Nallayad i Pablo Paumang so Roma
27
Sin dinumatangngin ino aw a umang kami so Italya, nepatangngalda i Pablo anneno korwan ira a fukuk sike Julio, tata kapitan na sundaluwera na Romano a maayan si, “Sundaluwera na Emperador.” 2 Nattakay kami si tata bapor a naggabwat so Adramicio paumang so kalubbunan na Asia. Bulummi i Aristarco a taga-Tesalonica a lubbun na Macedonia.3 Si kadaddaramatanna, dinumatang kami so Sidon. Tinaratuna i Julio i Pablo si mapiya e neyannutna iyaw a makagannon so kolakngera takesi maduffunanda baggina so maawagngera. 4 Antu nanaw kami so Sidon, udde gumafu se patulyat ino matuyag a leled sikwami, nallayad kami so Cyprus a paumang so tafik a awan matuyag a leledna. 5 Dinammangmiyeno bebay a aranni so Cilicia anna Pamfilia. Dinumatang kami so Mira, tata lubbun na Licia. 6 Nakatumpal sinayeno kapitan na sundaluwera si bapor a naggabwat so Alejandria a paumang so Italya a antu yo nattakayammi.
7 Mabayag yo paddoyugmi. Nabbayag iyaw si oddu a aw e nadiyatang kami liyemi a makadutung so batug na Cinido. Mamefu sitaw e ammemi madammang ino kawayang na bebay gumafu se patulyat kami so leled. Antu inang kami so silawan na Creta aranni so Salmone a ammena kurwa malleled. 8 Napadiyatang kami a nanappit so idag na Creta makiyad si madutungmiyeno lugar a maayan si Mapiya a Paggaddangan na Bapor ira aranni so lubbun na Lasea.
9 Aroddagin na tiyempu a maddoyu-doyug kami. Mapeligruwen ino mattuluy gumafu se sinay a tiyempu na dawuna e maumirin a mabbagyu so bebay. Antu tinabarangngan ira i Pablo e kunna, 10 “Bulungkuwera, ammuk a mapeligru yo mabbapor sitoye, anna damana a oddu madaral a kargatam anneno bapor anna mappeligru maski yo angattam.” 11 Udde amme nangurug ino kapitan na sundaluwera so sinapit i Pablo. Imbes, kinurugngeno sinapit ino kapitan na bapor anneno makan-akwa so bapor. 12 Gumafu se yo pangigaddangan so bapor e ammena makasta a pagyanan ino bapor si tiyempu na labbat, kaodduwan so tolayera a nallayad e kanggamda a manaw sitan a lugar. Inanamanda a makadutung ira so Fenix a antu yo pagyananda si tiyempu na labbat. Na Fenix e lubbun so fugu na Creta. Iyan a pangigaddangan si bapor e nakatallang so diraya-taggappan anna dilod-taggappan.
Na Bagyu so Bebay
13 Sin ana leled a naggabwat so taggappan, arig ino tolayera a damaran a ibalin a maddoyug paumang so Fenix. Antu neyuttundeno angkla na bapor e nanappit ira so Creta. 14 Udde ammena nabayag, nalleled si matuyag a naggabwat so Creta. 15 Nilabbed ino matuyag a leled ino bapor. Gumafu se madiyatan ino bapor a umang so pattamuwanna iyaw, pinurayammi a mappadandan lamangin so leled. 16 Nallayad kami so diraya na bisang a fugu a minganan si Cauda. So fugu a maprotekta sikwami so leled, netappatmi si mapiya yo bisang a barangay a negonggon so likud na bapor, udde madiyat a akwan iyaw. 17 Sin neyuddureno bisang a barangay, nilufiddeno bapor se katalora tantaro a sumassad ino bapor so karatan ira na Sirte, antu a nedolamdeno layad e nappaanud kami lamangin.
18 Si kadaddaramatanna, matuyag kepay yo bagyu antu netappoldeno kargera na bapor. 19 Si tumufad kepay a aw, e netappoldeno rumentera na bapor. 20 Oddu a awera a ammemi naiteno sinag onnu yo bitun ira anna ammena pay umibba-ibbat ino matuyag a leled, antu naawanang kami si inanama a matolay kami kepay.
