Napapatay i Santiago anna Nefukuk i Pedro
12
Sinoy a tiyempu, nepefunan i patul Herodesa a ilupe-lupet ino korwan a grupu na minangikkurug ira i Jesus. 2 Nepafugutna i Santiago a wayi i Juan. 3 Sin naitana a naanggamman ino Hudyuwera so inangwana, nepagafutna pay i Pedro. (Nedemmu iyaw sin tiyempu na Fiyesta na Tinapay a awan a Labadurana.b) 4 Nepagafut i Herodes i Pedro anna nepafukuknga anna nepaguwardiyana si appat a grupu a sigga-appat a sundaluwera. Kanggamma i Herodes a iyang i Pedro so allangan na Hudyuwera akkabalinneno Fiyesta na Attalebad.c 5 Sikwana a nakafukuk i Pedro, naddasal ingkeno grupu na minangikkurug ira sike Dios para sikwana.Na Akkelawan i Pedro so Paffukukan
6 Sin gafi na inay, liyena itallang i Herodes i Pedro so tolayera, matu-maturug i Pedro so nallatanan na adwa a sundalu. Nakawaran ino adwa a kamatna e ana kepay adwa a sundalu a magguwardiya so tarangka na paffukukan. 7 Lannat a nappaddeno anghel i Afu Dios so allangan i Pedro e nabaggawan ino paffukukan. Ginuyuneno siwak i Pedro e kunna, “Malan, gumumbwatka!” E naariyeno kawad ira so kamatna. 8 Kunna kepayeno anghel sikwana, “Isiggutnuweno gayakatnu e massandalyatka.” Nakimoray i Pedro. Antu kunneno anghel sikwana, “Mattafálka e dandanannak.”
9 Dinumandan i Pedro so anghel e nallawan ira so paffukukan. Udde ammena ammu nu gakkurug yo akakwan ino anghel sikwana, arignga si tenap lamang. 10 Akkabalinda a tinalebaran ino palungu anneno meka-adwa a guwardiya, nakadutung ira so baliyang a tarangka paumang so lubbun. Siddarat ingke lamang a nabbukkat ino tarangka e nallawan ira. Sin malla-mallakad ira so dalan, lannat a naawan ino anghel.
11 Antu lamang a nakaammuwan i Pedro a bakkan a tenap a nakwa sikwana e kunna, “Ammuk si gakkurug iyaw. Dinundunna i Dios ino anghelna a mangisalak sikwak so planu i Herodes a patayannak anneno amminan a innanaman ino Hudyuwera a makwa sikwak.”
12 Sin naintindiyanneno nakwa sikwana, inang baggina so balay i Maria a ina i Juan Markus. Oddu a tolayera a nammu-ammung anna maddasa-dasal sinay. 13 Sin nattottok i Pedro so lawan na tarangka, tata bafay a gumasserbi a minganan si Roda yo inang nangita nu yanya yo ana sinay. 14 Udde sin naimunuwanneno ngaral i Pedro, mangga-anggam ingke baggina. Imbes a bukkatanneno tarangka, nakkarantut baggina e nepakaammuna so korwan a minangikkurug ira a mattadda-taddag i Pedro so lawan na tarangka.
15 Kunda sikwana, “Mappangalka!” Udde nelillinna a gakkurug yo sinapitna. Antu kunda, “Anghel i Pedro iyan.”
16 Daggun, ammena inibbattan i Pedro a mattotto-tottok. Sin binukkatandeno lenab, nalaggat ira sin naitara baggina. 17 Sinenyattannera a suminak ira e sinapitna sikwara nu kasanna baggina a pinalawan i Dios so paffukukan. Kunna sikwara, “Itunduyu iyaw sike Santiago anna so korwan a wawwayitam si angngurug.” Akkabalinna, nanaw e inang baggina so korwan a lugar.
18 Sin kadaddaramatanna, makkannawakaweno guwardiyera gumafu se ammera ammu nu nenay a nedemmu sike Pedro. 19 Nepatufuknga i Herodes i Pedro udde ammera matumpalan baggina. Pinaimbestigaranneno guwardiyera e netunna a mapapatayera. Akkabalinna, nanaw i Herodes so Judea e inang so Cesarea anna nagyan abbu baggina sinay.
Na Akkapatay i Herodes
20 Sin nagyan i Herodes so Cesarea, nabbungut baggina so tolayera so Tiro anna so Sidon. Gumafu sitaw, nattatera a inang sikwana. Pinalungura abbu a kinolak i Blasto a tata so kaawan a ofisyales i Herodes takesi duffunannera a makipakoli sike Herodes gumafu se so talubbunan na patul a paggabwatan ino pakkatolay na lubbunda. 21 So aw a naddesisyon i Herod a manafung sikwara, nabbarasi baggina si barasi na patul, nattuttud so tronona, e nassapit so allangan na tolayera. 22 Nakkalli-kallit ino tolayera e kunda, “Tata a dios yo massapi-sapit, bakkan a tolay!”
23 Siddarat a pinatakit ino anghel i Herodes gumafu se kinammaneno kadayawan a meantu sike Dios. Inakkan ino uggit ino unagnga makiyad si natay baggina.
24 Sinoy a tiyempu, nassiwarak ino sapit i Dios e annanot a umoddu-oddu yo nangurug sike Jesus.
25 Sin nabalin da Bernabe anni Saulo ino nakaidundunanda so tolayera, nanawera so Jerusalem e nuliyera so Antiokia. Nebulunda i Juan a pinangananda pay si Markus.