Neyang i Jesus sike Pilato
23
Nattaddag ino interu a Sanhedrin e neyangga i Jesus sike Gubernador Pilato. 2 Pinefunanda a akusan baggina e kunda, “Nagafutammi iyaw a tolay a manawata-wataw so nonot na talubbunammiyera e iyallangnga kami a mappaga si biyenes so Emperador anna kunna kepay a Mesiya baggina a tata patul.”3 Finuutna i Pilato i Jesus a nakkun, “Ikka kad yo Patul na Hudyuwera?”
Kunna i Jesus, “Nasapitnun.”
4 Kunna i Pilato so afu-afu a pariyera anna so tolayera, “Awan maintarakangku a pakàakusan iyaw a tolay.”
5 Udde nelillinda a sinapit, “Megafu so tunturunera, sinussu-suwanneno tolayera a taga-Judea a maggulu. Nepefuna so Galilea e anen baggina sitaw.”
Netallang i Jesus sike Herodes
6 Sin nadingngag iyaw i Pilato, finuutna nu taga-Galilea i Jesus. 7 Sin naammuwanna a taga-Galilea i Jesus so lubbun a pattangngalan i Herodes, nepaiyangnga i Jesus sike Herodes a ana pay so Jerusalem sitan a tiyempu.
8 Mangga-anggam ingke i Herodes sin naitana i Jesus se nabayagin a kanggamma a maita baggina gumafu so naammuwannera meafu sikwana e innanamanna a maita i Jesus a mangwa si milagruwera. 9 Oddu a finuutna sike Jesus udde ammena tinumabbag. 10 Nattaddag ino afu-afu a pariyera anna mapoporay si katunungan e kurwengke yo pàakusara sikwana. 11 Kinakata-katawan anna iniyoyungan da Herodes anneno sundalunera i Jesus e binarasiyanda si makasta a sinnun a manilla tata patul. Akkabalinna, nepauli i Herodes baggina sike Pilato. 12 Sitan keppay a aw, da Herodes anni Pilato e makkolakkin se makkapakwera sinoy.
Nasentensiyan i Jesus a Matay
13 Nepaayag i Pilato ino afu-afu a pariyera, ino afu-afuwera na Hudyuwera anneno tolayera, 14 e kunna sikwara, “Netallang diyaw iyaw a tolay sikwak a manawataw so tolayera. Inimbestigangku baggina si presensiyayu e naammuwangku se awan kagakkuruwanneno akusayuwera metulyat sikwana. 15 Maski i Herodes, awan naitana a pakaliwatan i Jesus nabu nepaulina baggina sikwatam. Awan inangwana a pakapatayanna. 16 Kunnantu a ipalassitkuna lamangin baggina liyek a palawanan.” 17 [Kada rawun na Fiyesta na Attalebad, gagangay i Pilato a mappalawan si tata fukuk.]
18 Udde naggagarindan a naggiraweno tolayera, “Ipapatem iyan a tolay! Palawanannu i Barabbas!” 19 [Nefukuk i Barabbas gumafu so rebelyon so Jerusalem anna gumafu se nakapatay baggina.]
20 Gumafu so anggam i Pilato a mapalawan i Jesus, kinatetabbagnga imman ino tolayera, 21 udde negira-girawara, “Ipapatakngu baggina, Ipapatakngu baggina so kurut!”
22 Pillu a kinatetabbag ira i Pilato, “Saay, nenay yo nakaliwatanna? Awan ammuk a inangwana a pakegafuwan ino akkapatena. Ipalassitkuna antu baggina liyek a palawanan.”
23 Udde tattullot a naggiraweno tolayera anna nelillinda a mepatak i Jesus so kurut. 24 Antu naddesisyon i Pilato a iyaddaneno arangnganda. 25 Pinalawanneno tolay a nefukuk gumafu si parrebelde anna pammapatay. Nedawawana i Jesus sikwara takesi maangwareno kanggammanda.
Na Akkepatak i Jesus so Kurut
26 Sin neyaroyuweno sundaluwera i Jesus, nadafunggeno tata lalaki a minganan si Simon a taga-Siria a naggabwat so lawan na Jerusalem. Finuwaddanda baggina e netunda a akkitanneno kurut e dumandan sike Jesus.
27 Odduwengke tolay a dumaladandan sike Jesus mesapat yo bafabbayera a maraddam ingke anna massamba-sambalu se maallakkan ira sikwana. 28 Udde nilangngiyera i Jesus e kunna, “Ikkayu a bafabbayera a taga-Jerusalem, ammerak a tangitan udde tangitan diyaweno baggiyu anneno anak diyawera. 29 Dandamman diyaw iyaw, se dumatangngeno awera e sapitandana, ‘Mapiya i Dios so lupat ira, anna inoyera a ammena nanak, anna inoyera a ammena ingke nappasusu si abbing!’ 30 Gumafu si paddiriyatda sitan a tiyempu, arangnganneno tolayera si maddabbak ino kabakuluran se màaddilan ira anneno kadangutulan se matabbunan ira. 31 Se nu medemmu iyaw sikwak a inosente a tolay manilla maata a kayu a ammena taggabban ino tolayera, annanotinna sikwayu a sinaliwat a manilla nangu a kayuwera a nakaparan a mataggab.”
