Na Nedemmu sike Pablo anni Bernabe so Iconio
14
Sin inang da Pablo anni Bernabe so Iconio, inangwara pay yo inangwara so Antiokia. Inang ira so sinagoga e gumafu so tuntururera, oddu a Hudyuwera anna bakkan a Hudyuwera a nangurug sike Jesus. 2 Udde yo Hudyuwera a ammena mangurug e sinussuwandeno bakkan a Hudyuwera a makaallang anna mattulyat so minangikkurug ira. 3 Nabbayag da Pablo anni Bernabe sinay e matuyag ino nakamda a nassapit meafu sike Afu Jesus. Netundura so tolayera meafu so simpat i Dios. Tinaddanna i Afu Jesus a yo sinapitda e gakkurug si pangiyaddana sikwara si pakapangwa a mangwa si kallalaggat a milagruwera. 4 Naggadweno tolayera sinay a lubbun, dinumandan ino korwan ira so Hudyuwera a ammera mangurug anneno korwan ira sike Pablo anni Bernabe.5 Nattaretabbag ino bakkan a Hudyuwera anneno Hudyuwera bulundeno afu-afurera a pursigidu a mappalow sike Pablo anni Bernabe. Kanggamda a lappaggan ira takesi matayera. 6 Udde sin naammuwan da Pablo anni Bernabe a papatayandera, nappalan ira a inang so Listra anna so Derbe, so korwan a lubbun na Licaonia anna so pallebutan na lugar ira. 7 E sinay nebali-balinda a nebalaggaweno Mapiya a Baga meafu sike Jesus.
Na Nedemmu sike Pablo anni Bernabe so Listra anna so Derbe
8 Sikwana a manundu-nundu i Pablo so tolayera so Listra, ana yo lalaki a pilay a nakatuttud sinay e ammenengke nakalakad makiyad sin akkeyanaknga. 9 Sin aggatuttud a maningnga-ningngag ino lalaki a pilay sike Pablo, pakatulangngan i Pablo baggina. Sin naitana i Pablo ino lalaki a pilay a nangurug a mapammapiyana i Afu Jesus baggina, 10 kunna a sinapit si madappa, “Mattaddagka!” Nallattuweno lalaki e nallakarin.
11 Sin naiteno tolayera ino inangwa i Pablo, negirawara so sapitda a Licaonia, “Nattabali si tolayeno diostam ira a naddassag sikwatam.” 12 Pinangananda i Bernabe si Zeus, anna i Pablo si Hermes gumafu se baggineno afu-afu a gumassapit. 13 Na templu i Zeus e ana so lawan na lubbun. Na pari na iyaw a templu e nangikangkalin si bulug a bakera anna lappawera so pattallungan na lubbun. Kanggam ino pari anneno tolayera a mangiwalli sike Pablo anni Bernabe.
14 Sin naammuwan da Bernabe anni Pabloweno kanggamda a akwan, pinissereno barasira a mangipaita si ammera kanggam ino akakwan ino tolayera. Nakkarelera so tolayera e negirawara, 15 “Wawwayi, saay se akwan diyaw iyaw? Tolekami pelamang a kakunnayu. Inang kami sitaw a mangipakaammu sikwayuweno Mapiya a Baga meafu sike Jesus, takesi talekkuran diyawneno akakwan diyaw a awan serbina e kuruwan diyaw i Dios a aggatolay a namaratu si langit, lubag, bebay, anneno amminan a ana sinay. 16 Siin nabayagin a tiyempu, nepabulun i Dios ino bakkan a Hudyuwera a mangwa si kanggamda a akwan. 17 Udde maumid a nepakaammuna i Dios ino baggina megafu so oddu a mapiya a kiya-kiyan a inangwana. Inindan nakayu si uran anna mapanat a gani si fustu a tiyempu. Inindan nakayu si oddu a maakkan anna maanggam kayu.” 18 Maski nu sinapit da Pablo anni Bernabe inay, nadiyatan ira keppay a pimemmakkan ino tolayera a mangiwalli sikwara.
19 Udde ginumumwang ino Hudyuwera a naggabwat so Antiokia anna so Iconio. Sinussuwandeno tolayera e nilappagga i Pablo. Ginonggo-gonggonda baggina a nelawan so lubbunda se arigga a natayin baggina. 20 Udde sin narimummungan ino disipuluwera baggina, ginumumbwat baggina e nuli so lubbun. Kadaddaramatanna, nanaw da Pablo anni Bernabe e inang ira so Derbe.
Na Pannuli da Pablo so Antiokia so Siria
21 Sin dinumatang da Pablo anni Bernabe so Derbe, nebalaggoreno Mapiya a Baga e oddu yo nangurug sike Jesus. Akkabalinna inay, nuliyera so Listra, so Iconio, anna so Antiokia. 22 Pinatuyaggeno nakam ino minangikkurug ira i Jesus anna tinabarangngandera si mapiya a mas annanot nad a mangurug ira. Sinapitda sikwara, “Maawag nad a mapurebantam ino oddu a diyat so paddalanantam paumang so pattangngalan i Dios si langit.” 23 Naddutuk da Pablo anni Bernabe si manannakam na grupu na minangikkurug ira kada lubbun a nanganda. Naddasal anna nangngilin ira e netalakda sike Afu Jesus a kinurugga.
24 Sin nattalebad da Pablo anni Bernabe so Pisidia, inang ira so Pamfilia. 25 Nanunturuwera meafu sike Jesus so Perga, liyera inang so Atalia. 26 E nallayad ira a nuli so Antiokia. Antuweyaw yo lubbun a nangitalakkan na minangikkurug ira sike Pablo anni Bernabe so pattabbud i Dios e nedundun ira a akwan iyaw a tarabafu. Sitoye nabalindan.
27 Sin dinumatang ira sinay, inammunggeno grupu na minangikkurug ira e netundureno amminan a inangwa i Dios sikwara. Netundura pay nu kasanna a iyaddana i Dios so bakkan a Hudyuwera ino makasta a tiyempu a mangurug sike Jesus. 28 Nabayag irengke a sigigyan so Antiokia bulundeno minangikkurug ira sinay.