Napili anna Nedundun da Bernabe anni Saulo
13
So grupu na minangikkurug ira i Jesus so Antiokia, ana yo profetera anna mestruwera. Ira da Bernabe, Simeon a minganan si Ngisit, Lucio a taga-Cirene, Saulo anni Manaen a dinumokal sike Patul Herodes Antipas. 2 Sikwara a maddaya-dayaw sike Afu anna mangngili-ngilin ira, kunneno Espiritu i Dios sikwara, “Dutukan diyaw da Bernabe anni Saulo a masserbi sikwak se ana yo ipaangwak sikwara.”3 Kapiyera a nangngilin anna naddasal, nepotundeno kamatda sike Bernabe anni Saulo a maddasal sikwara e pinagikkatdera.
Nanundu da Bernabe anni Saulo so Cyprus
4 Antu negiyeno Espiritu i Dios da Bernabe anni Saulo so Seleucia. Antu nallayad ira mamefu sinay paumang so Cyprus. 5 Sin dinumatang ira so Salamis a lubbun na Cyprus, nebalaggoreno sapit i Dios so sinagogera na Hudyuwera. E nebulunda pay i Juan Markus a manuffun sikwara.
6 Dinoyugga amminan a lubbun na Cyprus makiyad si dinumatang ira so Pafos. Naammu-ammura sinayeno tata Hudyu a madyikeru a minganan si Bar-Jesus, tata sasan-profeta a Hudyu. 7 Iyaw a tolay e bulun i Sergio Paulo, tata maporay a gubernador na Cyprus a nappaayag sike Bernabe anni Saulo se kanggamma a dingngaggan ino sapit i Dios. 8 Udde yo madyikeru a i Bar-Jesus (Elimas ino nganna si sapit na Griyego), kinontrana da Bernabe anni Saulo takesi ammena mangurug ino gubernador sike Jesus. 9 Udde i Saulo, a minganan keppay si Pablo e negiyeno Espiritu i Dios. Pakatulangnganna i Elimas 10 e kunna, “Anaknakeno Diyablu, kontra-kontrannu amminan a fustu. Maumid a massalasirika so tolayera anna mangwa-angwaka si maral sikwara. Massapi-sapitka si bakkan a gakkurug meafu sike Dios. 11 Sitoye, kastiguwangkana i Afu Dios e mabulagkana si pigya aw.”
Siddarat a naawan ino aggita i Elimas e nakkabakaf a mintufuk si makkewid sikwana. 12 Nangurug ino gubernador sike Jesus sin naitaneno nedemmu sike Elimas. Nalaggat ingke baggina gumafu so netunturu da Bernabe anni Saulo meafu sike Afu Jesus.
Na Aggang Da Pablo anni Bernabe so Antiokia
13 Akkabalinna, nallayad da Pablo anneno bulunnera mamefu so Pafos paumang so Perga, tata lubbun na Pamfilia. Sin dinumatang ira sinay, inanawanneran i Juan Markus e nuli so Jerusalem.
14 Nebalinda Pablo anni Bernabe a inang so Antiokia, tata lubbun na Pisidia.
E so Aw na Aggimemmang, inang ira so sinagoga e nattuttud ira. 15 Sin nabalin a nabibbid ino neturak a katunungan i Moises anneno turak ira na profetera, nangiyang si tolayeno afu-afuwera na sinagoga sike Pablo anni Bernabe a nakkun, “Wawwayi, nu ana sapitan diyaw so tolayera a mappatuyag si ginanakamda, sapitan diyawin sitoye.”
16 Antu nattaddag i Pablo e sinenyatannera a suminak ira e kunna, “Ka-Israelitak ira, anna ikkayu kepay a bakkan a Hudyuwera a maddayaw sike Dios, maningngag kayu sikwak! 17 Na Dios a dayawantam a Israelitera, pinilineno aggidiyafuwantam ira. Sin nagyan ira so Ehipto a bakkan a lubbunda, pinaodduwera i Dios. Oddu rawun a nappasa, dinuffunannera anna nelawannera sinay megafu so kakkapallat a pakapangwana. 18 E inattammannera si appat a fulu rawun so kulolawat. 19 Sin dinumatang ira so Canaan, nepangaffutnera so pitu a lubbun sinay e neyaddana inayera a lubbun a erensiya na tolenera a taga-Israel. 20 Nedemmu iyaw si appat a tatut anna limafulu rawun.
“Akkabalinna iyaw a nedemmu, inindannera si gumannunut ira a mattangngal sikwara makiyad so tiyempu i profeta Samuel. 21 Sikwana a i Samuel kepay yo afu-afura, narang ira si tata patul e neyaddana i Dios sikwara i Saulo a anak i Kish a naggabwat so tribu i Benjamin. Appat a fulu rawun a nattangngal i Saulo sikwara. 22 Kapiyena inammayan i Dios i Saulo, pinili i Dios i David a patulda. Antuweyaw yo sinapit i Dios meafu sike David, ‘I David a anak i Jesse, yo tolay a makapaanggam sikwak. Akwanna amminan a kanggammangku a akwanna.’ ”
23 Kunna kepay i Pablo so tolayera, “Naggabwat i Jesus a Mannabbut so gakera i David se antuweyan yo netamba i Dios so Israelitera. 24 Liyena pinefunan i Jesus a manunturu, nebalaggonan i Juan so Israelitera a maawag a mabboboliyera so liwa-liwatda anna mappabawtismuwera. 25 Antu sin aranniyen a mabalin i Juan ino tarabafuna, kunna so tolayera, ‘Arig diyaw kad a ikkanak ino nedundun i Dios a manabbut sikwayu? Bakkanak ino Mesiya. Udde ana tata dumatang a makapangwengke ammat sikwak. Ammek mepangngat a manguttar so siggut na sandalyatna.’
