I Pedro anni Cornelio
10
Ana tata lalaki so Cesarea a minganan si Cornelio, kapitan na tatut a Romano a sundaluwera a maayan si Rehimento na Italya. 2 Maski bakkan a Hudyu i Cornelio, makimoray anna maddayaw baggina sike Dios bulunneno katabbalena. Maumid a duffunanneno madidiyat a Hudyuwera anna maumid a maddasal sike Dios. 3 Namitta aw si alas tres si fuwaba, ana yo nepaita i Dios sikwana. Naitanengkeno tata anghel i Dios a inang sikwana e kunna, “Cornelio!”4 Mattalawengke i Cornelio a aggaitana si mapiyeno anghel e kunna, “Afu, nenay inay?”
Kunneno anghel, “Nadingngag i Dios ino dasalnuwera anna naitaneno duffunnuwera so madidiyat ira a kaangga-anggam a walli sike Dios. 5 Manundungka si tolayera so Joppa a manippal sike Simon a minganan si Pedro. 6 Migigyan baggina so tata tolay a minganan pay si Simon a gumàangwa si lalat na gaddang a naggabwat si gaddang na aggayam. Na balena e ana so dappit na bebay.” 7 Sin nanawin ino anghel, nayag i Cornelio si adwa so imbutnera anna tata so sundalunera a masserbi sikwana anna maddayaw pay sike Dios. 8 E kapiyena netundu amminan sikwara, dinundunnera so Joppa.
9 Kadaddaramatanna, dengkera a maddoyu-doyug anna aranniyeran so Joppa, nunek i Pedro so atap na balayb a maddasal sin ma-alas dose si tangnganaw. 10 Nabisinan baggina e kanggamma a mangngan. Sin maddaggun a ipara-paran kepay yo maakkan, ana yo nepaita i Dios sikwana. 11 Naitana a nabbukkat ino langit e ana yo kunnangke dokal a ulat a dumola-dolam so lubag a nakabassin so appat a pampagnga. 12 So ulat ana yo naddadaruma a garannud na aggayam ira a mallaka-lakad, makkakarayap anna simaron a pappitut ira a meyallang a akkanan na Hudyuwera. 13 E nadingngagngeno tata ngaral a nakkun, “Pedro, gumumbwatka takesi mappartika si isiram.”
14 Udde kunna i Pedro, “Afu, ammek makwa iyan se ammek nangngan si maski nenay a meyallang so gagangemi a Hudyuwera anna nebilang a madakkut.”
15 Nadingngagnga imman ino ngaral a nakkun, “Diosak, antu nu ana ibilangku a malinis anna damana a akkanan, ammem sapitan a ammena malinis anna ammena dama a akkanan.” 16 Namillu iyaw a nedemmu e lannat a netulluweno ulat si langit.
17 Sikwana a nono-nonotan i Pedro nu nenay yo kanggamma sapitan ino naitana, lannat a dinumatang ino lallakiyera a dinundun i Cornelio e nakataddag ira so tarangkeno balay i Simon. 18 Finuutda nu sinay a migigyan i Simon a pinangananda si Pedro.
19 Udde sikwana kepay a nono-nonotan i Pedro nu nenay a kanggamma sapitan ino nepaita i Dios sikwana, kunneno Espiritu i Dios sikwana, “Ana tallu a lallakiyera a mintu-intufuk sikwam. 20 Gumumbwatka anna mullugka e ammeka mabbabang a mebulun sikwara se ikkanak ino nanundun sikwara.”
21 Antu nullug i Pedro e kunna so lallakiyera, “Ikkanak ino intu-intufukan diyaw. Nenay yo gafuna a ana kayu sitaw?”
22 Kunda, “Dinundun dakami i Kapitan Cornelio, matunung a tolay anna tata maddayaw sike Dios anna ilawa amminan a Hudyuwera. Kunneno tata anghel i Dios sikwana a maimbitangka so balena takesi dingngagganna amminan ino sapitannu.” 23 Nepatallung ira i Pedro e nepaturugngera sinay si gafina.
Sin kadaddaramatanna, ginumikkat i Pedro e nebulun sikwara anneno korwan a minangikkurug ira a taga-Joppe e binulunanda baggina. 24 Kadaddaramatanna, dinumatang ira so Cesarea. Minda-indag i Cornelio sikwara anna inayanna pay yo kawayyannera anneno kadikkat a kolakngera.
