Na Nakwa sike Pablo so Corinto
18
Akkabalinna a nabid i Pablo so affuyug na Areopago, nanaw baggina so Atenas e inang so Corinto. 2 Naammu-ammuna sinayeno Hudyu a mingan si Akila a neyanak so Ponto. Kagugumwangnga a naggabwat so Italya bulunna yo atawana a i Priscila. Nanawera sinay gumafu se pinaanaw i Emperador Claudio ino amminan a Hudyuwera so Roma. Nakiinnita i Pablo sikwara. 3 Gumafu se mapparefuweno tarabafura a mangwa si tolda, nakiigyan anna nattarabafu baggina sikwara. 4 Kada Aw na Aggimemmang, umang i Pablo so sinagoga a nakitinnulyat so Hudyuwera anneno bakkan a Hudyuwera takesi mangurug ira sike Jesus.5 Sin dinumatang da Silas anni Timoteo a naggabwat so Macedonia, neyusana i Pablo ino interu a tiyempuna a mabbalaggaw anna manaddag so Hudyuwera a i Jesus e yo Mesiya. 6 Udde sin kinontra anna ininsultu na Hudyuwera i Pablo, pinampagngeno girafuk so barasina a mangipaita a i Dios e tumulyat sikwara e kunna, “Nu kastiguwang kayuna i Dios, bakkangku a liwat iyan, liwat diyaw ingkepay. Mamefu sitoye, umangak so bakkan a Hudyuwera.”
7 Antu nanaw i Pablo so sinagoga e inang baggina so balay i Ticio Justo a bakkan a Hudyu a gumaddayaw i Dios. Na balena e aranni so sinagoga. 8 Antu i Crispo a afu-afu na sinagoga anneno familyana e nattabali si minangikkurug ira i Jesus. Oddu pay a taga-Corinto a naningngag sike Pablo anna nangurug anna nabawtismuwan ira amminan.
9 Tata gafi, nappaimatan i Afu Jesus sike Pablo e kunna, “Ammeka mattalaw. Ibali-balinnu a manunturu e ammeka mimemmak a massapit so tolayera meafu sikwak, 10 se anaak sikwam. Awan mappalowna sikwam se oddu a tolek sitaw a lubbun.” 11 Antu nagyan i Pablo sinay si tata kagadwa a dawun a manuntu-tunturu si sapit i Dios so tolayera.
12 Udde sin naggubernador i Gallio so Acaya, nattatarateno afu-afuwera na Hudyuwera a maggafut sike Pablo e neyangga baggina so pannunutan. 13 E kunda, “Iyaw a tolay e angga-anggammanneno tolayera a maddayaw sike Dios a pakaangwan a metulyat si katunungammi.”
14 Sin massapit nad i Pablo, kunna i Gallio so Hudyuwera, “Nu ana inangwana a metulyat si katunungan onnu inangwana a maral, maningngaggak sikwayu a Hudyuwera. 15 Udde gumafu se mattitinnulyat kayu patamu si sapit ira, ngan ira anneno katunungan diyawera, ikkayun ino makammu. Ammek kanggam a mannunut sitawera a kiya-kiyan.” 16 E pinaanawnera so pannunutan.
17 Akkabalinna, ginafutda i Sostenes a afu-afu na sinagoga e sinuntukda so allangan na pannunutan udde ammena nepassilanga i Gallio.
Na Pannuli i Pablo so Antiokia
18 Nakiigyan i Pablo so minangikkurug ira so Corinto si oddu a aw. Akkabalinna, nappakammu a manaw baggina so minangikkurug ira sinay e nallayad paumang so Siria anna binulunanna da Priscila anni Akila. Sin dinumatang ira so Cencrea, nappakikkit si ulu i Pablo a mangipaita si nabalinnan ino tambana sike Dios. 19 Sin dinumatang ira so Efeso, inanawanna i Pablo da Priscila anni Akila. Liyena a nanaw, tinumallung baggina so sinagoga a nakibinnarifit so Hudyuwera. 20 Nakiapilera sikwana a mabbayag nad a magyan sinay, udde nammay baggina. 21 Inanawannera e kunna sikwara, “Nu uray i Dios, muliyaknga sitaw.” E nallayad baggina paumang so Siria.
22 Sin dinumatang i Pablo so Cesarea, inang baggina so Jerusalem tapenu gannonanneno grupu na minangikkurug ira anna nuli baggina so Antiokia. 23 Nimemmak baggina sinay si ammena nabbayag e naddoyug imman. Inanganna amminan a tarabbunan na Galacia anna Frigia anna nanunturu baggina meafu sike Jesus so minangikkurug ira takesi mattuyag ino angngurugga.
Na Panunturu i Apolos so Efeso anna so Corinto
24 Sitoye, tata Hudyu a minganan si Apolos a dinumatang so Efeso. Neyanak baggina so lubbun na Alejandria. Maporay a manunturu e oddu yo ammuna patamu so neturak a sapit i Dios. 25 Natunturuwan baggina meafu so Dalan i Afu e mattalaginnay a nassapit anna nanunturu si fustu meantu sike Afu Jesus. Udde yo ammuna pelamang e yo bawtismu a netunturu i Juan so tolayera. 26 Matuyag ingkeno nakamma a massapit so sinagoga. Sin nadingngagga Priscila anni Akila ino netunturuna, inayanda baggina so balera takesi ipabarifit si mapiya sikwaneno ammena kepay nadingngag meantu sike Jesus anna mas maintindiyan si mapiya yo Dalan i Dios.
27 Sin kanggam i Apolos a umang so Acaya, yo minangikkurug ira so Efeso e dinuffunanda baggina anna natturak ira so minangikkurug ira so Acaya takesi arasawandana baggina. Sin ginumumwang i Apolos sinay, dokal ingkeno neduffunna so minangikkurug ira gumafu so simpat i Dios sikwara 28 gumafu se awan a makwa sikwaneno Hudyuwera so pattitinnulyatda so allangan na tolayera. Megafu si sapit ira i Dios e prinuwebana a i Jesus ino Mesiya.