22
Kunna i Pablo, “Wawwayik anna amak ira, maningngag kayu sitoye sikwak a manabbag so inoyera a mappaliwat sikwak!” 2 Sin nadingngagga a nabid baggina si sapitda a Hebreo, sinuminak irengke. Antu kunna,3 “Tataak a Hudyu, neyanakak so Tarso a lubbun na Cilicia, udde naddokallak sito Jerusalem. I Gamaliel ino nanunturu sikwak. Mangangngad a tinunturuwannak meantu so katunungan na aggidiyafuwantam ira. Mattalaginnayak ingke a masserbi sike Dios a kakunnayu amminan a ana sitaw sitoye. 4 Nelupetku anna nepapatek ino minangikkurug ira a maayan si Dalan. Maski bafabbayera onnu lallakiyera e ginafutku anna nepafukukkuwera. 5 Makapanaddag sitaweno katannangan a pari anneno affuyug na Hudyuwera. Ira yo nangadda sikwak si turak para so wawwayitam a Hudyuwera so Damasco takesi ipabulundak a gafutan ino minangikkurug ira sike Jesus sinay. Antu inangngak sinay takesi gafutangkuwera anna iyangkuwera sito Jerusalem takesi makastiguwera.
Na Sinapit i Pablo Megafu so Angngurugnga sike Jesus
6 “Mattangnganawin sinoy sin aranniyakun a makadutung so Damasco e lannat a nabbaggaweno sirwat so lebutku a naggabwat si langit. 7 Nadannagak so lubag anna nakadingngagak si ngaral a kunna sikwak, ‘Saulo, Saulo saay se ilupe-lupetnak?’
8 “Netabbagku, ‘Yanyaka, Afu?’
“E kunna sikwak, ‘Ikkanak i Jesus a taga-Nazaret a nelupe-lupetnu.’ 9 Naiteno bulungkuwera yo baggaw udde ammera nadingngag ino ngaral a makiabi-abid sikwak.
10 “Finuutku, ‘Afu, nenay akwangku?’ E kunna i Afu sikwak, ‘Mattaddagka e umangka so Damasco, anana yo mangitundu sikwam sinay so amminan a maawag a akwannu.’ 11 Ammek makaita gumafu so kumilikillit a baggaw, yo bulungkuwera ino nakkewid sikwak paumang so Damasco.
12 “Ana tata lalaki sinay a mingan si Ananias, minangikkurug a dumandan si amminan a katunungantam ira anna ilawa na Hudyuwera so Damasco. 13 Inang sikwak e nattaddag so karebbingku e kunna, ‘Wayik a Saulo, makaitakan imman!’ Sitan keppay a orat nakaitaakun e naitak baggina.
14 “Antu kunna sikwak, ‘Na Dios a dinayaweno aggidiyafuwantam ira e pinili naka takesi ammunnuweno nakamma anna maitam ino Matunung a Gumasserbi anna madingngagnuweno ngaralna. 15 Se ikkeno mangipakaammu si amminan a tolayera so naitam anna nadingngagngu. 16 Sitoye, nenay kepay yo indaggannu? Mattaddagkan e mappabawtismuka anna arangngannu sike Jesus a mapakoman ino liwa-liwatnu.’
Na Annundun sike Pablo so Bakkan a Hudyuwera
17 “Sin nuliyak so Jerusalem anna sikwak a maddasa-dasal so lawan na Templu, ana yo nepaita i Dios sikwak si tenap. 18 Naitak i Jesus e kunna sikwak, ‘Mappalangka! Manawkan sito Jerusalem se yo tolayera sitaw ammeran kuruwan ino sapi-sapitannu meafu sikwak.’
19 “Udde kungku sikwana, ‘Afu, ammurengke a inangku tinata-tateno sinagogarera takesi ipafukukku anna ipalassitkuweno mangurug ira sikwam. 20 E ammura kepay a naimammatangkuweno pamapatay sike Esteban a testigum se anaak sinay a nabbantay so barasiyeno namapatayera sikwana.’
21 “Udde kunna i Jesus sikwak, ‘Manawkan se dundunan taka a manundu so bakkan a Hudyuwera so aroyu a lugar.’ ”
22 Makiyad sinoy keppay, naningngag ira sike Pablo, udde naggirawera, “Patayan iyan a tolay se ammena mepangngat a matolay!”
23 Anna sikwara a maggira-girawa, ibara-baraddeno tafaldera, anna nangiburayyit ira si girafuk so leled gumafu se makaallang irengke. 24 Netun na kumander so sundalunera a iyangga i Pablo so kampura e netunduna sikwara a lassitanda baggina takesi maammuwandeno gafuna nu saay a makaallang ingkeno Hudyuwera sikwana. 25 Udde sin masigguttandan i Pablo si gaddang a siggut, kunna i Pablo so kapitan a nakataddag, “Meyannut kad si katunungan a lassitan yo tolay a Romano maski awan kepay a pruweba a nakaliwat baggina?”
26 Sin nadingngag na kapitan iyaw, inang baggina so kumander na sundaluwera e kunna, “Nenay antu akwannu? Katolayan a Romano kena inay a tolay.”
27 Antu inang ino kumander na sundaluwera sike Pablo e naffuut, “Sapitannu sikwak, Romanoka kad?”
Kunna i Pablo, “On.”
28 E kunneno kumander, “Oddu yo nagastuk liyek nebilang a katolayan na Roma.”
Kunna i Pablo, “Neyanakak a katolayan a Romano.”
29 Siddarat a inumaroyuweno sundaluwera a maimbestiga nad sikwana anna natalawan pay yo kumander se gakkurug a Romano i Pablo.
I Pablo so Allangan na Affuyug
30 Kanggam ingkeno kumander a maammuwan nu saay se napaliwat i Pablo na Hudyuwera. Kadaddaramatanna, pinalawanna baggina anna netunna so afu-afu a pariyera anneno interu a affuyug a mammu-ammung ira. Pinatallangnga i Pablo so affuyug.