iddu-iddukanna a disipulu a karebbing i inana, sinapitna, “Ina, ibilangngu baggina a anakngu.”
27 E kunna so disipuluna, “Ibilangngu baggina a inam.” Makiyad sinoy, so balayin ino disipulu a nagyan ino ina i Jesus.
Na Akkapatay i Jesus
28 Ammu i Jesus a nedemmuwen amminan. Antu takesi maparulot ino nakaturak a sapit i Dios, kunna, “Mawawak.”
29 Ana tata a pangekwanan sinay a napannu si malamak a binarayan. Antu nesosaweno sundaluwereno tata espongha so binarayan, newaggara so tata panga na hisopo e nepadappilda so bifig i Jesus. 30 Sin nasussup i Jesus ino binarayan, kunna, “Naparulotin!”
Naddomug e nakattang ino angatna.
Nasassak si Ladip ino Siwak i Jesus
31 Gumafu se sinoy e Aw na Pangiparan, amme kanggam ino Hudyuwera a magyan so kurut ino natayera makiyad so Aw na Aggimemmang gumafu se neduma inay a aw. Antu inarang ino afu-afuwera na Hudyuwera sike Pilato a ipakattuweno uffuwereno nepatak ira so kurut anna arin ino natayera. 32 Antu inang ino sundaluwera e kinattureno uffuwereno palungu a lalaki a bulun i Jesus e netufad ino meka-adwa a nepatak so kurut. 33 Udde sin anera so allangan i Jesus, ammeran kinattuweno uffunera se naitara a natayin baggina. 34 Imbes, sinassak si ladip ino tata sundaluweno siwak i Jesus e siddarat a nallifiyeno dā anna danum. 35 Na nakaita sitaweno nangipakaammu takesi mangurug kayu. Gakkurug yo pakaammuna e ammuna a kagakkuruwan ino sapi-sapitanna. 36 Nedemmu amminan iyaw takesi maparulot ino nakaturak a sapit i Dios a kunna, “Awan makattu si maski tata so tulangngera.”b 37 E ana kepay a neturak a sapit i Dios a kunna, “Munnakkandeno sinassakda.”c
Na Akkatanam i Jesus
38 Akkabalinna iyaw, inang i Jose a taga-Arimatea sike Pilato takesi arangnganneno baggi i Jesus. I Jose e tata disipulu i Jesus, udde ammena nepaammu so tolayera se mattalaw baggina so afu-afuwera na Hudyuwera. Neyannut i Pilato a appan i Jose yo baggi i Jesus. 39 Bulunna pay i Nicodemus. Baggineno tolay a inang sike Jesus si tata gafi. Nangikangkalin baggina si tallufulu a kilo a pabangug a mira anna aloed. 40 Inappareno baggi i Jesus e neyekwananda si pabangug sikwara a babba-babbattanda si mangina a sinnun meantu so gagangay na Hudyuwera. 41 Ana pammulan a aranni so nangipatakkanda sike Jesus. Ana bawu a pattanamman sinay a ammena kepay neyusa. 42 Gumafu se sinoy e bisperas na Aw na Aggimemmang anna gumafu se arannikeno pattanamman, netanamda i Jesus sinay.