21 Akkabalinna a nabayag a tiyempu a awan inakka-akkan ino tolayera so bapor, nattaddag i Pablo so allangammi e kunna, “Wawwayik, nu nangurug kayu nad so sinapitku a ammetam manaw so Creta, ammetam nad a nadiyatan anna nadarallan. 22 Udde sitoye, patuyaggan diyaweno nakam diyaw, gumafu se awan a matay sikwayu, ino bapor pelamang yo madaral. 23 Sin gafi, inang ino anghel i Dios sikwak a paannungangku anna paddayawangku, 24 e kunna, ‘Ammeka mattalaw Pablo, maawag a tumallangka sike Emperador. E maipegafu sikwam, isalak i Dios ino katakayannuwera so bapor.’ 25 Antu wawwayik, patuyaggan diyaweno nakam diyaw gumafu se mangurugak sike Dios a gakkurug a medemmuweno amminan meantu so sinapit na anghel sikwak. 26 Udde mesassad ino baportam si tata fugu e madaralna.”
27 So meka-tafulu appat a gafi, mepalle-palled kepay yo bapor so Bebay Adriatico. Sin mattangngen yo gafi, naimunuwan ino marineruwera a paaranni kamin so tata fugu. 28 E ginukudda yo karollam na danum e naammuwanda a appat a fulu a metruweno karollamma. Akkabalinneno pigya orat, ginukudda imman e naitara a tallufulu metru lamangin ino karollamma. 29 So talaweno marineruwera a sumassad ino bapor so kabatuwan, nedannaggeno appat a angkla so danum e naddasal ira a parennad si màawin. 30 Kanggamdeno marineruwera a anawan ino bapor antu nedassaggeno barangay so bebay e nassasan ira a mangidassag si angkla so ulunan na bapor. 31 Udde kunna i Pablo so kapitan anna so sundaluwera, “Nu ammena mabattang ino marineruwera so bapor, awan mesalak sikwatam.” 32 Antu kinattang ino sundaluwereno lufid ira na bisang a barangay e pinurayanda a madannag iyaw so danum.
33 Sin màawin, sapi-sapitanna i Pablo sikwara amminan a mangngan iran. Kunna, “Tafulu appat a awin sitoye a amme kayu a mangnga-angngan gumafu si pakaburungan. 34 Antu a mangngang kayun takesi mattuyag kayu e awan a maral a mededemmu sikwayu.” 35 Kapiyeyaw a sinapit i Pablo, nangappa baggina si tinapay, nappabalat sike Dios so allanganda amminan. Ginadwaneno tinapay e nangngan. 36 Nattuyag amminan ino nakamda e nangngan ira pay. 37 Adwatut, pitufulu annam amminan ino nattakay so bapor. 38 Sin nabattug ira amminan, netappolda so bebayeno amminan a kargara a trigu takesi mallampaweno bapor.
Na Akkadaral na Bapor
39 Sin maggibattin, ana nedipadda a lubag, udde amme ammuweno marineruwera nu nenay iyaw a lugar. Udde nakaitera si dappit e nattaretabbanda a itamuweno bapor sinay nu damana. 40 Antu a kinattanggeno lufid so angkla e nebattangga iyawera so bebay. Anna inuttarandeno lufid ira na tagwan. Akkabalinna, netullureno binta a ana so ulunan na bapor takesi ituyyud na leled ino bapor so dappit. 41 Udde nesassad ino bapor liyena makadutung so dappit. Nelallam ino ulunan na bapor antu ammenan makaguyu. Na likud pay yo bapor e nadaral gumafu si matutuyag a palung.
42 Sitoye plinanu na sundaluwera a papatayandeno amminan a fukuk ira takesi awan a makatalug anna makatamang sikwara. 43 Udde kanggamma kapitan a isalak i Pablo antu a ginaggaddanneno sundaluwera so planura a akwan. Imbes, pinalattuna so danum ino amminan a makatalug takesi makadutung ira so dappit. 44 Anneno korwan ira e netunna a gumafut ira si tablera onnu so nadaral a parte na bapor. Kunna sitaweno pakkadutungmi so dappit a awan maral a nedemmu sikwami.