Na Gulu so Tesalonica
17
Naddoyug da Pablo anni Silas so Amfipolis anna Apolonia makiyad si nadutunggeno Tesalonica nu sintaw ana a sinagoga. 2 Inang i Pablo so sinagoga se antu yo gagangena. Si tallu Aw na Aggimemmang, nakitinnulyat baggina sikwara so sapit i Dios. 3 Binarifitna anna nepruwebana a maawag a matay i Kristo anna mantotolay. E kunna, “I Jesus a ibalaggoknga sikwayu e antu i Mesiya.” 4 Ana yo korwan a Hudyuwera a nangurug so sinapitna e nebulun ira sikwara Pablo anni Silas. Ana pay yo korwan ira a bakkan a Hudyuwera a maddaya-dayaw sike Dios anna mammannag a bafabbayera a nebulun sikwara.5 Udde yo Hudyuwera a ana sinay e mafu anna si duffun na maral a lallakiyera, nagguluwera so lubbun. Sikwara a intu-intufukan i Pablo anni Silas takesi metallang ira so tolayera, finuwersara a tinallung ino balay i Jason. 6 Udde sin ammerera matumpalan, ginafutda i Jason anneno korwan a minangikkurug ira e ginonggo-gonggondera so gumattangngal ira na lubbun. E negirawara, “Inoyera a tolay a naggulu so korwan a lubbu-lubbun e inang ira pay sitaw. 7 E pinadulotna i Jason da Pablo anni Silas so balena. Amminan a aggangwara e metulyat si katunungan ira na Emperador se kunda a ana korwan a patul a minganan si Jesus.” 8 Mabbungut ino tolayera anneno gumattangngal ira sin nadingngagga iyaw. 9 Pinappiyansara da Jason anneno bulunnera liyera nepaanaw.
Da Pablo anni Silas so Berea
10 Kagafiyananna, nepaanoreno minangikkurug ira da Pablo anni Silas a umang so Berea. Sin dinumatang iran sinay, inang ira so sinagoga. 11 Nannakam ino Hudyuwera so Berea ammat ino Hudyuwera so Tesalonica gumafu se kalakanggammanda a anappan ingke a maningngag so sapit i Dios meafu sike Jesus. Kinaaw a kinalakammureno neturak a sapit i Dios takesi ammunda nu gakkurug yo sinapit i Pablo. 12 Kunnantu, oddu sikwareno nangurug kunnapay yo oddu a mammannag a bafabbayera anna lallakiyera a Griyego.
13 Udde sin nadingngag ino korwan a Hudyuwera so Tesalonica a nanunturu i Pablo si sapit i Dios so Berea, inang ira pay sinay e sinussuwandeno tolayera takesi maggulu. 14 Siddarat a pinaanoreno minangikkurug ira da Pablo a umang so dappit na bebay. Udde nabattang da Silas anni Timoteo so Berea. 15 Inoyera a nangitulud sike Pablo e nebulun makiyad so Atenas. Kapiyena a nakaarasaw si tun ira sike Pablo a mebulun sikwana da Silas anna Timoteo si ammena nabbayag, inanawanda baggina.
Na Netundu i Pablo so Atenas
16 Sikwana a minda-indag i Pablo sike Silas anni Timoteo so Atenas, malowengkeno nakamma gumafu se oddu a naitana a sasan-dios ira. 17 Antu yo inanganna so sinagoga a makitinnulyat so Hudyuwera anna so bakkan a Hudyuwera a maddayaw sike Dios. Kinaaw a umang baggina so merkado a makibinnarifit so tolayera a ana sinay. 18 E ana pay yo korwan a mapoporay a mestruwera na adwa a grupu a maayan si Epicureo anna Estoico a nakitinnulyat sikwana. Sinapit ino korwan sikwara, “Nenay nakuyeno sapi-sapitanna iyaw a palagofog?”
Udde kundeno korwan ira, “Tameta immangke nakuyeno dios a abi-abiranna.” Sinapitda inay gumafu se nanunturu i Pablo meafu sike Jesus anneno panantotolena. 19 Antu neyangga i Pablo so passosoronnungan na afu-afuwera na tarabbunan ira a minganan si Areopago e kunda sikwana, “Kanggammi a maammuwan iyaw a bawu a panunturu a sapi-sapitannu. 20 Mattuntu-tunturuka si bawu a kiya-kiyan a kallalaggat sikwami, antu kanggammi nad a maammuwan nu nenay a kanggamma sapitan.” 21 Sinapitda iyaw sike Pablo gumafu se yo taga-Atenas anneno ipping ira a migigyan sinay e awan akakwanda nu bakkan mattaretabbag anna maningngag si bawu a tunturuwera.
22 Nattaddag i Pablo so allanganda e kunna, “Ikkayu a taga-Atenas, maitak a relisyoso kayuwengke si oddu a kiya-kiyan. 23 Se sin inangngak so lubbun diyaw, nilangngik si mapiya yo kiya-kiyan a dayawan diyaw. E naitak ino tata altar a ana yo neturak a kunna iyaw: ‘Antuweyaw yo altar so dios a ammemi ammu.’ Na dayawan diyaw a ammeyu ammu, antu yo ibalaggoknga sikwayu. 24 Antu i Dios a namaratu si talubaggan anna amminan a ana sitaw. Ammena migyan so luga-lugar a nepataddag ino tolayera a pangiyekwanan diyaw si imaheyuwera. 25 E ammena a maawag pay yo maski nenay a duffun ino tolay imbes, mangadda baggina si angat anna amminan a kiya-kiyan a maawagtam. 26 Baggineno namaratu so palungu a tolay anna naggabwat sikwana amminan a naddadaruma a tolayera a migigyan so maski sintaw sito talubaggan. Dinesisyonanna si fustu nu nainsa anna sintawera a migyan. 27 Kanggam i Dios a maintufukan ino tolayera baggina, tantaro so pintufukda sikwana e matumpalanda baggina se ammena aroyu sikwatam amminan. 28 Kakunna yo neturak a sinapit ino tata tolay,
‘Gumafu sikwana e natolay etam,
makaguyu etam
anna mattabali nu yanya etam.’
Sinapit pay yo korwan a gumatturak ira sinoy a nakkun,
‘Anaknga etam.’
29 Gumafu se anak etam i Dios, ammetam nonotan a baggina e kakunna lamang na bulawan onnu diplata a pirak onnu batu a inangwa na nonot anna kamat ino tolay. 30 Siin, pinurayan i Dios ino maral a akakwan na tolayera gumafu se ammera kepay ammu baggina. Udde sitoye, idundunna so tolayera so amminan a luga-lugar a maawag a mabboboliyera so maral a akakwanda. 31 Se nappili i Dios si aw a mannunut si amminan a tolayera sito lubag megafu si tata tolay a pinilina. Nepruwebana iyaw so amminan a tolayera sin pinantotolena inay a tolay.”
32 Sin nadingngaggeno sinapit i Pablo megafu so panantotolayeno natay, yo korwan sikwara e iniyoyunganda baggina, udde kundeno korwan ira, “Kanggammi imman a madingngag sikwam meafu sitaw.” 33 Akkabalinda a sinapit inay, nanaw i Pablo so passosoronnunganda. 34 Udde nebulun sikwaneno korwan ira e nattabali si minangikkurug ira. Tata sikwara i Dionisio a kaaffuyug na Areopago anna tata bafay a minganan si Damaris anna korwan a minangikkurug ira i Jesus.