Na Paddoyug i Pablo so Jerusalem
21
Akkabalimmi a nappakammu a manaw, nallayad kami e nakadutung kami so fugu na Cos. Sin metufad a aw, inang kami so fugu na Rodas e mamefu sinay, inang kami so Patara. 2 Sin nakaita kami si bapor a paumang so Fenisia, nattakay kami. 3 Naddoyug kami so bebay makiyad si nedipadmiyeno Fugu na Cyprus so dawimi. Dinumatang kami so Siria udde nimemmak abbuweno bapor so Tiro gumafu se mangidassag sinay si kargamentuwera. 4 Inintufukmiyeno minangikkurug ira i Jesus sinay e nakiigyang kami sikwara si talingguwan. Si paggiya na Espiritu, sinapitda sike Pablo a ammena umang so Jerusalem. 5 Sin dinumatangngin ino orat na paanawmi, nuli kami so bapor takesi ibali-balimmiyeno paddoyugmi. Amminan a gumaladandan ira maski yo bafabbayera anna abbing ira e dinumandan sikwami so dappit na bebay. Nammalitud kami amminan so dappit na bebay anna naddasal. 6 Akkabalimmi a nappakammu a manaw, nattakay kami so bapor e nuliyeran so balera.7 Mamefu so Tiro, nebali-balimmiyeno paddoyugmi e nakadutung kami so Tolemaida. Nakiinnita kami so wayiyera e nagyang kami sikwara sinay si tata aw. 8 Kadaddaramatanna, nanaw kami e inang kami so Cesarea anna inang kami so balay i Felipe a gumappakaammu si Mapiya a Baga, tata so pituwera a napili siin a manuffun so apostol ira so Jerusalem. 9 Ana appat a anaknga a sultera a profetera. 10 Sikwami a nagyang sinay si pigya aw, ginumumwang ino tata profeta a naggabwat si Judea a minganan si Agabo. 11 Inumaranni baggina sikwami e inappaneno gayakat i Pablo, sinigguttanneno takkinera anneno kamatnera e kunna, “Antuweyaw yo sinapit ino Espiritu i Dios, ‘Kunnapay sitaweno passiggut na Hudyuwera so makan-akwa si gayakat e liyera iyadda so bakkan a Hudyuwera.’ ”
12 Sin nadingngagmi iyaw, nakigumallak kami sike Pablo anneno tolayera sinay a ammenan a umang so Jerusalem. 13 Antu tinumabbag i Pablo, “Nenay akakwan diyaw? Mattangi-tangit kayu anna pakafu-kafuyan diyaw lamang yo nakamku. Nakaparanak, bakkan lamang a megakad kunsi kunnapay a matayak so Jerusalem para sike Afu Jesus.”
14 Udde gumafu se ammemi mafuwaddan baggina, sinuminak kami e kummi sikwana, “Makweno uray i Afu Dios.”
15 Nappasa si pigya aw, ginumikkat kami e inang kami so Jerusalem. 16 Nebulun sikwamiyeno korwan a minangikkurug ira i Jesus a naggabwat so Cesarea. Netulud dakami so balay i Mnason a taga-Cyprus a tata so palungu a gumaladandan ira i Jesus. Nakiigyang kami sinay.
Na Paggannon i Pablo sike Santiago so Jerusalem
17 Sin dinumatang kami so Jerusalem, maanggam a pinadulot dakamiyeno wawwayiyera si angngurug sike Jesus. 18 Kadaddaramatanna, ikkami da Pablo e nakiinnita sike Santiago anna ana pay sinayeno korwan a afu-afuweno grupu na minangikkurug ira. 19 Akkabalinna a kinidyot ira i Pablo, sinapitna amminan sikwareno inangwa i Dios so bakkan a Hudyuwera megafu so panunturuna.
20 Sin nadingngagga amminan a sinapitna, naddayawera amminan sike Dios. E kunda sike Pablo, “Ammu wayi, rinifu-rifuwen ino Hudyuwera a minangikkurug sike Jesus e mattalaginnayera a makimoray si katunungan i Dios a neyadda sike Moises. 21 Nadingngagga a netunturum so Hudyuwera a migigyan so lubbu-lubbun na bakkan a Hudyuwera a talekkurandeno katunungan ira i Moises. Sinapitnu kanu a ammera ipabanggit ino anakdera anna ammera tuntulan ino gagangetam a Hudyuwera.
