Na Angwera na
Apostol ira
Netambeno Espiritu i Dios
1
Teofilo, so palungu a libruk sikwam, neturakku sikwam ino amminan a inangwa i Jesus anneno netunturuna mamefu so palunguna 2 makiyad so aw a inappa i Dios baggina si langit. Udde liyena netullu baggina si langit, nangadda baggina si pannunturuwera megafu so paggiya i Espiritu i Dios so apostolnera a pinilina. 3 Akkabalinna a nassufri anna natay so kurut, nantotolay baggina. Si appat a fulu a aw, nappadda i Jesus so disipulunera anna nepruwebana sikwara si oddu a pangwera a nantotolay baggina. Sitan a tiyempu, tinunturuwannera meafu so pattangngalan i Dios so tolenera.Tinunanna i Jesus ino Disipulunera a Mindag sike Espiritu i Dios
4 Tata aw sin bulun i Jesus ino disipulunera a mangnga-angngan, tinunannera a ammera manaw so Jerusalem udde mindag ira makiyad si iyaddanana i Ama sikwareno espirituna a netambana sikwara. Kunna i Jesus sikwara, “Antuweyaw yo netunduk sikwayu sinoy, 5 se binawtismuwanna i Juan ino tolayera si danum udde ammena nabbayag e mabawtismuwang kayuna si Espiritu i Dios.”
Na Pattullu i Jesus si Langit
6 Anna sin nammu-ammung imman da Jesus anneno apostolnera, finuutda baggina, “Afu, iyawin kad yo tiyempu a itolim imman ino pattangngalan ino taga-Israel ira?”
7 Tinumabbag i Jesus, “I Amak pelamang yo ana pakandamana a mappili si fetsa anna tiyempu onnu maddesisyon nu nainsa a medemmuna iyawera. Ammeyu maawag a maammuwan iyawera. 8 Udde nanu sigigyanneno Espiritu i Dios sikwayu, makaarasaw kayuna si pakapangwa a maggabwat sike Dios. Ikkaneno testigu so kagakkuruwan meafu sikwak so Jerusalem, Judea anna Samaria anna so amminan a lubbu-lubbun sito talubaggan.”
9 Sin sinapit iyaw i Jesus, netullu baggina si langit sikwara a nangibali-balin a mattanga-tangaw sikwana makiyad si nalembangngan si dulam. 10 Dengke a metullu-tullu baggina si langit anna nebali-balinda a mattanga-tangaw sikwana, lannat a ana adwa a lalaki a nakabarasi si furaw a nattaddag so karebbingga. 11 Kunda, “Ikkayu a taga-Galilea, saay se makatanga-tangaw kayu si langit? I Jesus a netullu si langit e mulina si kakunna keppay yo naitayu a pattulluna si langit.”
Napiliyeno Tali i Judas
12 Antu nanaweno apostol ira so Dangutul na kakayuwan a Olibu e nuliyera so Jerusalem. Tata kilometro yo kaaroyuna iyaw a dangutul so Jerusalem. 13 Sin dinumatang ira so Jerusalem, inang ira so makan-uttun a kwartu na balay a pagyananda. Inoyera a nammu-ammung e da Pedro, Juan, Santiago, Andres, Felipe, Tomas, Bartolome, Mateo, Santiago a anak a lalaki i Alfeo, Simon a pinangananda si Makalubbun a mangikalow so lubbunna, anni Judas a anak a lalaki i Santiago. 14 Amminan ira e maumid a maddasa-dasal bulundeno korwan a bafabbayera anni Maria a ina i Jesus anna pay yo wawwayinera a lalaki. 15 Tata aw, ana mattatut anna adwafulu a minangikkurug ira a nammu-ammung e nattaddag i Pedro a nakkun, 16 “Wawwayi, maawag a maparulot ino sapit i Dios a neturak i David megafu so paggiya i Espiritu i Dios patamu sike Judas a nangigiya so inoyera a naggafut sike Jesus. 17 Nebilang baggina a bulummi a manuffun so asserbimi.”
18 Napagan i Judas so pattraydorna sike Jesus. Neyusaneno piraknga a paggatangnga si lubag. Nappakamatay i Judas e nadannag a pautuk so lubag e nabattak ino kuyungnga anna nallawan ino sinena. 19 Naammuwan ino taga-Jerusalem ira yo nedemmu sikwana antu pinanganandeno lubag si sapitda a Hakeldama a kanggamma sapitan e ‘Lubag na Dā.’
20 Kunna kepay i Pedro,
“Neturak i David siin nabayag a tiyempu so libru na Salmo patamu sike Judas,
‘Na balena e awaninna nagyanna anna awaninna a migyan sinay.’a
Ana kepay yo neturak a kunna,
‘Ana nad metali sikwana so maawag a akwanna.’b
21 “Maawagtam a mappili si katali i Judas. Na pilintamma e tata nad a namumbulun sikwatam sin ana i Jesus sikwatam, 22 mamefu so bawtismu i Juan makiyad so tiyempu a netullu i Jesus si langit. Seanya yo napili e mebulunna sikwatam a tata testigu so panantotolay i Jesus.”
23 Antu nabbangngat si adwa a ngan ino apostol ira anneno korwan a minangikkurug ira, i Jose Barsabas a naayan si Justus anni Matias. 24 Naddasal ira si kunna sitaw, “Afu Dios, gumafu se ammum ino nonot na amminan a tolayera, ipakaammum sikwami nu yanya yo pinilim, 25 takesi mattabali si apostol a masserbi so maawag a akakwan i Judas a inanawanna sin inang baggina so lugar a keyannunganna.” 26 E nangiyattuwera si namarkan a batuwera tapenu maammuwan nu yanya sikwareno mapilina. Napili i Matias e nedagga baggina so adwafulu tata apostol ira.