25 Sin dinumatang i Pedro, dinumafung i Cornelio sikwana e nallabba so allanganna a maddayaw sikwana. 26 Udde nepataddag i Pedro e kunna, “Mattaddagka se tolayak pay a kakunnam.” 27 Dengke a nakitetabbag i Pedro sike Cornelio, tinumallung ira so balay e naitana i Pedro ino oddu a tolayera a naammung sinay. 28 Kunna i Pedro sikwara, “Ammuyu a metulyat so katunungammi a Hudyuwera a makitallang onnu maggannon si bakkan a Hudyu. Udde nepaitana i Dios sikwak a ammek ibilang maski sanna a tolay a ammena kaangga-anggam sike Dios onnu madakkut si aggitana. 29 Antu ammek nakitinnulyat sin pinaayandak. Sitoye, kanggammangku a maammuwan nu saay se pinaayandak.”
30 Tinumabbag i Cornelio, “Appat a aw a nappasa si kunna sitaw a orat, alas tres si fuwab, maddasa-dasallak so balek sin lannat a nattaddag ino tata lalaki a kumilla-killat yo barasina so allangangku. 31 E kunna, ‘Cornelio, nadingngag i Dios ino dasalnuwera anna naitaneno duffunnuwera so madidiyat ira a kaangga-anggam a walli sike Dios. 32 Manundungka si tolayera so Joppa a manippal sike Simon Pedro. Migigyan baggina so tata tolay a minganan pay si Simon a gumàangwa si lalat na gaddang a naggabwat si gaddang na aggayam. Na balena e ana so dappit na bebay.’ 33 Nabu, siddarat a nepaayag taka e mapiyakangke a umang sitaw. Sitoye, ana kami amminan sitaw so allangan i Dios takesi dingngaggammi amminan ino netunna sikwam a sapitannu sikwami.”
Nadingngag ino Bakkan a Hudyuwera ino Mapiya a Baga
34 Akkabalinna iyaw, kunna i Pedro, “Gakkurug a maintindiyangkun a parefu yo pattaratuna i Dios si tolayera. 35 Arasawanna i Dios ino Hudyuwera onnu bakkan a Hudyuwera a ana talora sikwana anna fustuweno akwanda maski nenay a talubaggan a naggabwatanda. 36 Ammuyuweno Mapiya a Baga a nebalaggona i Dios sikwatam a Israelitera a damana a makibulun ino tolayera sikwana gumafu so inangwa i Jesu Kristo a Afu na amminan a tolayera. 37 Iyaw a Mapiya a Baga e nassiwarak so interu a Judea mamefu si Galilea sin nabalin i Juan a nanunturu megafu si bawtismu. 38 Neyaddana i Dios ino Espirituna anneno pakapangwana sike Jesus a taga-Nazaret. Inang i Jesus so naddadaruma a lugar e nangwa-angwa si mapiya anna pinammapiyaneno amminan a inaffunan i Satanas se ana i Dios sikwana.
39 “Ikkami a apostol ira, naitami amminan ino inangwana so Judea anna so Jerusalem. Pinatera baggina e nepatakda so kurut. 40 Udde so meka-tallu aw, pinantotolay i Dios baggina e nepabulunna a maita baggineno tolayera. 41 Ammena nappaita si amminan a tolayera udde sikwami lamang a pinili i Dios a manestigu anna ikkami a nakiakkan anna nakiinum sikwana kapiyeno panantotolena. 42 Dinundun nakami a manundu so tolayera anna mangipakaammu si baggineno pinili i Dios a mannunut so aggatolayera anneno natayera. 43 Antu keppay yo sinapit ino amminan a profetera siin nabayagin a tiyempu meafu sike Jesus a amminan a mangurug sikwana e mapakomanneno liwa-liwatda.”
Na Pangarasaweno Bakkan a Hudyuwera sike Espiritu i Dios
44 Sikwana kepay a massapi-sapit i Pedro, yo Espiritu i Dios e dinumassag sikwara amminan a naningngag si sapit i Dios. 45 Nalaggat ino minangikkurug a Hudyuwera a namulun sike Pedro se neyaddana pay i Dios ino Espirituna so bakkan a Hudyuwera. 46 Se nadingngaggera a massapi-sapit si naddadaruma a sapit a ammera maintindiyan anna maddaya-dayawera sike Dios. Antu kunna i Pedro so bulunnera, 47 “Inarasoran ino Espiritu i Dios a kunnapay sikwatam a minangikkurug a Hudyuwera. Ana kad a mangiyallang a mabawtismuwan ira?” 48 Akkabalinna iyaw, sinapit i Pedro sikwara a mappabawtismuwera antu yo mangipaita a mangurug iran sike Afu Jesu Kristo. Sin nabawtismuwan iran, inarangga sike Pedro si magyan nad sikwara si pigya aw.