I Pablo so Efeso
19
Sikwana a ana so Corinto i Apolos, nattalebad i Pablo so kabakuluran a lugar paumang so Efeso. Sin nakadutung ira sinay, nadafunggeno korwan a minangikkurug ira i Jesus. 2 Kunna sikwara, “Naarasoyun kad yo Espiritu i Dios sin nangurug kayu?”Kunda, “Awan, ammemi kepay nadingngag a ana Espiritu i Dios.”
3 Naffuut i Pablo, “Nenay a bawtismu yo naarasoyu?”
Tinumabbag ira, “So bawtismu a netunturu i Juan.”
4 Kunna i Pablo, “Patamu so pabbawtismu i Juan, iyaw e mangipaita a nabboboliyen ino tolayera e tinalekkurandan ino maral a aggalangwara. Sinapitna kepay a maawag a mangurug ira so tumufad sikwana awan korwan nu bakkan i Jesus.”
5 Sin nadingngagga iyaw, nabawtismuwan ira a gumaladandan ira i Afu Jesus. 6 Sin nepotun i Pablo ino kamatna sikwara, dinumassag ino Espiritu i Dios sikwara, e nassapit ira si naddadaruma a sapit a bakkanda a sapit anna netundureno nepasapit i Dios sikwara. 7 Maturuk makurang si tafulu adweno lallakiyera a nappabawtismu.
8 Tallu dakkag a nanunturu i Pablo so sinagoga a awan talona. Inanggammanneno tolayera meafu so pattangngal i Dios. 9 Udde ana korwan ira a mataggat yo urera anna ammera mangurug, anna kinakata-katawandeno tunturu meafu so Dalan i Afu Jesus. Antu nebattang ira i Pablo e nebulunneno nangurug ira sike Jesus e nebali-balinneno panunturuna so piskwelan a nepataddag i Tirano. 10 Nebali-balin iyaw si adwa rawun antu amminan a taga-Asia e nakadingngag meafu sike Jesus kunnapay so Hudyuwera anna bakkan a Hudyuwera.
Na Lallaki a Anak i Sceva
11 Nangwa i Dios si kakkapallat a milagruwera megafu sike Pablo. 12 Nekangkalin ino korwan a tolayera ino panyok ira anneno sinnun ira a panglawan a neyusa i Pablo e nepotunda so matakit ira. Nammapiyeno matakit ira e nanaweno demonyuwera sikwara.
13 Ana Hudyuwera a manondoyug a mappapaanaw si demonyuwera so naaffunan ira. Pinureban iyaw a Hudyuwera a usan ino ngan i Afu Jesus takesi mapalawan ino demonyuwera so tolayera. Kunda amminan, “Si antu keppay a Jesus a ibalaggaw i Pablo, itungku sikwayu a mallawang kayu!” 14 Akakwan iyaweno pitu a lallakiyera a anak i Sceva a katannangan a pari na Hudyuwera.
15 Udde sinapit na demonyuwera sikwara, “Ammu-ammuk i Jesus anni Pablo udde danya kayu?” 16 Na lalaki a naaffunan e nallattu sikwara anna sinuntu-suntukngera amminan. Inaffutnera amminan antu nabaryan anna nalubbungan ira a nallawan so balay.
17 Sin naammuwan amminan na Hudyuwera anna bakkan a Hudyuwera a migigyan so Efeso ino nakwa so pitu a lallakiyera, natalawan ira amminan e annanot a dinayora i Afu Jesus gumafu so pakapangwana. 18 Antu ginumumwang ino oddu a minangikkurug ira a itundu-tundureno kagakkuruwan na maral a inangwara. 19 Na korwan a madyikeruwera siin a nattabaliyeran si minangikkurug e inammunggeno neyusara a pammadyikeru e tinaggabba so allangan na tolayera. Mabbalor si limafulurifu a pirak a diplata yo tinaggabba. 20 Gumafu sitaw, nebali-balin a nepakaammuweno baga meafu sike Jesus anna inumoddu yo minangikkurug ira.
Na Gulu so Efeso
21 Sin nabalinin iyawera a nedemmu, yo Espiritu i Dios e negiyana i Pablo a umang so Macedonia anna so Acaya liyena paumang so Jerusalem. Kunna, “Paggabwatku so Jerusalem, maawagku pay a umang so Roma.” 22 Antu palungu a pinaumangnga so Macedonia da Timoteo anni Erastu a manuffu-nuffun sikwana so asserbi sike Afu sikwana a nappabattang so Asia si bisang kepay a tiyempu.
