Na Pattaretabbag na Afu-afuwera na Minangikkurug Ira so Jerusalem
15
Ana yo tolayera a naggabwat so Judea a inang so Antiokia, e nanunturuwera so minangikkurug ira sike Jesus e kunda, “Amme kayuna matabbut nu amme kayuna mappabanggit meantu so katunungan i Moises.” 2 Udde ammera kanggam i Pablo anni Bernabe ino sinapitda e nakitinnulyat ira sikwara. Nabu, inumannung ino minangikkurug ira so Antiokia a paumangan da Pablo anni Bernabe anneno korwan a minangikkurug ira so Jerusalem takesi fuutandana so apostol ira anna so manannakam na minangikkurug ira meafu so nattaretabbanda. 3 Nabu, nedundun ira ino grupu na minangikkurug ira so paddoyugga. Sin nattalebad ira so Fenisia anna Samaria, netundura so minangikkurug ira a oddu a bakkan a Hudyuwera a nangurugin sike Jesus anna maanggam ingkeno minangikkurug ira sinay.4 Sin dinumatang ira so Jerusalem, inarasawdereno grupu na minangikkurug ira, ino apostol ira anneno manannakamda. Netundu da Pablo amminan a inangwa i Dios sikwara so bakkan a Hudyuwera. 5 Udde nattaddag ino korwan a Fariseowera a minangikkurug ira sike Jesus e kunda, “Tabarangngantam nad yo bakkan a Hudyuwera a mappabanggit ira anna makimorayera pay si katunungan a neyaddana i Dios sike Moises.”
6 Antu nammu-ammung ino apostol ira anneno manannakam na minangikkurug ira takesi pattataretabbanda meafu sitaw a pakaburungan. 7 Akkabalinneno nabayag a pattitinnulyat, nattaddag i Pedro e kunna sikwara, “Wawwayik, ammuyu a sin palungu a awera, nappili i Dios sikwatam a ikkanak nad yo paningngaggan ino bakkan a Hudyuwera si Mapiya a Baga anna mattabaliyera si minangikkurug ira. 8 E ammuna i Dios ino ginanakam ino amminan a tolayera, anna inarasawna iyawera a bakkan a Hudyuwera. Nepaitana iyaw sikwatam si pangiyaddana so Espiritu i Dios sikwara kakunna yo inangwana sikwatam. 9 Parefu yo pattaratuna i Dios sikwatam a Hudyuwera anna sikwara a bakkan a Hudyuwera. Se pinakomannera pay so liwa-liwatda gumafu so angngurugga sike Jesus. 10 Antu sitoye, saay se pure-pureban diyaw i Dios? Saay se padiyatan diyaweno bakkan a Hudyuwera a makimoray si katunungan ira i Dios a neyaddana sike Moises? Se maski ikkanetam a Hudyuwera anneno aggidiyafuwantam ira siin nabayagin a tiyempu, ammetam makatuntul. 11 Ammena nad kunna sinay se mangurug etam a matabbut etamma kakunna yo pattabbutna sikwara gumafu so simpat i Afu Jesus.”
12 Sinuminak ino tolayera a maningnga-ningngag sike Bernabe anni Pablo patamu so kallalaggat a milagruwera a nepaangwa i Dios sikwara so bakkan a Hudyuwera. 13 Akkabalinda a nassapit, kunna i Santiago, “Wawwayik, maningngag kayu sikwak. 14 Sinapit i Simon Pedro sikwayuweno palungu a nangipaitan i Dios si aggidduknga so bakkan a Hudyuwera anna nappili si korwan sikwara a mattabali si tolenera. 15 Iyaw a inangwa i Dios e sinapit so neturak a sapit i Dios so profetera siin nabayagin a tiyempu a kunna i Dios,
16 ‘Akkabalinna iyaw e muliyaknga,
anna pataddaggangkuna imman ino nadaral a pattangngalan i David.
maski nu nadaral, pataddaggangkuna imman.
17 Antu yo akwangku takesi amminan a tolayera e intufukanda i Afu Dios—
maski yo amminan a bakkan a Hudyuwera a pinilik a mattabali si tolek ira. 18 Antuweyaw yo sinapit i Afu Dios a nebalaggona siin nabayagin a tiyempu.’ ”a
19 Kunna pay i Santiago, “Na ana si nakamku, ammetam nad padiyatan ino bakkan a Hudyuwera a mangurug sike Dios. 20 Udde turakkantam nad ira takesi itundutamma sikwara a ammera nad mangngan si laman na aggayam ira a nesakrifisyu so sasan-dios ira. Ammera nad makidurug si bakkanda a atawa. Ammera nad mangngan si napattal a aggayam anna ammera mangngan si dā na aggayam ira. 21 Ammera nad akwan maski nenay sitawera a kiya-kiyan, gumafu se ana kepay tolayera so kada lubbun a manunturu si Katunungan i Moises. Na sapit ira i Moises e nabibbid so sinagoga kada Aw na Aggimemmang si oddu a rawun.”
