Na Pattallang i Pablo sike Gubernador Festo
25
23 Dinumatang i Gubernador Festo so Cesarea a tangngallanna e nappasa si tallu aw inang baggina so Jerusalem. 2 Sinapit ino afu-afu a pariyera anneno afu-afuwera na Hudyuwera ino akusara sike Pablo. Nakiyapila anna inarangga sike Festo 3 a ipaiyangnga i Pablo so Jerusalem gumafu se kanggamda gafutan anna patayanda so dalan. 4 Tinumabbag i Festo, “Nakafukuk i Pablo so Cesarea e si ammena mabayag muliyaknga sinay. 5 Padandanan diyaw sikwak so Cesarea ino afu-afuyuwera anna nu wara inangwana a maral, kapiyeyuna a akusan baggina.”6 Akkabalinna a nagyan i Festo si walu onnu tafulu aw so Jerusalem liyena a nuli so Cesarea. Kadaddaramatanna, nattuttud baggina so usgadu e netunna a maitallang i Pablo. 7 Sin dinumatang i Pablo, narimummungan na Hudyuwera baggina a naggabwat so Jerusalem e pinaliwatda baggina si oddu a madammat a pammaliwat udde awan a pruwebara so nepaliwatda sikwana. 8 Dinefensan i Pablo yo baggina e kunna, “Awan nakaliwatangku metulyat si katunungan na Hudyuwera onnu so Templu onnu maski so Emperador na Roma.”
9 Udde gumafu se kanggam i Festo a makanggamman baggina na Hudyuwera, kunna sike Pablo, “Kanggammu kad a umang so Jerusalem takesi sinay takana nunutan so pammaliwatdera sikwam?”
10 Udde kunna i Pablo, “Nakataddagak so allangan na pannunutan na Emperador e sinayak maawag a nunutan. Ammum a awan nalliwatangku so Hudyuwera. 11 Nu nakaangwaak si maral anna kunneno katunungan a maawag a matayak, antu umannungak a matayak. Udde nu awan kagakkuruwan ino akusara sikwak, ammek maawag a medawawa sikwara. Mapilaak so Emperador na Roma.”
12 Akkabalinna a nakiabid i Festo so bulunnera a gumattangngal e kunna sike Pablo, “Inarangngu a tumallang so Emperador na Roma antu ipeyang takana sikwana.”
Na Pattallang i Pablo sike Patul Agripa
13 Nappasa si pigya aw, dinumatang i patul Agripa anneno bafay a wayina a i Bernice so Cesarea se kanggamda a makkidyot sike gubernador Festo. 14 So pagyanda sinay si pigya aw, sinapit i Festo sike patul Agripa ino meafu sike Pablo, e kunna, “Ana tata fukuk sitaw a nebattang i gubernador Felix. 15 Sin anaak so Jerusalem, inang sikwak ino afu-afu a pariyera anneno korwan a afu-afuwera na Hudyuwera a nappaliwat sikwana. Inarangga sikwak a ikkanak ino mannunut so katayanna. 16 Udde tinabbagku a bakkan a gagangay na Romanowera a mannunut si maski yanya a màakusan makiyad ammena iyaw a madefensan yo baggina metulyat so nàakusera sikwana. 17 Antu sin inang ira sitaw, ammekun nassayang si tiyempu. Kadaddaramatanna, nattutturak so usgadu e netungku a itallangga i Pablo. 18 Sin nattaddag ino nappaliwat ira sikwana, ammera pinaliwat si maski sanna a madammat a pammaliwat a arigku a ipaliwatda sikwana. 19 Imbes, nakitinnulyat ira sikwana megafu si relihiyonda anna meafu si tata tolay a mingan si Jesus a natay udde nelillin i Pablo a nantotolay baggina. 20 Gumafu se ammek ammu nu kasannaak a mimbestiga si kunna sitan ira, finuutku i Pablo nu kanggamma a umang so Jerusalem takesi sinay a maimbestigan. 21 Udde inarang i Pablo a sinay abbu baggina so paffukukan makiyad siyeno Emperador na Roma ino mannunut sikwana. Antu netungku a guwardiyanda makiyad si meyangku baggina so Emperador.”
22 Kunna i Agripa sike Festo, “Kanggammangku a dingngaggan iyaw a tolay.”
Kunna i Festo, “Nanu daddaramatinna.”
Na Pattallang i Pablo sike Agripa anni Bernice
23 Kadaddaramatanna, dinumatang da Agripa anni Bernice. Tinumallung ira so passosoronnungan ino tolayera e napadayawan irengke si seremonyas ira. Bulundeno kumander ira na sundaluwera anneno mammannag a tolayera sinay a lubbun. Netun i Festo a itallungga i Pablo. 24 Kunna i Festo, “Patul Agripa anna ikkayu amminan a ana sitaw, ana sitaweno lalaki a inakusa sikwak ino Hudyuwera so Jerusalem anna sito Cesarea. Negira-girawara a ammenan nad matolay baggina. 25 Awan ammuk a liwatna a gafuna takesi ipapatay baggina, udde inarangnga a tumallang so Emperador na Roma, nanonotku a ipeyang baggina sinay. 26 Udde awan ammuk si fustu a meturak so Emperador meafu sikwana. Antu netallangku baggina sikwayu, anna annanot so allangannu, Patul Agripa, takesi ana meturakku kapiyena a maimbestigan. 27 Nanonotku a ammena nad a ipeyang so Emperador ino tata fukuk nu awan a reklamu metulyat sikwana.”