Na Turak i Pablo so
Taga-Roma
Meafu Sitaw a Libru
Iyaw a turak e neturak i Pablo so taga-Roma a mangurug sike Jesus. Na gakkadna a matturak e mebarifit sikwara patamu so planu i Dios a matabbut ino tolayera. Na kainteruwan na kabukallan a yo kanggamma sapitan e ana so Roma 1:16-17 a antu yo kunna i Dios a ibilangngeno tolayera a matunung si aggitana megafu si angngurugga sike Jesu Kristo. Natturak pay i Pablo a kanggamma a maitera anna tunturuwannera liyena umang so Espanya. Kanggamma pay a marang si duffunda si asserbina sike Dios so Espanya.
Kunna i Pablo a amminan a tolayera, Hudyuwera onnu bakkan a Hudyuwera e nalliwat metulyat so katunungan i Dios. Na ammakomeno liwa-liwat na tolayera e maangwa lamang si gakkurug a angngurug sike Kristo bakkan si pakimoray si katunungan. Nassapit pay i Pablo meafu si mapiya a akkatolay a bulun i Kristo megafu si ammakoma na liwa-liwatda. Na minangikkurug ira e neyantotoliyen sike Dios anna si pakapangweno Espiritu e nalibreyen si pakapangwa na liwat anna patay. So kapitulu lima makiyad si walu, netundu pay i Pablo ino gakkad na Katunungan i Dios anneno pakapangwa na Espiritu i Dios so akkatolay na tata a minangikkurug. Kunna pay a ana planu i Dios patamu so Hudyuwera anna bakkan a Hudyuwera. Kunna a megafu so pammay na Hudyuwera sike Jesus, naammuwan ino bakkan a Hudyuwera a yo pannabbut e megafu si angngurug sike Jesu Kristo. Nangurug i Pablo a yo pammay na Hudyuwera sike Kristo e bakkan a amu-amu.
Neturak i Pablo nu nenay yo fustu a akwan ino minangikkurug metalwaring si aggidduk si siggatatan. Nassapit pay baggina nu kasannara a serbiyan i Dios anna makimorayera penad so afu-afurera. Pinattetabbanna payeno fuut ira meafu si maakkan ira anna si Aw na Aggimemmang a pakadamuruwan ino korwan a grupu so Roma.
Nabalin yo turak meafu so paddayawna sike Dios anna nu nenay kanggamma sikwara a idasallan.