Na Pammaliwat na Hudyuwera Metulyat sike Pablo
24
Nappasa si lima aw, inang i Ananias a katannangan a pari so Cesarea. Bulunneno korwan a afu-afuwera na Hudyuwera anni Tertulo tata abugadu. Netundura amminan sike Gubernador Felix ino pamaliwatda metulyat sike Pablo. 2 Sin inayanda i Pablo, sinapit i Tertulo ino akusara sikwana e kunna,“Madaya-dayaw a Gubernador, gumafu si kinaporem a mattangngal sikwami, nabayagin a nassinak kami se oddu a mapiya a inangwam so lubbummi. 3 Maangga-anggam kamiyengke amminan gumafu so mapiya a inangwam e maumid kami a mappabala-balat sikwam. 4 Ammek kanggam si matalantangka nu damana lamang a dingngaggannu kami abbu. 5 Iyaw a tolay antu yo mangiyadda si maral anna baggineno nangipalungu so Hudyuwera a mangwa si gulu so interu a talubaggan. Tata pay baggina a afu-afuweno grupu na Nazareno. 6 Pinurebanna a passipittan ino Templumi so Jerusalem, antu ginafutmi baggina. (Nunutammi nad baggina meantu so katunungammi.) 7 Udde dinumatang i Kumander Lisias e finuwersana a inappa i Pablo sikwami. 8 Netunna a umang sikwam ino nappaliwat ira sikwana. Nu imbestigannu iyaw a lalaki, maammuwannuna pay yo amminan a pammaliwatmi sikwana e gakkurug.” 9 Inumannung pay yo korwan a afu-afuwera na Hudyuwera so pammaliwat i Gubernador Tertulo e sinapitda a gakkurug amminan iyaw.
Na Tabbag i Pablo so Pammaliwat i Gubernador Felix
10 Sin sinenyattan ino gubernador i Pablo a mabid. Kunna i Pablo, “Maanggammak a defensangku yo baggik so allangannu gumafu se ammuk a oddu a rawun a ikkeno gumannunut sitaw a kalubbunan. 11 Awan kepay tafulu adwa a aw makiyad sin dinumatangak so Jerusalem takesi maddayaw. Maammuwan diyaw ingkepay a gakkurug iyaw. 12 Ammerak naiteno Hudyuwera a makitinnulyat so lawan na Templu, onnu mangwa-angwa si gulu so sinagogera onnu maski sintaw so Jerusalem. 13 Awan ke mepaitara sikwam a gakkurug yo pammaliwatda metulyat sikwak. 14 Udde sapitangku iyaw sikwam a gakkurug a daya-dayawangkuweno Dios na aggidiyafuwammiyera meantu so pattuntulku so tunturu meafu sike Jesus a kunda a bakkan a gakkurug. E kuruwangku pay yo amminan a nakaturak a sapit i Dios sike Moises anneno profetera. 15 Ana inanamak a pantotolayan i Dios ino amminan a natayera, ino maral ira anna mapiyera. 16 Nabu akwangku amminan a makwak takesi malinis yo konsensiyak so allangan i Dios anna so tolayera.
17 “Sin pigya rawun a ammek inang so Jerusalem, nuliyak sinay takesi mangaddaak si pirak so madidiyat ira anna mangiwalliyak sike Dios. 18 Sikwak a akakwan iyaw, natumpalandak so lawan na Templu. Nabalingku a akwan ino seremonyas na pakkalinis. Bisang lamang a tolay sitan a orat anna awan a gulu. 19 Udde ana sinayeno korwan a Hudyuwera a taga-Asia. Ira nad yo makitallang sikwam nu gakkurug a ana ipaliwatda metulyat sikwak. 20 Onnu damana pay a massapit ino tolayera a ana sitaw nu nenay yo nalliwatangku sin netallanggak so Sanhedrin. 21 Iyaw pelamang yo negirawak so allanganda, ‘Nunutandak sitoye aw gumafu se mangurugak a mantotoleneno natayera.’ ’ ’
22 Gumafu se oddu yo naammuwan i Gubernador Felix meafu so Dalan i Afu Jesus, pinaibbatneno tolayera a nannunut sike Pablo e kunna, “Ikkanak ingkepay yo mannunut sikwam nanu dumatang i kumander Lisias.” 23 Netunna so kapitan na sundaluwera a guwardiyanda i Pablo, udde ammera nad a siggattan anna purayanda a mangikangkalin ino kolakngera nu nenay a maawagnga.
Na Akketallang i Pablo sike Felix anni Drusila
24 Nappasa si pigya aw, dinumatang i Gubernador Felix anneno atawana a Hudyu a i Drusila. Nepaayagnga i Pablo takesi dingngagganda pay yo sapitanna patamu si angngurug sike Kristo Jesus. 25 Sikwana a massapi-sapit i Pablo megafu si matunung a akkatolay, pàappat ino tolayera si baggira anneno paggumwang na Aw na Pannunut, natalawan i Felix e kunna, “Manawka abbu. Ayan takana imman nanu matallangku.” 26 Maumid a ipaayagnga anna katetabbanna i Pablo se inanamanna a pasussukan baggina iyaw si pirak.
27 Nappasa si adwa rawun, tinaliyan i Porcio Festo i Felix a gubernador gumafu se kanggam i Gubernador Felix a maanggamman baggineno Hudyuwera, pinurayanna i Pablo so paffukukan.