Na Netundu i Pedro so Minangikkurug Ira so Jerusalem
11
Sitoye, nadingngag ino apostol ira anneno korwan a minangikkurug ira so Judea a mangurug payeno bakkan a Hudyuwera so sapit i Dios. 2 Antu sin nuli i Pedro so Jerusalem, nakitinnulyat sikwaneno korwan a minangikkurug a Hudyuwera. 3 E kunda, “Saay se inangka so balayeno bakkan a Hudyuwera a ammena kepay nabanggit anna nakiakkangka kepay sikwara?”4 Antu netundu i Pedro amminan ino nedemmu sikwana mamefu so palunguna e kunna, 5 “Sin nagyanak so Joppa a naddasal, ana a nepaitana i Dios sikwak a manilla dokal ingke a ulat a dumola-dolam a naggabwat si langit. Nakabassin iyaw so appat a pampagnga e dinumolam so nagyanangku. 6 Sin minunnakkangkuwengke si mapiya yo unagnga, naitak ino naddadaruma a garannud na aggayam ira a mallaka-lakad, makkakarayap anna simaron a pappitut ira a meyallang a akkanan na Hudyuwera. 7 Nadingngagku payeno ngaral a kunna sikwak, ‘Pedro, gumumbwatka takesi mappartika si isiram.’
8 “Udde kungku, ‘Afu, ammek makwa iyan se ammek nangngan si maski nenay a meyallang so gagangemi a Hudyuwera anna nebilang a madakkut.’
9 “Nadingngagku imman ino ngaral si langit a nakkun, ‘Diosak, antu nu ana ibilangku a malinis anna damana a akkanan, ammem sapitan a ammena malinis anna ammena dama a akkanan.’ 10 Namillu iyaw a nedemmu. Akkabalinna iyaw, netulluwera imman amminan si langit.
11 “Lannat a dinumatang ino tallu a lallakiyera a taga-Cesarea so balay a nagyanangku. Nedundun ira tapenu appandak. 12 Kunna sikwak ino Espiritu i Dios a mebulunak sikwara maski nu bakkan a Hudyuwera. Binulunandak pay iyawera a annam a wawwayiyera si angngurug a taga-Joppa so Cesarea e tinumallung kami so balay i Cornelio. 13 Sin dinumatang kami, sinapit i Cornelio sikwami a naitaneno anghel a nakataddag so balena. Kunneno anghel sikwana, ‘Manundungka si tolayera so Joppa a manippal sike Simon Pedro. 14 Itundunana sikwam nu kasannaka anneno interu a katabbalem e matabbutna.’
15 “Sin napefunangkun a massapit, yo Espiritu i Dios e dinumassag sikwara a kunnapay yo inangwana sikwatam sin pefuna. 16 E nadandamkuweno sapit i Afu sin kunna, ‘Nabbawtismu i Juan si danum, udde mabawtismuwang kayuna si Espiritu i Dios.’ 17 Neyaddana i Dios ino Espirituna so bakkan a Hudyuwera kunnapay sikwatam sin nangurug etam sike Afu Jesu Kristo. Yanyaak kad a maffuwad so akwan i Dios?”
18 Sin nadingngagga iyaw, nimemmak ira a nattitinnulyat. Dinayora i Dios e kunda, “Neyaddana pay i Dios so bakkan a Hudyuwera ino tiyempu a mabboboli anna angkakwandeno akkatolera takesi matolayerana a bulun i Dios amu-amu.”
Na Pangurug na Tolayera so Antiokia
19 Makiyad sin tiyempu a pinapatayeno Hudyuwera i Esteban, e oddu so minangikkurug ira a nelupe-lupet, nanawera so Jerusalem. Ana yo inang so Fenisia, Cyprus, anna so Antiokia. Nepakaammureno baga meafu sike Jesus so Hudyuwera lamang. 20 Udde ana yo korwan sikwara a taga-Cyprus anna taga-Cirene a inang so Antiokia e nebalaggoreno Mapiya a Baga meafu sike Afu Jesus so bakkan a Hudyuwera. 21 Ana yo pakapangwa i Dios sikwara a manundu e odduwengke yo bakkan a Hudyuwera a nattabali si minangikkurug ira anna nangurug sike Afu Jesus.
22 Sin nadingngag ino grupu na minangikkurug ira so Jerusalem meafu so baga a ana yo minangikkurug ira so Antiokia, dinundunda i Bernabe sinay. 23 Sin dinumatang baggina sinay e naitana nu kasanna nangwa si mapiya i Dios so minangikkurug ira sinay. Nammalamuwang baggina e tinabarangannera amminan a siggakurug sike Afu Jesus anna maumid a serbiyan baggina. 24 Mapiya a tolay i Bernabe e ana sikwaneno pakapangweno Espiritu i Dios anna matuyag a angngurugnga. Gumafu so inangwanera, odduwengke a tolayera sinay a nangurug sike Afu Jesus.
25 Antu inang i Bernabe so Tarso a mintufuk sike Saulo. 26 Sin naintufukanna baggina, netuludna so Antiokia. Tarawun a nakibumbulun ira so grupu na minangikkurug ira sinay, e tinunturuwandeno oddu a tolayera meafu sike Jesus. So Antiokia a palungu a naayan si Kristiyanuweno gumaladandan ira i Jesus.
27 Sitan a tiyempu sin ana da Bernabe anni Saulo so Antiokia, dinumatang sinayeno profetera i Dios a naggabwat so Jerusalem. 28 Nattaddag ino tata sikwara a minganan si Agabo tapenu sapitanneno nepalabbun ino Espiritu i Dios sikwana a anana yo dokal a bisin so interu talubaggan. Inay a nelabbunna e neyakkurug sin i Claudio yo Emperador na Roma. 29 Antu nattaretabban ino disipuluwera i Jesus a mangadderana si duffun so minangikkurug ira so Judea meantu so damara a meyadda. 30 Inangwara iyaw e neyaddara amminan ino duffunda sike Bernabe anni Saulo takesi iyanggana iyawera so manannakam so Jerusalem.