Neyang i Jesus sike Pilato
27
Kadaddaramatanna, nattataretabbag ino amminan a afu-afu a pariyera anneno manannakam na Hudyuwera nu kasannara a mapapatay i Jesus. 2 Na guwardiyera e siniggutandeno kamatnera i Jesus anna neyangga baggina sike Pilato a Gubernador na Roma.Na Akkapatay i Judas
3 Sin i Judas a nattraydor sike Jesus e naammuwanna a nasentensiyan i Jesus a matay, naimammatanna a maral ino inangwana nabu netolineno tallufulu pirasu a pirak a diplata so afu-afu a pariyera anneno manannakam na Hudyuwera. 4 Kunna, “Nakaliwatak! Nedawawak a mapapatayeno tata tolay a awan maral a inangwana.”
Udde kunda sikwana, “Nenay yo pakimetemmi sikwam? Makaammuka si baggim ingkepay!”
5 Netappol i Judas ino tallufulu pirasu a diplata a pirak so Templu. Akkabalinna, nanaw baggina e inang nappattal.
6 Na afu-afu a pariyera e inannamdeno pirasuwera diplata a pirak e kunda, “Iyaw a pirak antu yo pageno angat ino tata tolay. Ammena meyannut a maimfunan iyaw so pangiyekwanan si pirak so Templu.” 7 Akkabalinda a nattataretabbag, kunda a usandeno pirak tapenu gatangandeno lubag na gumàangwa si buwod ira anna akwanda si pattanamman para so ipping ira a matay so Jerusalem a awan lugar a pakaitanammanda. 8 Antuweyaw yo gafuna nu saay makiyad sitoye e pinangananda inay a lugar a “Lubag na Dā.”
9 Antu naparulotin ino neturak i profeta Jeremias a kunna, “Inappareno tallufulu pirasu a pirak a diplata, ino balor a nattaretabban na Israelitera a pageno angatna. 10 Neyusareno pirak takesi gatangandeno lubag na gumàangwa si buwod ira. Antuweyaw yo nedundun i Afu Dios sikwak.a”
Inimbestiganna i Pilato i Jesus
11 Sikwana a nakataddag i Jesus so allangan i gubernador Pilato, finuutna i Jesus, “Ikka kad yo Patul na Hudyuwera?”
Kunna i Jesus, “Nasapitnun.”
12 Udde sin ino afu-afu a pariyera anneno manannakam na Hudyuwera e inakusanda baggina, ammena tinumabbag. 13 Antu sinapit i Pilato sikwana, “Ammem kad a madingngag ino kaodduneno akusarera sikwam?”
14 Udde ammena tinumabbag i Jesus maski tata nad lamang so pammaliwatda sikwana, antu nalaggat ingkeno gubernador.
Nasentensiyan i Jesus a Matay
15 Kada Fiyesta na Attalebad, gagangay i Gubernador Pilato a mappalawan si tata fukuk a piniliyeno tolayera. 16 Sitan a tiyempu, ana mammannag a maral a fukuk a minganan si Jesusb Barabbas.
17 Antu sin nammu-ammung ino tolayera, finuutna i Pilato sikwara: “Danya yo kanggam diyaw a palawanangku? I Jesus Barabbas onnu i Jesus a minganan si Mesiya?” 18 Finuut iyaw i Pilato se ammuna a mafuweno manannakam na Hudyuwera nabu nedawawara i Jesus sikwana.
19 Sin mattuttu-tuttud i Pilato so lugar a pangipakaammuwanna si pannunutna so tolayera, nanundun ino atawana a mangitundu sikwana, “Ammeka makimete sitan a tolay se awan maral a inangwana. Nadiyatanak ingke sin gafi so tenapku meafu sikwana.”
