I Pablo so Malta
28
Sin nakadutung kamin si mapiya, naammuwammi a Malta yo ngan yo fugu. 2 Mapiya yo nepaita sikwamiyeno tolayera sinay. Nassigiyera e inimbitan dakami a mappapatu si baggimi gumafu se mura-uran anna malabbat ingke. 3 Nampat i Pablo si kayuwera a itunguna e lannat a nallawan ino tata nagita a iraw gumafu si patu anna tinukkawneno kamat i Pablo. 4 Sin naiteno taga-Malta a nakabassin ino iraw so kamat i Pablo e kunda a siggatatan, “Gumappatay iyaw a tolay! Ammena a natay so bebay, udde ammena ke iyannut ino gumannunut a matolay kepay baggina.” 5 Udde winawwag i Pablo ino iraw so afuy e awan a nedemmu sikwana. 6 Inindagganda a lumattag ino baggi i Pablo onnu siddarat a matay, udde awan nedemmu sikwana, nangangkakweno nonotda e kunda a tata dios i Pablo.7 Aranni sinay a lugar ino tolayera, ana korwan a lubag ira a akwa i Publio a afu-afu sitan a fugu. Inimbitan nakami a umang magyan so balena anna tinabbudneno maawagmi si tallu aw. 8 Nekanna a makkulikug anna mappurusuput ino ama i Publio. Tinumallung i Pablo so kwartu na matakit e akkabalinna iyan naddasal baggina. Nepotunneno kamatna e nammapiyen baggina. 9 Akkabalinna iyaw a nedemmu, inang amminan ino korwan a matakit ira sike Pablo e nammapiyera. 10 Inindan dakami si regaluwera anna korwan a kiya-kiyan a maawagmi a mangipaita a dokal ingkeno pangilawara sikwami. Akkabalinna tallu a dakkag sin manaw kamin, inindan dakami si akkanammi anna nu nenay yo maawagmi so biyahemi.
Dinumatang i Pablo so Roma
11 Akkabalinna tallu dakkag, nallayad kami si bapor a naggabwat so Alejandria a nagyan so fugu na Malta si tiyempu na labbat. “Siping a Sasan-dios ira”a yo ngan iyaw a bapor a naggabwat so Alejandria. 12 Ginumaddang kami so Siracusa e nagyang kami sinay si tallu aw. 13 Nebali-balimmi a naddoyug e nakadatang kami so lubbun na Regio. Si kadaddaramatanna, nalleled a naggabwat so taggappan e nakadatang kami so Peutoli si unagnga adwa aw lamang. 14 E nakaita kami si minangikkurug ira sinay e inimbitan dakami a magyan sinay si talingguwan. Mamefu sinay e nakadutung kami so Roma. 15 Naammuwan na minangikkurug ira a nagyan so Roma a dumatang kami e dinafung dakami. Antu inang ira so Foro de Apio anna so Tres Tabernas takesi dafungan dakami. Sin maitera i Pablo, nappabala-balat baggina sike Dios anna nattuyag pay yo nakamma.
I Pablo so Roma
16 Paddatangmi so Roma, neyannut sike Pablo a magyan si balay a baggina ingkepay udde ana ingke lamang a sundalu sinay a magguwardiya sikwana. 17 Akkabalinna tallu aw, inimbitan i Pablo ino afu-afuwera na Hudyuwera sinay a lugar. Sin nammu-ammung iran, kunna sikwara, “Wawwayik, awan inangwak a metulyat so kakunnatam a Hudyuwera, udde ginafutdak so Jerusalem anna nedawawarak so Romanowera. 18 Inimbestigandak ino Romanowera e kanggamdak a ilubbak gumafu se ammura a awan inangwak si maral a maawag a mapapatayak. 19 Udde kinontra yo afu-afuwera na Hudyuwera a mallawanaknga, antu nafuwersaak a makiyapila sike Emperador maski nu awan a pammaliwat metulyat so katalubbunangkuwera. 20 Antu gafuna a inarangku a maita takayu anna makatetabbag takayu, nefukukak gumafu se mangurugak sike Mesiya a antu yo inanama na Israelitera.”
21 Antu a sinapitda sike Pablo, “Awan naarasomi a turak a naggabwat so Judea meafu sikwam. E awan kepay sinapit ino kakunnatam a Hudyuwera a naggabwat sinay so maral a inangwam. 22 Udde kanggammi a dingngaggan ino sapitannu, se ammumi a maski sintaw a tolayera e massapi-sapit metulyat so grupuyu a dumandan sike Jesus.”
23 Nappili si aw a massosoronnung da Pablo anneno Hudyuwera. Sitan a aw, odduwengke a dinumatang a Hudyuwera so balay i Pablo. Mamefu si daddaramat makiyad si gafi a mangibarifit sikwara so pattangngalan i Dios. Neyusaneno katunungan ira i Moises anneno neturak ira na profetera takesi angga-anggammannera a mangurug sike Jesus. 24 Nangurug ino korwan a Hudyuwera so sinapitna udde amme nangurug ino korwan ira. 25 Antu ammera inumannung a siggatatan e nanawera akkabalinna a sinapit iyaw i Pablo a nakkun, “Gakkurug ingkeno sinapitna i Espiritu i Dios so aggidiyafuwan diyawera. Sinapitna iyawera a sapit sike profeta Isaias e kunna,
26 ‘Maski maddingnga-dingngag ira, ammera ke maintindiyan.
Maski maita-itara, ammera ke kurug a maimunuwan.’b
27 ‘Sapitangku iyaw gumafu se madiyat ira a makatunturu.
Ana layagga udde ammera kanggam a maningngag,
ikiddamdeno matara gumafu se ammera kanggam a maammuwan ino gakkurug a mededemmu.
Nu ammera nad iyaw a inangwa, tantaro maintindiyandeno akakwangku,
anna nu gakkurug a maningngag ira,
maintindiyandak si mapiya.
Mabboboliyera e pakomangkuwera.’ ”
28 Sinapit kepay i Pablo sikwara, “Kunnantu, kanggammangku a maammuwan diyaw a nedundun i Dios so bakkan a Hudyuwera iyaw mensahe meafu nu kasannana a tabbutan ino tolayera anna maningngagngera.” 29 [Kapiyena sinapit iyaw i Pablo, nanaweno Hudyuwera e mattitinnulyat ira kepay.]