Nattabali i Pablo a Minangikkurug i Jesus
9
So Jerusalem, tanta-tantalawan kepay i Saulo ino gumaladandan ira i Afu e sapitanna kepay a patayannera. Inang baggina so katannangan a pari, 2 anna narang baggina si turak ira a mepaita so afu-afuwera na sinagogera so Damasco a maindan baggina si pakandama a mintufuk si tolayera sinay a gumaladandan ira so Dalan i Afu Jesus, lallakiyera onnu bafabbayera se gafutannera e iyulinera so Jerusalem.3 Sin ana baggina so dalan paaranni so Damasco e lannat a nabbaggaweno sirwat so lebutna a naggabwat si langit. 4 Nadannag baggina so lubag e nakadingngag si ngaral a nakkun sikwana, “Saulo, Saulo, saay se ilupe-lupetnak?”
5 Naffuut baggina, “Yanyaka, Afu?”
Kunneno ngaral, “Ikkanak i Jesus a nelupe-lupetnu. 6 Mattaddagka e ingka so lubbun anna metundu sikwam sinay nu nenay yo akwannu.”
7 Na lallakiyera a maddoyu-doyug a bafulun i Saulo e nakataddag lamang sinay a ammera makasapit gumafu se nadingngaggeno ngaral udde awan naitara. 8 Ginumumbwat i Saulo so lubag e maski nu nakabukkat ino matanera awan maitana si maski sanna antu iniggammandeno kamatna anna neyangga baggina so Damasco. 9 Si tallu aw, ammena makaita i Saulo, ammena mangngan onnu minum.
10 Ana tata disipulu so Damasco a minganan si Ananias. Nappadda i Afu Jesus sikwana e kunna, “Ananias.”
Tinumabbag baggina, “Anaak sitaw, Afu.”
11 Kunna i Afu sikwana, “Gumumbwatka anna ingka so kalsada a minganan si Matunung anna so balay i Judas intufukannuweno tata tolay so Tarsus a minganan si Saulo. Sitaw a tiyempu, maddasa-dasal baggina, 12 e naitana si paimateno tata tolay a minganan si Ananias a tinumallung so balay a pagyananna anna nepotunneno kamatnera sikwana takesi makaita imman.”
13 Udde tinumabbag i Ananias, “Afu, oddu a tolayera a nakadingngaggangku meafu sitaw a tolay nu kasanna kamaral a inangwana so minangikkurugnguwera so Jerusalem. 14 E dinumatang baggina so Damasco a ana pakandamana a naggabwat so afu-afu a pariyera a magafut amminan a tolayera a maddayaw sikwam.”
15 Udde kunna i Afu sikwana, “Ingka sike Saulo se pinilik baggina a masserbi sikwak. Kanggammangku a itunduna so bakkan a Hudyuwera, so patuldera anneno Israelitera meafu sikwak. 16 Ipaitak sikwana a massufriyengke baggina para sikwak.”
17 Antu inang i Ananias e tinumallung so balay. Nepotunneno kamatna sike Saulo e kunna, “Wayi Saulo, i Afu Jesus a nappadda sikwam so dalan sin paumangka sitaw e dinundunnak takesi makaitaka imman anna anana sikwam ino pakapangweno Espiritu i Dios.” 18 Siddarat a ana nadannag so matana a kunnangke sissik ira e nakaiten. Ginumumbwat baggina e nabawtismuwan. 19 Akkabalinna a nangngan nantotoliyeno tuyagnga.
Nanundu i Saulo so Damasco
Nagyan i Saulo so Damasco si pigya aw bulunneno disipuluwera i Jesus. 20 Siddarat a pinefunanna nebalaggaw i Jesus so sinagogera a nakkun, “Baggineno Anak i Dios.”
21 Amminan a nakadingngag sikwana e nalaggat e kunna, “Bakkang kad baggineno tolay a nangilupet so tolayera a naddayaw sike Jesus sito Jerusalem? Anna bakkang kad a umang sitaw takesi gafutannaneno gumaladandan ira i Jesus e iyangngerana so afu-afu a pariyera?”
22 Udde annanot a nadaggan ingkeno nammuna i Saulo a mangipruweba a i Jesus e antu yo Mesiya. Nabu yo Hudyuwera a migyan so Damasco e awan masapitda metulyat so sinapitna.
