Na Aggang i Pablo so Macedonia anna so Grecia
20
Sin nabalinin ino gulu, inammung i Pablo ino disipuluwera i Jesus. Pinatuyagngeno nakamda anna nappakammu sikwara a manawin baggina e umang so Macedonia. 2 Sin nakadatang baggina so Macedonia, ginannonneno amminan a lubbun sinay e pinatuyagngeno nakam na minangikkurug ira. Akkabalinna, inang baggina so Grecia a maayan keppay si Acaya 3 e tallu dakkag a nagyan baggina sinay. Sin mattakayin nad baggina so bapor a paumang so Siria, naammuwanneno kanggam a akwan ino korwan a Hudyuwera metulyat sikwana antu nanonotna a muli so Macedonia. 4 Binulunan baggina i Sopatro a taga-Berea a anak i Pirro, kunnapay da Aristarco, Segundo a taga-Tesalonica, i Gayo a taga-Derbe, i Timoteo, da Tikikus anni Trofimo a taga-Asia. 5 Napalunguwera a inang e inindaggan dakami so Troas, 6 Akkabalinneno Fiyesta na Tinapay a Awan Labadurana, nallayad kami makiyad a nadutungmi yo Filipos e si mallima aw, nadatangngammiyera so Troas. Nagyang kami sinay si talingguwan.Na Mauddi a Aggannon i Pablo so Troas
7 So palungu aw na linggu, nammu-ammung kami a nangngan si tinapay a panandammi so akkapatay i Jesus. Nanundu i Pablo so tolayera makiyad si tangnga na gafi gumafu se manawin baggina si kadaddaramatanna. 8 Oddu a allamparan so uttun na kwartu a pammu-ammungammi. 9 Nakatuttud so sawang ino tata sulteru a mingan si Eutico. Sin mabi-abid kepay i Pablo, nakkatukap i Eutico e nadannag so meka-tallu palikad na balay. Natayin sin inakkitda. 10 Udde nullug i Pablo, nammalitud so karebbingnga anna ginakkapna e iniggammanneno kamat na natay e kunna, “Amme kayu a maburung, se natolay baggina.” 11 Nunek imman i Pablo e akkabalinna a ginadwa-gadweno tinapay e nangngang kami. Sin akkabalimmi a nangngan, nebalinna i Pablo a nanundu sikwami makiyad si maggibbat. Akkabalinna inay, nanawin baggina. 12 Neyulireno sulteru so balena e maanggam irengke se natolay baggina.
Na Paddoyug i Pablo so Mileto
13 Napalungu kami a nallayad paumang so Assos. Sinay kami makkaita anni Pablo se antu yo tunna sikwami gumafu se ammena kanggam a mabbapor udde gakkadna a maddoyug so lubag paumang sinay. 14 Sin nakkaita kami so Assos, nattakay baggina so nattakayammi e nabbuburulung kami a inang so Mitilene. 15 Nebali-balimmi a nallayad anna si kadaddaramatanna, dinumatang kami sinay aranni so fugu na Chios. E so tumufad a aw, nassippal kami so fugu na Samos anna si meka-tallu aw, nakadutung kami so Mileto. 16 Ninonot i Pablo a amme kami massippal so Efeso takesi amme kami matalantan so kalubbunan na Asia. Mappala-palan baggina a makadutung so Jerusalem takesi makagumwang kami sinay so aw na Fiyesta na Pentecostes.
Nakitetabbag i Pablo so Afu-afuwera na Efeso
17 Sin ana i Pablo so Mileto, nepaayagngeno afu-afuwereno grupu na minangikkurug ira so Efeso a makiabid sikwana. 18 Sin ginumumwang ira, kunna i Pablo sikwara, “Ammuyun ino akkatolek sin bulundak kepay mamefu sin pittak a inang sito kalubbunan na Asia. 19 Nappataibbafaak a nasserbi sike Dios so allangan na tolayera. Napurebangku a nattangit anna nadiyatanak gumafu so maral a gakkad ino Hudyuwera a kanggamdak a patayan. 20 Ammuyu a sinapitkuweno amminan a makaduffun sikwayu. Nanunturuwak sikwayu meafu sike Afu Jesus anna nanunturuwak kepay sikwayu so bafaleyu. 21 Nanunduwak so Hudyuwera anneno bakkan a Hudyuwera a maawag a mabboboliyera so liwa-liwatda anna mannuliyera sike Dios anna mangurug ira sike Jesu Kristo a Afutam.
22 “Sitoye, maawag a makimorayak sike Espiritu i Dios, umangak so Jerusalem maski ammek ammu nu nenay yo makwana sikwak sinay. 23 Na ammuk pelamang e iyaw: so kada lubbun a tinalebarangku, ipakaammuweno Espiritu i Dios sikwak a yo minda-indag sikwak e akkefukuk anna pammadiyat. 24 Udde maski nu matayak, ammek ikenga yo angatku se kanggammangku a balinan ino nepaangwa i Afu Jesus sikwak a manundu so Mapiya a Baga meafu so simpat i Dios.
25 “Nakilamu-lamuwak sikwayu sikwak a mangibala-balaggaw meafu so pattangngal i Dios. Sitoye, ammuk a ammerakunna imman a maita. 26 Nabu, sapitangku sikwayu sitoye a nu wara sikwayu a ammena matabbut, bakkangkun iyan a liwat. 27 Se ipakaammuk sikwayuweno amminan a gakkad i Dios. 28 Antu imuran diyaweno baggiyu kunnapay so bulun diyawera gumafu se ikkayuweno piniliyeno Espiritu i Dios a mimud sikwara. Imuran diyawera si mapiya se ira yo tolayera i Dios a tinabbutna meafu so dā na Anaknga. 29 Ammuk a nanu manawakun, mebulunna sikwayuweno sasan-mestruwera a meyarig si simaron a aggayam ira e mapalowan ino minangikkurug ira a netalaknga i Dios sikwayu. 30 Kunnapay, tolayera so grupuyu ingkepay e manunturuna si ammena gakkurug. Igiyadaneno korwan a gumaladandan ira i Afu a meyaroyu so kagakkuruwan a dumandan sikwara. 31 Antu malertu kayu, ammeyu kalyawan a tinunturuwan takayu si tallu rawun, aw anna gafi e nassufriyak ingke gumafu se iddukan takayuwengke.
32 “Sitoye, netalak takayu sike Dios anna so sapitna a nappakaammu si simpatna. Na sapit ira i Dios ino mappatuyag sikwayu anneno makaiyadda si pammakapiyan ira a neparan a iyadda para so neyapartera sikwana. 33 Ammek nilyaw si pirak, barasi onnu maski sanna sikwayu. 34 Ammuyu a nappakelak ingke takesi matolayak anneno bulungkuwera. 35 Kunna sitan ino maumid a inangwak takesi tuntulandak takesi ana maiduffuntam so makaawag si duffun. Pakanonotantam ino sinapit i Jesus a kunna, ‘Mapiyengke i Dios so inoyera a mangadda ammat so makaarasawera.’ ”