23 Sinoy a tiyempu, ana naangwa a dokal a gulu so Efeso meafu so Dalan i Afu Jesus. 24 Ana tata lalaki a mingan si Demetrio a mangwa-angwa si bawissasang a pirak a templu ira a kakunna yo templu na diosda a i Artemis. Na tolayera a mangwa-angwa si kunna sitawera e dokal ino intufukda. 25 Inammungngeno amminan a gumattarabafuna anneno korwan ira a kakunnana yo pintufukan anna kunna sikwara, “Bulungkuwera, ammuyu a iyaw a tarabafutam ino paggabwatan na wara-waratam. 26 Naitayu i Pablo anna nadingngag diyaweno sinapitna so tolayera a yo dios a inangweno tolayera e bakkan a gakkurug a dios. Oddu a tolayera sito Efeso a nangurug so sinapitna udde bakkan lamang sitaw nu bakkan so interu a Asia. 27 Anna anana yo tolayera a massapit si maral metulyat so pintufukantam. Udde bakkan lamang inay, maski yo Templu na diosatam a i Artemis e maawanan si serbi anna ammenan a dayawan ino tolayera, bakkan lamang sito Asia nu bakkan so interu a talubaggan.”
28 Sin nadinggaggeno sinapit i Demetrio, nakaallang irengke e naggirawera, “Padayawan i Artemis a diosatam sito Efeso!” 29 Oddu a tolayera so interu a lubbun a naningngag so sinapit i Demetrio makiyad si nakkaguluwera amminan. Ginonggo-gonggonda da Gaius anni Aristarco bulun ira i Pablo a taga-Macedonia so paddoyugnga anna nabbuburulun ira a nappala-palan a nakkarela so pabbuyan. 30 Kanggamma i Pablo a makiabid so allangan na tolayera udde amme nepabulun ino disipuluwera i Jesus, 31 maski yo korwan a ofisyales na kalubbunan a kolak ira i Pablo e nappatundu sikwana a ammenan nad mappadda so lugar a passosoronnungan na tolayera.
32 Daggun, annanot a nakkaguluweno tolayera gumafu se naddadarumeno igira-girawara anna kaodduwan sikwara e ammera ammu nu saay se anera sinay. 33 Nepataddag ino korwan a Hudyuwera ino tata tolay a minganan si Alejandro so allangan na tolayera e netundura sikwana nu nenay yo sapitanna. Sinenyatanna i Alejandro ino tolayera a suminak ira takesi ibarifitna sikwara a bakkan ino Hudyuwera ino pakegafuwan na gulu. 34 Udde sin naammuwanda a Hudyu i Alejandro, naggigirindan ira a naggirawa si adwa orat e kunda, “Madaya-dayaw i Artemis a diosatam sito Efeso!”
35 Udde sin ginumumwang ino kaawan a afu-afu na lubbun, napasinakngera. Kunna sikwara, “Kalubbunangkuwera a taga-Efeso, ammuweno tolayera a ikkanetam ino gumattabbud na templu i Artemis a daya-dayawan ino tolayera anneno imahena a nadannag a naggabwat si langit. 36 Kunnantu, ammu amminan a gakkurug iyan. Suminak etam anna amme kayu mangwa si sanna a pakaguluwantam. 37 Neyang diyaw sitaweno adwa a lallakiyera a awan liwatda gumafu se awan kinokotda so templutam anna awan inabidda a maral meafu sike Artemis. 38 Nabu, nu wara kanggam da Demetrio anneno bulunnera a ireklamu, ana yo usgaduwera, anna gumannunut ira. Sinayera a màakusa. 39 Nu wara kepay korwan a kanggam diyaw a maammuwan, maawag a pattataretabban diyaw si mapiya so aw na negagangay a passosoronnungan ino tolayera meantu so katunungan. 40 Gumafu sitaw a nedemmu sitoye a aw, damara a paliwatanda etam a naggulu so lubbun. Awan fustu a gafunengke iyaw a gulu.” 41 Kapiyena a sinapit iyawera, pinaulinan ino tolayera.