Nelupet i Saulo ino Minangikkurug ira
8
Inumannung i Saulo so akkapatay i Esteban. Antu sitan a aw, pinefunandeno kuruwengke pallupet so grupu na minangikkurug ira so Jerusalem. Antu amminan a minangikkurug ira fuwereno apostol ira e nassiwarak so amminan a tarabbunan na Judea anna Samaria. 2 Netanam ino tolayera a ana talora sike Dios i Esteban e tinangitandengke baggina.3 Udde pinefunanna i Saulo a palowan ino grupu na minangikkurug ira. Binale-balenera a tinallung e ginonggo-gonggonnera a palawan, lallakiyera anna bafabbayera e nepafukukngera.
Nanundu i Felipe so Samaria
4 Sitoye, inang so naddadaruma a lugar ino nakkakaratway a minangikkurug ira e nebali-balinda a ibalaggaweno Mapiya a Baga meafu sike Jesus. 5 Inang i Felipe so lubbun na Samaria anna nebalaggona sikwara a i Jesus ino Mesiya. 6 Naningngag si mapiyeno tolayera sike Felipe se kanggamda a maningngag nu nenay yo sapi-sapitanna anna maiteno milagruwera a inangwana, 7 se oddu a demonyuwera a nattangi-tangit si madappa dengkera nallawan so naaffunan ira. Oddu korwan ira a paralitiku anna pilay a napammapiya. 8 Nabu naanggamman ingkeno tolayera sitan a lubbun.
9 Sitoye, ana tata tolay a minganan si Simon a nabayagin a gumammadyik e napalaggatneno tolayera so Samaria. Sapi-sapitanna a tata baggina a kaawan a tolay. 10 Naningngag ira amminan sikwana mamefu so ordinaryu makiyad so kaawan a tolayera e kunda, “Iyaw a tolay, i Simon e maayan si ‘ino Tata a Kaatannangan’ ino pakapangwa i Dios.” 11 Naningngag irengke sikwana gumafu se nabayagin a napalaggatnera so pammadyiknga. 12 Udde sin nangurug ira sike Felipe a nangibalaggaw so Mapiya a Baga meafu so pattangngalan i Dios anni Jesus a Mesiya, nabawtismuwan ira, lallakiyera anna bafabbayera. 13 Maski i Simon e nangurug. Kapiyena nabawtismuwan, nagyan baggina sike Felipe e nalaggat baggina sin naitaneno pemunuwan ira anna kakkapallat a milagruwera a nedemmu.
14 Sin nadingngag ino apostol ira so Jerusalem a kinurug ino taga-Samaria ino sapit i Dios, dinundunda i Pedro anni Juan sikwara. 15 Sin dinumatang ira sinay, dinasallandeno minangikkurug a Samaritanuwera takesi arasawandaneno Espiritu i Dios. 16 (se nabawtismuwan ira si pakapangwa i Afutam a i Jesus udde yo Espiritu i Dios e awan kepay sikwara.) 17 Antu nepotunda Pedro anni Juan ino kamatda sikwara e inarasoreno Espiritu i Dios.
18 Sitoye, sin naita i Simon a neyaddeno Espiritu megafu so pappotun ino kamat na apostol ira, inofresarannera si pirak, 19 a makkun, “Iyaddayu pay sikwak iyaw a pakapangwa takesi yanya yo pangipotunangku si kamatku e arasawanneno Espiritu i Dios.”
20 Udde kunna i Pedro sikwana, “Metappolka nad so infiyernu anneno pirakngu gumafu se arigngu a magatangngu si pirak ino iyadda i Dios! 21 Awan pakasapattannu onnu ballem a serbiyan i Afu se maral yo ginanakammu si aggita i Dios. 22 Kunnantu, mabbobolika anna maddasalka sike Afu a nu damana e pakomannakana so maral a ginanakammannu, 23 se maitak a mafuka ingke anna ammem mapaimemmak ino baggim ingkepay a mangwa si maral a kiya-kiyan.”
24 Tinumabbag i Simon, “Idasallannak sike Afu takesi awan so sinapitnu a medemmuna sikwak.”
25 Sitoye, kapiyera a netundu da Pedro anni Juan so tolayera ino ammura meafu sike Afu Jesus, nuliyera so Jerusalem a mangibala-balaggaw si mapiya a baga so oddu a tarabbunan ira na taga-Samaria.
26 Antu kunneno anghel i Afu sike Felipe, “Gumikkatka anna umangka so dunan na diraya so dalan na Jerusalem paumang so Gasa.” (Ammenan iyaw a madala-dalanan.)
27 Antu ginumikkat baggina e inang sinay. So dalan naitaneno tata tolay a naggabwat so Etiopia, tata baggina a kafun anna kaawan a ofisyal a makammu so interu a pakkukwera i Candice a reyna na Etiopia. Naggabwat baggina so Jerusalem a maddayaw. 28 Dengke a pauliyen baggina so balena so Etiopia a nakakarwahe, bibbi-bibiranneno sapit i Dios a neturak i profeta Isaias. 29 Kunneno Espiritu i Dios sike Felipe, “Ingka so karwahe e aranniyannu baggina.” 30 Antu nakkarela a inumaranni i Felipe e nadingngagngeno ofisyal a mabbibbi-bibbid so libru a neturak i profeta Isaias. Finuutna, “Maintindiyannuweno bibbi-bibbirannu?”
31 Tinumabbag baggina, “Kasannak a maintindiyan nu awan mabbarifit sikwak?” E inimbitanna i Felipe a mattakay so karwahe e nattuttud so karebbingnga. 32 Antuweyaw yo neturak a sapit i Dios a bibbi-bibbiranna,
“Kakunna yo tata karneru a nakaparan a maparti,
anna kakunna yo ubbun a suminak sikwana a mafullitan,
Awanna a makaitundu meafu si aggidiyafuwannera,
gumafu se nakiyarin yo angatna sito lubag.”a
34 Kunneno ofisyal sike Felipe, “Itundum sikwak, yanya yo sapi-sapitan ino profeta meafu sitaw? Baggina kad yo sapi-sapitanna onnu meafu si korwan a tolay?” 35 Antu nebarifitna i Felipe yo nabibbid so sapit i Dios. Nebalaggona sikwaneno Mapiya a Baga meafu sike Jesus.
36 Dengkera a naddoyu-doyug, inang ira so lugar a ana danum. Kunneno ofisyal, “Itan diyaw, ana danum sitaw! Ammek kad kepay dama a mabawtismuwan?”
37 [Tinumabbag i Felipe, “Nu gakkurug a mangurugka, damam.”
Kunneno ofisyal, “Mangurugak a i Jesu Kristo e ino Anak i Dios.”]
38 Antu pinamemmakngeno ofisyal ino karwahe. Dinumassag da Felipe anneno ofisyal so danum e binawtismuwan i Felipe baggina. 39 Sin nakagaddang ira so danum, neyaroyuweno Espiritu i Dios i Felipe. Ammenan naiteno ofisyal baggina. Nebali-balin ino ofisyal a nuli so balena. Nammalamuwang ingke baggina. 40 Naimammatan i Felipe a anen baggina so Azoto. Mamefu sinay, nebalaggoneno Mapiya a Baga meafu sike Jesus so amminan a lubbu-lubbun a natalebaranna makiyad si dinumatang baggina so Cesarea.