Nebulun i Timoteo Sikwara Pablo Anni Silas
16
Inang pay da Pablo anni Silas so Derbe anna so Listra. Ana yo disipulu i Jesus a minganan si Timoteo a nagyan sinay. Hudyuweno inana a mangurug sike Jesus udde Griyegoweno amana. 2 Ilawengkeno mawwayi da Timoteo so Listra anna so Iconio. 3 Kanggamma i Pablo a ibulun i Timoteo so korwan a luga-lugar. Nabu binanggitna baggina gumafu se yo Hudyuwera sinay a luga-lugar e ammura a bakkan a Hudyu i amana. 4 So amminan a lubbun a nanganda, netundura so minangikkurug ira yo panuntulan anna desisyon na apostol ira anneno manannakam so Jerusalem a maawag a matuntul. 5 Antu nattuyag ino angngurug ino grupu na minangikkurug ira e kada aw a madagga-daggan ira.Na Paimata i Pablo Patamu si Tata Tolay so Macedonia
6 Inang da Pablo anneno bulunnera so Frigia anna so Galacia se neyallang ino Espiritu i Dios sikwara a massapit si sapit i Dios so Asia. 7 Sin dinumatang ira so Misia, kanggamda a umang so Bitinia, udde neyallang imman ino Espiritu i Jesus sikwara. 8 Antu nattalebad ira so Misia e inang ira so Troas. 9 Kagafiyananna, nepaitana i Dios sike Pablo ino paimatan na tata lalaki a taga-Macedonia a nakataddag a makigumallak sikwana a nakkun, “Umang kayu sitaw Macedonia e duffunan dakami.”
10 Akkabalinna a naiteno paimatan, siddarat kami a ginumikkat a umang so Macedonia gumafu se nangurug kami a naayan dakami i Afu Dios a mebalaggaweno Mapiya a Baga so tolayera sinay.
Nattabali i Lydia a Minangikkurug so Filipos
11 Mamefu so Troas, nallayad kami paumang so Samotracia. Kadaddaramatanna, dinumatang kami so Neapolis. 12 Naddassag kami sinay e nallakad kami a inang so Filipos a kaawan ingke a lugar na Macedonia. Oddu pay a taga-Roma a nagyan sinay a lubbun. Nagyang kami sinay si pigya aw.
13 So Aw na Aggimemmang, nallawang kami so lubbun e inang kami so māt se arigmi a ana lugar a paddasallan na Hudyuwera sinay. Nakituttud kami so bafabbayera a nammu-ammung sinay e nakitetabbag kami sikwara. 14 Ana tata bafay sinay a minganan si Lydia a naningnga-ningngag sikwami. Taga-Tiatira baggina anna gumallaku si mangina a lilak a sinnun. Maski bakkan a Hudyu baggina, dayawanna i Dios e pinaintindina sikwaneno sapit ira i Pablo anna kinurugnga. 15 Sin nabawtismuwan i Lydia anneno familyana, inimbitanna etam a nakkun, “Nu ibilanggak a gakkurug a gumasserbi i Afu Jesus, umang kayu magyan so balek.” E ammemi dama a ammayan baggina antu inang kami so balena.
Na Akkefukuk da Pablo anni Silas so Filipos
16 Namitta aw, sikwami a inang so lugar a paddasallan, dinumafung sikwamiyeno abbing a bafay a imbut a naaffunan si demonyu a mangiyadda sikwana si nammu a mammalad. Dokal ino intufuk ino amunera gumafu so pammaladna. 17 Maumid a dandanan dakami iyaw a sultera e kunna sitaweno sapi-sapitanna, “Iyaw a tolayera e gumasserbi i Dios a Makapangwengke si amminan! Ibalaggora sikwayuweno pakatabbutan diyaw!”
18 Kinaaw a akakwanna iyaw makiyad si natappag i Pablo. Antu tinallangngeno abbing a bafay e kunna so demonyu, “Si pakandama i Jesu Kristo, tunan taka a mallawangka sikwana.” E siddarat a nallawan ino demonyu so abbing a bafay.