Nakatamang i Saulo so Hudyuwera
23 Akkabalinna oddu a aw, nattaretabban ino Hudyuwera a patayan i Saulo, 24 udde naammuwanna meafu so nattaretabbanda. Aw anna gafi a langnga-langngaddandeno pattallungan na Damasco takesi papatayanda baggina. 25 Udde tata gafi, inappeno dumaladandannera baggina e neyekwara baggina si dokal a kaba e nedolamda baggina so abbut na batu a pader a nakapalebut so lugar.
26 Sin dinumatang baggina so Jerusalem, pinurebanna a mebulun so disipuluwera udde mattalawera amminan sikwana, se ammera mangurug a minangikkurug baggina sike Jesus. 27 Udde inappa i Bernabe i Saulo anna neyangnga baggina so apostol ira. Netunduna sikwara nu kasanna a naita i Saulo i Afu so dalan anna nu kasanna a nakiabid i Afu sikwana. Netunduna pay sikwara nu kasanna yo tuyag na nakamma a nassapit meafu sike Jesus so Damasco. 28 Antu nebulun i Saulo so gumaladandan ira e nilebutdeno Jerusalem anna matuyag a nakamma a nassapit meafu sike Afu. 29 Nakitetabbag anna nakitinnulyat baggina so Hudyuwera a massapit si Griyego udde pinurebanda a patayan baggina. 30 Sin naammuwan ino minangikkurug ira meafu so planu yo Hudyuwera a patayan baggina, neyangga i Saulo so Cesarea anna pinaulira baggina so lubbunna a Tarsus.
31 Daggun, yo grupu na minangikkurug ira so Judea, Galilea anna Samaria e ana tiyempura si piya. Ammeran a melupe-lupet anna nattuyag ino angngurugga. Dengke a aggatolayeno minangikkurug ira a makimoray sike Afu anna dengke a patuyagganneno Espiritu i Dios ino nakamda, e inumodduwera.
Na Pammapiya i Aeneas
32 Dengke a naddoyu-doyug i Pedro so amminan a lubbu-lubbun so lebut na Jerusalem, ginannonneno tolayera i Dios a migigyan so Lydda. 33 Sinay nasemmuneno lalaki a minganan si Aeneas, tata paralitiku a walu rawunin a nakaidda. 34 Kunna i Pedro sikwana, “Aeneas, pammapiyan naka i Jesu Kristo. Gumumbwatka e dalingkunannuweno niddannu. E siddarat a ginumumbwat baggina. 35 Amminan a tolayera a migigyan so Lydda anna Sharon e naitara baggina. Naddesisyon ira a mangurug anna dumandan sike Afu.
36 So lubbun na Joppa, ana tata disipulu a mingan si Tabita a Dorcas si Griyego. Neyaddana amminan ino tiyempuna a mangwa-angwa si mapiya anna manuffu-nuffun so maddidiyat ira. 37 Sitan a tiyempu nattakit baggina e natay. Sin binagguwanda baggina, nepaiddara baggina so kwartu so uttun na balay. 38 Ammena kurwa aroyuweno Lydda so Joppa, antu sin nadingngag ino minangikkurug ira a ana i Pedro sinay, nangidundun ira si adwa a lallakiyera sikwana e inarangga sikwana a umang sikwara a awan pakatalantanan.
39 Antu ginumumbwat i Pedro e nebulun sikwara. Sin dinumatang baggina, neyangga baggina so kwartu so uttun na balay. Nattaddag amminan a baluwera so karebbingnga a mattangi-tangit ana ipaita-itareno barasira anna korwan a sinnun a dinet i Dorcas sikwana a bulunda. 40 Pinalawan amminan i Pedro ino tolayera so kwartu. Antu nammalitud baggina anna naddasal. Kapiyena naddasal, tinallangngeno natay e kunna, “Tabita, gumumbwatka.” Antu nebukkatneno matana. Sin naitana i Pedro, nattuttud baggina. 41 Iniggamman i Pedro ino kamatna e dinuffunanna a gumumbwat. Antu inayanneno minangikkurug ira anneno baluwera so kwartu e nepaitana sikwara i Tabita a natolayin. 42 Iyaw a nedemmu e naammuwan so interu Joppa anna oddu yo nangurug sike Afu. 43 Daggun, nakiigyan i Pedro si pigya aw so Joppa sike Simon a gumàangwa si lalat a naggabwat si gaddang na aggayam.