23
Pakatulangngan i Pablo ino afu-afu a pariyera e kunna, “Wawwayik, nanolayak a malinis yo konsensiyak so allangan i Dios makiyad sitoye a aw.” 2 Antu i Ananias a katannangan a pari, netunna so tolayera a nakataddag aranni sike Pablo takesi tammundeno sangina. 3 E kunna i Pablo sikwana, “Kastiguwannakana i Dios. Ikka a mappesimpat, kakunnam ino madakkut a dinding a napintoran si furaw. Nakatuttudka sitan takesi nunutannak meantu so katunungan udde metulyat si katunungan a ipatampalnak!”4 Kunneno tolayera a nakataddag aranni sike Pablo, “Saay se iyatatalnuweno katannangan a pari i Dios?”
5 Kunna i Pablo, “Wawwayik, nu ammuk nad a katannangan a pari kena baggina, ammek nad sinapit inay gumafu se sinapit so nakaturak a sapit i Dios, ‘Ammem massapit si maral metulyat so gumattangngal sikwatam.’a”
6 Sin nakillatan i Pablo a yo korwan ira e Saduseowera anneno korwan e Fariseowera kunna sikwara, “Wawwayik, Fariseowak e kunnapay i amak. Nunutandak gumafu se mangurugak si inanama a mantotolena yo natayera.”
7 Sin sinapit iyaw i Pablo, nattitinnulyat ino Fariseowera anneno Saduseowera e naballayeno nassoronnung a tolayera 8 se amme mangurug ino Saduseowera a mantotolena yo natayera. Ammera mangurug a ana anghel anna ana karalweno tolay. Udde yo Fariseowera, kuruwanda amminan iyaw. 9 Tattullot a naggirawera e nattaddag ino korwan a Fariseowera a mestruwera na katunungan e nelillinda a sinapit, “Awan maintufukammi a maral a inangwa iyaw a tolay. Kasanna nu wara espiritu onnu anghel a makiabid sikwana?”
10 Annanot a nappatuweno pattitinnulyatda makiyad si natalawan ino kumander na sundaluwera tantaro nu padduduruffunanda i Pablo. Antu pinaumangngeno sundaluwera so kampu takesi iyaroyura i Pablo anna itallungga so kampu. 11 Sitan a gafi, nappadda i Afu sike Pablo e inumaranni sikwana. Kunna i Afu, “Ammeka mattalaw! Netundum so tolayera so Jerusalem meafu sikwak. Kunnapay yo akwannu so Roma.”
Na Planu a Pammapatay sike Pablo
12 Kadaddaramatanna, nammu-ammung anna nattaretabban ino korwan a Hudyuwera nu nenay yo akwanda. Nattambera a ammera mangngan anna minum makiyad si ammera mapapatay i Pablo. 13 Ana maturuk si appat a fulu a Hudyuwera ino nakibulun sitaw a gakkadda. 14 Akkabalinna, inang ira so afu-afu a pariyera anna manannakam na Hudyuwera e kunda, “Nattamba kami a amme kami mangngan anna minum makiyad si ammemi mapapatay i Pablo. 15 Antu, maawag a tunduwan diyaw anneno Sanhedrin yo kumander a iyang imman sitaw i Pablo takesi maimbestigan baggina si mapiya. Udde nakaparang kami a patayan baggina liyena makadatang sitaw.”
16 Udde sin nadingngag ino panganakan i Pablo a anak ino wayina a bafay yo nattaretabban na Hudyuwera, inang baggina so kampu na sundaluwera e nepaammuna iyaw sike Pablo. 17 Inayan i Pablo ino tata so kapitan na sundaluwera e kunna, “Ituludnu iyaw a sulteru so kumander se ana itunduna sikwana.”
18 Antu netulud ino kapitan ino sulteru so kumander e kunna sikwana, “Inayannak ino fukuk a i Pablo takesi iyangku sikwam iyaw a sulteru se ana kanu itunduna sikwam.”
19 Antu neyang ino kumander na sundaluwereno sulteru so tata idag a ira pelamang adwa e finuutna, “Nenay yo itundum sikwak?”
20 Kunneno sulteru sikwana, “Nattaretabban na korwan a Hudyuwera a arangngan sikwam a itallangngu i Pablo so Sanhedrin nanu daramat. Kanggamda a maammuwan ino kagakkuruwanna meafu sikwana. 21 Udde ammem ira nad a kuruwan se ana yo maturuk a appat a fulu a lallakiyereno mallakkap sikwana e nattambera a ammera mangngan anna minum makiyad si ammera mapapatay i Pablo. Nakaparan iran e mindag ira lamangin a umannungka sikwara.”
22 Antu sinapitanneno sulteru, “Ammem sapitan si korwan yo sinapitnu sikwak.” E nepulinan ino sulteru.
Neyang i Pablo sike Gubernador Felix
23 Sin nakaanawin ino sulteru, inayan ino kumander ino adwa a kapitan na sundaluwera e kunna sikwara, “Mangiparang kayu si adwatut a sundaluwera, pitufulu a gumakkabayuwera anna adwatut a gumalladip ira a umang so Cesarea e manaw sitoye nanu alas nuwebe si gafi. 24 Mangiparang kayu si kabayu a pattakayan i Pablo. Itan diyaw pay takesi awan maral a medemmu sikwana makiyad si itulud diyaw sike Gubernador Felix.”
25 Antu natturak pay yo kumander sike Gubernador Felix si kunna sitaw,
26 “Madaya-dayaw a Gubernador Felix, ikkanak i Claudio Lisias a natturak sikwam.
27 Iyaw a tolay a nepaiyangku sikwam e ginafut na Hudyuwera anna papatayanda nad. Udde sin naammuwangku a Romano kena baggina, nangibulunak si sundaluwera a mangisalak sikwana. 28 Gumafu se kanggammangku a maammuwan nu nenay yo inakusara sikwana, antu neyangku baggina so Sanhedrin. 29 Naammuwangku a yo akusara sikwana e meafu si katununganda, e awan a fustu a gafuna a ipapatay onnu ipafukuk baggina. 30 Sin naammuwangku a nattaretabban na Hudyuwera a papatayanda baggina, siddaratku a nepaiyang sikwam. Sinapitku pay so tolayera a nàakusa sikwana a sikwam a marreklamu metulyat sikwana.”
31 Antu inangweno sundaluwereno tun sikwara. Kagafiyananna, inappara i Pablo e neyangga so Antipatrisa. 32 Kadaddaramatanna, nuliyeno korwan a sundaluwera so kampura so Jerusalem anneno gumakkabayuwereno nangitulud sike Pablo. 33 Sin ginumumwang ira so Cesarea, neyaddareno turak so gubernador e netallangga pay i Pablo sikwana.