20 Udde yo afu-afu a pariyera anneno manannakam na Hudyuwera e sinussuwandeno tolayera tapenu arangnganda sike Pilato a palawananna i Barabbas anna ipapatena i Jesus. 21 Naffuut imman ino Gubernador sikwara, “Danya yo kanggam diyaw a palawanangku para sikwayu?”
E kunda, “I Barabbas!”
22 Kunna i Pilato sikwara, “Nenay antu kanggam diyaw a akwangku sike Jesus a minganan si Mesiya?”
Kunda amminan, “Ipapatakngu baggina so kurut!”
23 Finuutna i Pilato sikwara, “Saay? Nenay yo nakaliwatanna?”
Udde tattullot a naggirawera, “Ipapatakngu baggina so kurut!”
24 Antu sin maita i Pilato a awanin a makwana anna maginnana a mamefuwen ino gulu, nangappa baggina si danum e binagguwanneno kamatna so allangan na tolayera a nakkun “Awan a karguk so akkapatena iyaw a tolay. Makaammu kayu.”
25 Tinumabbag amminan ino tolayera e kunda, “Ikkami anneno anakmiyereno manabbagnga meafu so akkapatena.”
26 Antu pinalawanna i Barabbas. Kapiyena pinalassit i Jesus, nedawawana so sundaluwera takesi ipatakdana baggina so kurut.
Na Sundaluwera e Pinadiyatanda i Jesus
27 Liyera ipatak ino sundaluwera i Jesus so kurut, neyangga baggina so lagwerta na dokal a balayeno gubernador e naammung ino interu batalyon na sundaluwera so pallebutanna. 28 Nilubbungandeno makan-lawan a barasina e binarasiyanda baggina si asoddag a malibaga a tafál. 29 Nangappera si sinaasit a pangera e inangwara si manilla singat anna nepotunda so uluna. Nepaibbaldeno tata runu so diwanan a kamatna. Nammalitud ira so allanganna e iniyoyunganda baggina. Kunda, “Mattolay! Patul na Hudyuwera!” 30 Niluppa-luppanda baggina, inappareno runu anna Pinompo-pompoldeno uluna. 31 Kapiyera a iniyoyungan i Jesus, inarireno tafálna e binarasiyanda keppay baggina anna nelawanda baggina so lubbun tapenu mepatak so kurut.
Na Akkepatak i Jesus so Kurut
32 Sin aneran so lawan na Jerusalem, naitareno tata lalaki a minganan si Simon a taga-Siria. Tinunanda a akkitanneno kurut a buttu-buttungan i Jesus. 33 Dinumatang ira so lugar a maayan si Golgota, kanggamma sapitan “Na lugar na Balangkag.” 34 Inindanda i Jesus si binarayan a nalamuran si adu, udde sin natantamanna, ammena ininum.
35 Sin nepatakda i Jesus so kurut, nabbaballayandeno barasina si pangiyattu si namarkan a batuwera. 36 Nattuttud ira sinay a magguwardiya sikwana. 37 So kurut, neturak so ulunanna yo nepaliwatda metulyat sikwana, “Iyaw i Jesus a Patul na Hudyuwera!”
38 Ana pay adwa a gumakkokot a nepatak so kurut karebbing i Jesus, tata so diwananna anna tata so dawirina.
39 Massipitta inoyera a nattalebad, mawwarakkiwak ira a nakkun sikwana, 40 “Kunnu se darallannuneno Templu anna pataddaggannuna keppay si tallu aw. Nu ikkeno anak i Dios, isalakngu yo baggim ingkepay anna dumolamka so kurut!”
41 Iniyoyungan pay yo afu-afu a pariyera, ino mapoporay si katunungan anneno manannakam na Hudyuwera i Jesus. 42 Kunda, “Nesalakngeno korwan ira udde ammena mesalak ino baggina ingkepay. Baggina kanuweno Patul na Israelitera? Nu dumolam baggina sitoye so kurut, mangurug etam sikwana. 43 Mattalak baggina sike Dios se kunna, ‘Anakngak i Dios.’ Itantam nu kanggam i Dios a isalak naka sitoye!”