32 Nebulundeno sundaluwereno adwa kriminal a megindan sike Jesus a mapapatay. 33 Sin nakadatang ira so lugar a maayan si “Balangkag”, nepatakda i Jesus so kurut. Nepatakda pay yo adwa a kriminal, tata so diwananna anna tata so dawirina.
34 Kunna i Jesus, “Ama, pakomannuwera se ammera ammuweno akakwanda.”
E nangiyattu-attuweno sundaluwera si namarkan a batuwera tapenu pabbaballayandeno barasinera. 35 Anna nakataddag ino tolayera a nallangnga-langngad, udde iniyoyungan ino afu-afuwera na Hudyuwera baggina e kunda, “Nesalakngeno korwan ira e isalaknga penad ino baggina nu baggineno Mesiya a pinili i Dios!”
36 Iniyoyungan pay yo sundaluwera i Jesus e inaranniyanda anna inindanda baggina si maantam a binarayan. 37 E kunda kepay sikwana, “Nu ikkeno gakkurug a patul na Hudyuwera, isalakngu yo baggim ingkepay.”
38 Ana pay a neturak a newaggara so ulunan i Jesus a nakkun, “Antuweyaw yo Patul na Hudyuwera.”
39 Iniyoyungan ino tata nakapatak a kriminal i Jesus e ginirawanna, “Bakkang kad ikka i Mesiya? Isalakngu yo baggim ingkepay anna ikkami pay!”
40 Udde pinassapitanneno tata kriminal ino bulunna a kriminal e kunna, “Ammeka kad mattalaw sike Dios? Makkakakunna etam si akkastigu a matay! 41 Fustu lamang a makastiguwan etam si kunna sitaw gumafu so inangwatam, udde awan a maral a inangwana iyaw a tolay.” 42 Antu kunna, “Jesus, dandammannak nanu mattangngalka a tata Patul.”
43 Kunna i Jesus sikwana, “Gakkurug yo itunduk sikwam, sitoye mebulungkan sikwak si langita.”
Na Akkapatay i Jesus
44 Sin mattangnganawin, nallammuk so interu a lubag makiyad si alas tres si fuwab. 45 Nallammuk ino sinag anna nagadweno kurtina na Templub mamefu so uttun makiyad so dolam. 46 Dengke a nedemmu iyaw, naggirawa si madappa i Jesus e kunna, “Ama, italakkuweno angatku sikwam!” Akkasapitna iyaw e nakattangin ino angatna.
47 Sin naitaneno kapitan na sundaluwera nu nenayeno nedemmu, dinayawna i Dios e kunna, “Gakkurug ingke a awan liwatna iyaw a tolay!”
48 Sin naita amminan ino tolayera a nammu-ammung sinayeno amminan a nedemmu, nuliyera so balera a bayu-bayundeno taggangga gumafu so lownengke nakamda. 49 Udde amminan ino kadikkat a kolak ira i Jesus anneno bafabbayera a nebulun sikwana a naggabwat so Galilea a nakataddag so ammena kurwa aroyu e ita-itanda amminan a nededemmu.
Na Akkatanam i Jesus
50 Ana tata tolay a minganan si Jose a taga-Arimatea, tata lubbun so kalubbunan na Judea. Mapiya anna matunung baggina a tolay e minda-indag so pattangngalan i Dios. Maski nu tata baggina so Sanhedrin, 51 ammena inumannung so planu na bafulunnera anneno inangwara sike Jesus. 52 Inang baggina sike Pilato e inarangngeno baggi i Jesus. 53 Antu nedolam da Jose anneno korwan a bulunnera ino baggi i Jesus so kurut. Binabbattanda si furaw a sinnun a linu anna neyekwareno baggi i Jesus so pattanamman a naabbutan a batu a awan kepay a netanam sinay. 54 Biyernes sinoy e inayeno Aw na Pangiparan na Hudyuwera so Aw na Aggimemmang e aranniyen a mamefu.
55 Na bafabbayera a nebumbulun sike Jesus sinoy a naggabwat so Galilea e dinandananda i Jose e naitareno pattanamman anneno akkatanam i Jesus. 56 Antu nuliyera so balera anna nangiparan ira si pabangug ira anna lana a meyaffuryat so baggi i Jesus. Udde nimemmang ira so Aw na Aggimemmang meantu so katunungan i Moises.