Naddefensa i Pablo so Allangan i Patul Agripa
26
Kunna i Agripa sike Pablo, “Damamun a mabid. Nenay masapitnu meafu si baggim?” Neyuttun i Pablo ino kamatna e nabid takesi defensanneno baggina ingkepay.2 “Patul Agripa, ibilangku a dokal a kadayawan a madingngag diyaweno paddefensak si baggik ingkepay metulyat so amminan a pammaliwat na Hudyuwera sikwak. 3 Gumafu se ammum ingkeno gagangayera anna pattitinnulyat ino Hudyuwera, arangngangku a pappasensiyannak a dingngaggan.
4 “Amminan a Hudyuwera e ammura nu kasanna yo akkatolek makiyad si akkabbingku so lubbungku ingkepay anna so Jerusalem. 5 Se odduwengke a rawunin a ammurak, nu kanggamda, taddandana a neyannungak so Fariseowera, tata istriktuwengke a sekta na relihiyommi. 6 E sitoye, mattaddagak sitaw a maimbestigan gumafu se inanamangkuweno tamba i Dios so aggidiyafuwantam ira. 7 Antuweyaw yo tamba a innanaman na amminan na tafulu adwa a tribuwera na toletam ira a maarasaw antu masiggat a dayawanda baggina aw anna gafi. Patulku, gumafu sitaw a inanama, inakusandak ino Hudyuwera. 8 Ikkayu amminan a ana sitaw, saay se ammeyu kuruwan a pantotolayanna i Dios ino natayera?
9 “Arigku pay sin palungu a maawagku a akwan amminan a kontran so inoyera a mangurug sike Jesus a taga-Nazaret. 10 Kunna sitan ino inangwak so Jerusalem. Nepafukukkuweno oddu a tolayera i Dios se neyaddeno afu-afu a pariyera sikwak ino pakandama. E sin pinapaterera, inumannungak pay. 11 Namimpigyaak a inang so sinagogera, pinurebangku a fuwersan ira a massapit metulyat sike Jesus. Si kurwengke bungutku e nelupe-lupetkuwera maski so korwan a ipping a luga-lugar.
Na Sinapit i Pablo Megafu so Angngurugnga sike Jesus
12 “Antuweyaw yo gafuna a inangngak so Damasco, se inindandak ino afu-afu a pariyera si annut anna pakandama a umang so Damasco. 13 Sin tangnganaw dengkemi a maddoyu-doyug, Patul Agripa, naitak ino tata baggaw a naggabwat si langit. Mabaggaw kepay ammat si sinag e nabbaggaw so lebutku anna so lebut na bulungkuwera. 14 E nabaletwak kami amminan so lubag. E ana nadingngagku a ngaral a nabid si Hebreo a kunna, ‘Saulo, Saulo, saay se ilupe-lupetnak? Palowannuweno baggim ingkepay a makipakwa metulyat sikwak, mallakangke a makkussad si mataram a kiyan.’
15 “Netabbagku, ‘Yanyaka, Afu? E kunna sikwak, Ikkanak i Jesus a nelupe-lupetnu. 16 Mattaddagka! Nappaddaak sikwam takesi dutukan taka a gumasserbik anna manaddag so tolayera meafu so naitam sitoye anna so ipaitak ira kepay sikwam. 17 Imuran takana so tolem ira ingkepay na Israel anna so bakkan a Hudyuwera a pakaidundunangku sikwam 18 a manuffun sikwara a maimammatan nu nenay yo gakkurug anna mimemmak a mangurug nu nenay yo ammena gakkurug. Damara a mimemmak a mangwa si maral anna akwan ino mapiya e talekkurandaneno pakapangwa i Satanas anna muliyerana sike Dios takesi pakoman irana i Dios so liwa-liwatda anna arasawannerana a tolenera gumafu se mangurug ira sikwak.’ ”
Sinapit i Pablo ino Passerbina
19 Nebalinna i Pablo a nakkun, “Patul Agripa, kapiyek a naindan si paimatan a naggabwat si langit, nakimorayak. 20 Palungu a nanunturuwak so Damasco anna so Jerusalem anna so amminan a lubbu-lubbun na Judea kunnapay so bakkan a Hudyuwera. Netunturuk a maawag a mabboboliyera nad so liwa-liwatda anna muliyera nad sike Dios. Mangwera nad si mapiya a mangipaita a nabboboliyeran. 21 Antuweyaw yo gafuna a ginafutdak na korwan a Hudyuwera sin anaak so Templu e kanggamdak a patayan. 22 Duffu-duffunannak i Dios makiyad sitoye. Antu mattaddagak sitaw a itundu sikwayu a kaawan a tolayera anna maski yo ammena kaawan ira. Awan ituntu-tunturuk nu bakkan ino sinapit ira na profetera anni Moises 23 a maawag a massufri anna matay i Mesiya. Neturakda pay a baggineno palungu a mantotolay. Nebalaggoneno kagakkuruwan patamu so pannabbut a kakunna yo baggaw so Hudyuwera anneno bakkan a Hudyuwera.”
24 Sikwana kepay a mabi-abid i Pablo, naggirawa i Festo a kunna, “Pablo, mappallawkan! Pinappallaw naka yo kaoddu na kinalakammum.”
25 Kunna i Pablo, “Ammek a mappallaw, madaya-dayaw a Gubernador Festo, se yo sapi-sapitangku e passi kagakkuruwan. 26 Ammu i Patul Agripa amminan meafu sitawera a kiya-kiyan anna damak a makiabid sikwana. Ammuk a nadingngagnga meafu sitawera a kiya-kiyan, se iyawera e ammena neyimad a nedemmu so tata idag. 27 Patul Agripa, kuruwannuweno profetera? Ammuk a mangurugka.”
28 Kunna i Patul Agripa sike Pablo, “Angga-anggammannak kad a mattabali si Kristiyanu sitoye?”
29 Tinumabbag i Pablo, “Si malan onnu mabayag a tiyempu, idasalku sike Dios a bakkan lamang ikkayu udde ikkayu amminan a maningnga-ningngag sikwak sitoye e mangurug pay sike Jesus a kakunna yo akwangku udde ammek kanggam a mattabali kayu a fukuk a kakunnak fuwera sitaw a kawad ira.”
30 Antu nattaddag ino patul, ino gubernador, i Bernice anna inoyera a nakituttud sikwara. 31 Sin nakaanaweran, kunda a siggatatan, “Iyaw a tolay e awan inangwana a pakapatayanna onnu pakafukukanna.”
32 E sinapit i Patul Agripa sike Festo, “Damanan nad a palawanan iyaw a tolay nu ammena lamang a napila sike Emperador.”