44 Anna iniyoyungan baggineno adwa a bulunna a nepatak pay so kurut.
Na Akkapatay i Jesus
45 Mamefu so tangnga na aw, nallammuk so interu a lubag makiyad si alas tres si fuwab. 46 Sin alas tres si fuwab, naggirawa si madappa i Jesus a nakkun, “Eloi, Eloi, lama sabaktani?” kanggamma sapitan, “Diosku, Diosku, saay se pinurayannak?”c
47 Anna sin nadingngag ino korwan a tolayera a ana sinay, kunda, “Dingngaggan diyaw, aya-ayanna i profeta Elias!” 48 Siddarat a tata sikwareno nakkarantut a inang nangappa si espongha e nelappadna so maantam a binarayan, neyagwana si surrut anna nepasussupna sike Jesus.
49 Udde yo sinapit ino korwan ira, “Bulang kayu, itantam nu dumatangnga i profeta Elias a mangisalak sikwana.”
50 Antu naggirawa si madappa imman i Jesus e nakattangin ino angatna.
51 Sinoyin a orat napissayeno kurtina na Templud mamefu so uttun makiyad so dolam. Nallunig anna naguremak amminan ino batuwera. 52 Anna nabbukkat ino korwan a pattanamman anna oddu a baggi na tolayera i Dios a natayin e nantotolay. 53 Kapiyena nantotolay i Jesus, nallawan ira so pattanamman e inang ira so Jerusalem ansa a tata lugar a meyaparte para sike Dios anna oddu a tolayera a nakaita sikwara.
54 Natalawan ingkeno kapitan anneno sundaluwera a magguwardiya-guwardiya sike Jesus sin naginnareno lunig anna naitara amminan a nedemmu. Kunda, “Gakkurug ingke a Anak i Dios iyaw a tolay!”
55 So ammena kurwa aroyu, makaita-ita pay sinayeno oddu a bafabbayera so nededemmu. Mamefu so Galilea, nebulun ira a nasserbi sike Jesus. 56 Bulunda i Maria a taga-Magdala, i Maria a inara Santiago anni Jose, anneno inara Santiago anni Juan a anak ira i Zebedeo.
Na Akkatanam i Jesus
57 Sin gafiyenin, dinumatang i Jose a taga-Arimatea, tata dammak anna disipulu pay i Jesus. 58 Inang baggina sike Pilato e inarangngeno baggi i Jesus. Nangitun i Pilato a iyadda iyaw sike Jose. 59 Antu inappa i Jose anneno bulunnera yo baggi i Jesus e binabattanda si bawu a malinis a sinnun a linu. 60 Neyekwareno baggi i Jesus so tata pattanamman a naabbutan a batu a ammena kepay neyusa. Akwana iyaw i Jose. Akkabalinna, nedaroliggeno tata dokal a batu tapenu maserran ino pattallungan na pattanamman liyera nanaw. 61 Ana sinay da Maria a taga-Magdala anneno tata kepay a Maria a nattuttud so allangan na pattanamman i Jesus.
Naguwardiyan ino Pattanamman i Jesus
62 Sin tumuntufad a aw akkabalinneno Aw na Pangiparan, nabbuburulun a inang ino afu-afu a pariyera anna Fariseowera sike Pilato. 63 Kunda, “Afu, madandammi iyan a impostor sin natolay kepay baggina, kunna a mantotolena baggina so meka-tallu aw. 64 Kunnantu, idundunnu a maguwardiyan si fustuweno pattanamman makiyad si meka-tallu aw tantaro kokotan na disipuluwera yo baggina anna itundurana so tolayera a nantotolay i Jesus. Se nu kunna sitan ino medemmuna, iyaw a pangilloku e mas karallan ammat so palungu a pangillokuna a baggineno Mesiya.”