Na Turak so Minangikkurug Ira a Bakkan a Hudyuwera
22 Antu nammu-ammung sinayeno apostol ira, ino manannakam anneno amminan a grupu na minangikkurug ira e nattaretabbanda a mappili si lallakiyera a maggabwat sikwara ingkepay takesi mebulun irana sike Pablo anni Bernabe a umang so Antiokia. Pinilira i Judas a pinangananda pay si Barsabas anna pay i Silas. Afu-afuwereno minangikkurug ira. 23 Nepatubugga sikwareno turak a kunna sitaweno nilawumma:
“Ikkami a apostol ira anna manannakam sito Jerusalem, antuweyaw yo turakmi sikwayu a minangikkurug ira a bakkan a Hudyuwera so Antiokia, Siria, anna Cilicia.
24 “Naammuwammi a gulu-gulun dakayuweno korwan a bulummi a naggabwat sitaw, maski nu ammemiyera a dundunan. Anna kungku-kungkulan dakayu megafu si ituntu-tunturura. 25 Nabu nattatammi a mangiyang sikwam si tolayera. Bulun ira da Bernabe anni Pablo a iddu-iddukammi. 26 Nasserbi da Pablo anni Bernabe sike Afutam a i Jesu Kristo maski nu mammeligru yo angatda. 27 Pinilimi pay da Judas anni Silas a mebulun sikwara a manaddag meafu sitaw a neturakmi.
28 Na kanggammi a sapitan sikwayu e antu pay yo kanggam ino Espiritu i Dios, se nepadandamma sikwami a ammemi kayu padiyatan a dumandan so amminan a katunungan i Moises, fuwera lamang iyawera a maawag diyaw a tuntulan: 29 Amme kayu nad mangngan si laman na aggayam ira a nesakrifisyu so sasan-dios ira, dā na aggayam ira laman na aggayam ira a napattal, anna amme kayu makidurug si bakkan diyaw a atawa. Mapiya nu ammeyu akwan iyawera. Antuweyaw amminan ino kanggammi a sapitan sikwayu. Kiyad lamangin sitaw.”
30 Antu nedundundera a umang so Antiokia. Sin dinumatang ira sinay, inammunggeno minangikkurug ira anna nedawawareno turak sikwara. 31 Sin binibbiddeno turak, maanggam irengke gumafu so mapiya a tabarangnga. 32 Profeta pay da Judas anni Silas e oddu yo sinapitda so mawwayi takesi mapatuyag ino nakamda anna angngurugga. 33 Akkabalinda a nagyan sinay si pigya aw, naddasal ino minangikkurug ira a imuranderana i Dios dengkera maddoyug. Antu nuliyera so inoyera a nanundun sikwara. 34 [Udde kanggam i Silas a mappabattang sinay.]
35 Sigigyan da Pablo anni Bernabe so Antiokia a manunturu anna mabbalaggaw si sapit i Afu Jesus. Oddu pay yo kolakdera a nanuffun sikwara a manunturu sinay.
Na Akkasina da Pablo anni Bernabe
36 Nappaseno pigya aw, sinapit i Pablo sike Bernabe, “Gannonanteno minangikkurug ira so luga-lugar a nanunturuwanta si sapit i Afu Dios takesi itanta nu manantaweran.” 37 Kanggam i Bernabe a ibulunda i Juan Markus. 38 Udde ammena kanggam i Pablo se sin nagyan ira so Pamfilia, nebattang ira i Juan Markus e ammena binalin a manuffun sikwara so tarabafura. 39 Ammena inumannung i Pablo sike Bernabe antu nassinera adwa. Nebulun i Bernabe i Markus, e nallayad ira a inang so Cyprus. 40 Nebulunna pay i Pablo i Silas. Liyera nanaw, dinasallan ino minangikkurug ira a duffunan irana i Dios so amminan a luga-lugar a anganda. 41 Inang da Pablo anni Silas so Siria anna so Cilicia anna pinatuyaggeno angngurug ino grupu na minangikkurug ira.