22 “Nenay antu mapiya a akwantam sitoye? Maammuwanda a dinumatangka. 23 Antu akwannuweno itundumi sikwam. Ana yo appat a lallakiyera sitaw a nattamba sike Dios. 24 Mebulungka sikwara so Templu e akwan diyaweno akkalinis meantu so Katunungan. Ikkeno makammu a mappaga so pakkikkit so ulura a pemunuwan si nabalinin ino netambara. Nu kunna sitan ino akwannu, maammuwan amminan ino tolayera si ammena gakkurug yo nadingngagga meafu sikwam, se maski ikka e dumandan si katunungan ira i Dios a neyaddana sike Moises.
25 “Udde meafu so bakkan a Hudyuwera a mangurug sike Jesus, nangipatubug kami si turak sikwara a iyawera yo maawag a akwanda. Ammera nad mangngan si laman na aggayam ira a nesakrifisyu so sasan-dios ira, dā na aggayam ira, laman na aggayam ira a napattal. Netundumi pay sikwara a ammera nad makidurug si bakkanda a atawa.”
26 Antu kadaddaramatanna, nebulun i Pablo ino appat a lallakiyera e inangwareno akkalinis meantu so Katunungan. Akkabalinna, inang baggina so Templu e netunduna so pariyera nu nainsa a mabalin ino fustu a tiyempu na akkalinis takesi maiwalliyeno aggayam ira para si siggatatan sikwara.
Na Akkagafut i Pablo so Templu
27 Sin aranniyen a mabalin ino talingguwan na pakkalinis, ana yo Hudyuwera a naggabwat so Asia a nakaita sike Pablo so Templu. Sinussuwandeno tolayera a mallang sike Pablo. Ginafutda baggina e 28 igira-girawara, “Bulummi a Israelitera! Duffunan dakami! Antuweyaw yo tolay a nanuntu-tunturu so tolayera so amminan a lugar metulyat sikwatam a Israelitera, anna metulyat si katunungan i Moises anna iyaw a Templu. Sitoye, naawan ino pakkasagradu na Templutam gumafu se nepatallungngeno bakkan a Hudyuwera.” 29 Sinapitda iyaw gumafu se naitara i Trofimo a taga-Efeso a nebulun sike Pablo so Jerusalem e arigga si nepatallungnga i Trofimo so Templu.
30 Antu nakkaguluweno tolayera so Jerusalem. Nappala-palan ira a inang so lawan na Templu, ginafutda anna finuwersara a nelawan i Pablo so Templu e siddarat a neserrareno tarangka. 31 Patayandan nad i Pablo udde ana yo nangipakaammu so kumander na sundaluwera na Romano a nakkaguluweno tolayera so interu Jerusalem. 32 Siddarat a nangibulun ino kapitan na sundaluwera si sundaluwera anneno kapitandera. Sin naitereno tolayera, inibbattandeno manuntuk sike Pablo.
33 Inumaranniyeno kumander na sundaluwera sike Pablo e ginafutna anna pinasiggutna si adwa a kawad. Finuutneno tolayera e kunna, “Yanya iyaw a tolay anna nenay yo inangwana?” 34 Naddadarumeno igira-giraweno tolayera e ammena ammuweno kumander nu nenay yo gakkurug a nedemmu. Antu sinapitna so sundaluwera a iyangga i Pablo so kampura. 35 Sin anen ira so kampu na sundaluwera, inakkitda na sundaluwera i Pablo gumafu se madungit ino tolayera. 36 Naggira-giraweno odduwengke a tolayera a dinumandan a nakkun, “Patayan baggina!”
Na Paddefensa i Pablo so Baggina
37 Sin itallungga nad i Pablo so kampura, kunna so kumander na sundaluwera, “Dama taka kad a makaabid?”
Kunneno kumander na sundaluwera, “Ammum mabid si Griyego? 38 Arigku nu ikkeno taga-Ehipto a kababalinna a nakigiyera so gubyernu anna nangipalungu so appat a rifu a lallakiyera a gumappatay si tolayera a inang so kulolawat.”
39 Tinumabbag i Pablo, “Bakkanak, tataak a Hudyu anna neyanakak so mammannag a lugar na Tarsus na Cilicia. Arangngangku nad sikwayu a ipabulun diyaw a makaabidkuweno tolayera.”
40 Antu neyannut ino kumander na sundaluwera a mabid i Pablo. Nattaddag i Pablo so addan e sinenyattanneno tolayera a suminak ira. Sin sinuminak iran, nabid baggina sikwara si sapitda a Hebreo.