26 “Wawwayik a gakera i Abraham anna ikkayu a bakkan a Hudyuwera a maddayaw sike Dios, ikkanetam ino nangipakaammuwan i Dios si baga meafu si pannabbut. 27 Ammena ammuweno tolayera so Jerusalem anneno afu-afurera a i Jesus ino dinundun i Dios a manabbut sikwara. Ammera pay maintindiyan ino sapit ira na profetera a bibbi-bibbiranda so kada Aw na Aggimemmang. Sinentensiyanda i Jesus a matay. Sin inangwara iyaw, naparulotdeno sinapit na profetera. 28 Maski awan a maintufukanda a gafuna a mapapatay baggina, inarangga sike Pilato a masentensiyan baggina a matay.
29 “Iyawera a Hudyuwera e inangwara amminan a maral a kiya-kiyan a kunna so neturak a sapit i Dios a mededemmuna sike Jesus. Akkabalinna inay, nedolamda so kurut e netanamda baggina. 30 Udde pinantotolay baggina i Dios. 31 E anna si oddu a awera a nappadda i Jesus so bulunnera a nebulun sikwana a naggabwat so Galilea paumang so Jerusalem. E sitoye, ira yo mangipakaammu so Hudyuwera meafu sikwana.
32 “E ipakaammumi sikwayuweno Mapiya a Baga a netambana i Dios so aggidiyafuwantam ira. 33 Naparulot i Dios sikwatam a gakarera megafu so panantotolena sike Jesus. Neturak pay iyaw so meka-adwa a Salmo,
‘Ikkeno Anakku, mamefu sitoye ikkanakun ino Amam.’a
34 Kunna kepay so neturak a sapit i Dios meafu so panantotolay i Jesus anneno ammena pabbayandag na baggina e kunna i Dios,
‘Iyaddaknga sikwayuweno mapiya a netambak sike David a gakkurug ingke a akwangku.’b
35 E ana pay a neturak so korwan a Salmo a nakkun,
‘Pinilinak a masserbi sikwam e ammem ipabulun a mabbayandag ino baggik.’c
36 Sin nabalin a akwan i David ino uray i Dios sin tiyempuna, natay baggina e netanam a nekarebbing so aggidiyafuwannera anna nabbayandag ino baggina. 37 Udde i Jesus a pinantotolay i Dios e ammena nabbayandag.
38 “Wawwayik, kanggammangku a maammuwan diyaw a megafu sike Jesus, nebalaggaw sikwayu a dama i Dios a pakoman ino liwa-liwattam. 39 Seanya yo mangurug sike Jesus e ibilang i Dios a matunung. Ammeyu iyaw a maangwa megafu si pakimoray si Katunungan i Moises 40 Antu mimud kayu takesi ammena medemmu sikwayuweno sinapit ino profetera siin nabayagin a tiyempu a nakkun,
41 ‘Itan diyaw, ikkayu a mangayoyung sikwak! Malaggat kayu anna matay kayu
gumafu se ana yo akwangku sikwayu so tiyempuyu
a ammeyu kuruwan
maski kepay ana mangitundu sikwayu.’ ”d
42 Sin nabalin a nassapit i Pablo, nallawan baggina anni Bernabe so sinagoga e sinapitan irengkeno tolayera a umang imman a manunturu meafu sitawera a kiya-kiyan so Aw na Aggimemmang. 43 Sin nabalin ino passosoronnung na tolayera so unagngeno sinagoga, oddu a Hudyuwera anneno bakkan a Hudyuwera a nanuntul so angngurug na Hudyuwera a nebulun sike Pablo anni Bernabe. Kinatetabbaggera takesi ibali-balindana a matolay megafu si simpat i Dios.
44 So metufad a Aw na Aggimemmang, maggi amminan a tolayera sinay a lubbun e naammung a maningngag si sapit i Dios. 45 Udde sin naiteno afu-afuwera na Hudyuwera ino oddu a tolayera, nafu irengke anna nassipittera. Kinontrareno sinapit i Pablo. 46 Antu matuyag ino nakam da Pablo anni Bernabe a nakkun, “Maawag a ikkayu a Hudyuwera yo palungu a pangisapitammi so sapit i Dios. Udde gumafu se pammayan diyaw iyaw, amme kayu mepangngat a matolay a bulun i Dios amu-amu. Antu anawammi kayu e umang kami a manunturu so bakkan a Hudyuwera. 47 Se kunna sitaweno sinapit i Afu Dios sikwami,
‘Pinili takayu a mattabali si sirwat so bakkan a Hudyuwera
takesi amminan a tolayera sito lubag e matabbutna.’ ”e
48 Sin nadingngag ino bakkan a Hudyuwera iyaw a sinapit i Pablo, maanggam ira e dinayora i Dios. Anna inoyera a pinili i Dios a matolena sikwana amu-amu e nattabali si minangikkurug ira.
49 Antu nassiwarak ino sapit i Dios so interu a kalubbunan. 50 Udde yo afu-afuwera na Hudyuwera e sinussuwandeno kaawan a relisyoso a bafabbayera anneno mammannag a afu-afuwera sitan a lugar. Nelupetda i Pablo anni Bernabe e nepaanorera sinay a lubbun. 51 Antu pinampagga Pablo anni Bernabe ino girafuk so takkira a mangipaita a i Dios e kontra so tolayera sitan a lugar. Inang ira adwa so Iconio. 52 Anneno disipuluwera i Jesus a nabattang so Antiokia, e maanggamman irengke anna negiyarera i Espiritu i Dios.