19 Sin naammuwan ino nimbut ira sikwana a awanin a pangappanda si pirak, ginafutda i Pablo anni Silas e ginonggo-gonggondera so merkado e netallanggera so gumattangngal ira. 20 Kunda so gumattangngal ira, “Iyawera e Hudyu anna gulunda yo lubbuntam, 21 se ituntu-tuntureno ammena meyannut si katunungantam a Romano. Ammetam dama a tuntulan ino gagangera.”
22 Oddu so tolayera a nebulun so inoyera a maddamba-dambal sikwara Pablo anni Silas. Tinunan na gumattangngal ira yo sundaluwera a lubbungan ino barasi da Pablo anni Silas e pinefunanda a pinalu-paluk ira. 23 Akkabalinda a napalu-paluk, neyanggera so paffukukan. Tinunandeno guwardiya na paffukukan a magguwardiya sikwara si mapiya. 24 Gumafu se antu yo sinapitda sikwana, neyangngera so kaunaggan na paffukukan e siniggutandeno takkira so nallatanan na dokal a kayu.
25 Sin mattangngen ino gafi, maddasa-dasal anna makkanta-kanta da Pablo anni Silas si imnuwera sike Dios, e maddingnga-dingngag sikwareno korwan a fukuk ira. 26 Lannat a nallunig si matuyag ingke e nayuyyuk ino fundasyon na paffukukan. Siddarat a nabukkatan ino lenab ira e nalakkat amminan ino kawad ino fukuk ira. 27 Nagamyeno guwardiya na paffukukan e naitaneno lenab ira a nakabukkat. Arignga a nakatamangin ino fukuk ira. Tinukkutneno espadana e maggi patayanneno baggina. 28 Udde naggirawa si madappa i Pablo a nakkun, “Ammem palowan yo baggim ingkepay. Ana kami amminan sitaw.”
29 Narang ino guwardiya na paffukukan si sirwat. Nakkangkam baggina a tinumallung so nagyanan da Pablo anni Silas e nallabba so allanganda a mayyayyak si talaw. 30 Akkabalinna, nepalawannera so paffukukan e kunna, “Afuwera, nenay yo akwangku takesi matabbutak?”
31 Kunda sikwana, “Mangurugka sike Afu Jesus takesi matabbutkana anneno katabbalem.” 32 Nepakaammureno sapit i Dios sikwana anna si amminan a ana so balena. 33 Sitan keppay a gafi, neyang ino guwardiya na paffukukan da Pablo so nagyanan ino danum. Binagguwanneno bariyandera e siddarat a nabawtismuwan ino interu a katabbalena. 34 Nebulunna da Pablo anni Silas so balena e pinakkannera. Maanggam ingkeno guwardiya anneno interu a katabbalena gumafu se mangurug ira sike Dios.
35 Kadaddaramatanna, nanundun ino gumattangngal ira si sundaluwera a umang so guwardiya na paffukukan takesi palawanannana da Pablo anni Silas. 36 Antu sinapit ino guwardiya na paffukukan sikwara Pablo, “Sinapit ino gumattangngal ira a damayun a mallawan. Kunnantu, ingkayun si piya.”
37 Udde sinapit i Pablo so sundaluwera, “Nepalassit dakami so allangan na tolayera e nepafukuk dakami a ammena kepay a naimbestigan si mapiya kunsi katalubbunang kami na Roma. Sitoye, kanggam diyaw a palawanan dakami a awan makaammu. Ammena dama! Na gumattangngal ira yo maawag a umang anna mangilawan sikwami.”
38 Inang ino sundaluwera so gumattangngal ira e netundura sikwareno sinapit i Pablo. Nattalawera sin nadingngagga a Romano da Pablo anni Silas. 39 Antu inang ino gumattangngal ira so paffukukan e narang ira si pammakoma sikwara. Akkabalinna, nelawandera e inarangga sikwara a anawanda iyan a lubbun. 40 Sin nallawan da Pablo anni Silas so paffukukan, inang ira so balay i Lydia. Kinaabiddeno minangikkurug ira a naammung sinay e pinatuyaggeno angngurugga, liyera nanaw sinay a lubbun.