Na Barifit i Esteban so Affuyug
7
Finuut ino katannangan a pari i Esteban, “Gakkurug kad yo akusarera sikwam?”2 Netabbag i Esteban, “Amak ira anna wawwayik, maningngag kayu sikwak. I Dios a kaatannangan anna makapangwa e nappadda sike Abraham a aggidiyafuwantam sin ana baggina so Mesopotamia, liyena nagyan so Haran, 3 e kunna sikwana, ‘Anawannuweno lubbunnu anna kawayyannuwera anna umangka so lubbun a ipaitaknga sikwam.’ 4 Antu inanawanneno lubbun na Caldeo e inang nagyan so Haran. Sin natay i amana, dinundun i Dios baggina so lubbun a pagyanantam. 5 Ammena inindan i Dios baggina si lubag maski tata piye lamang udde netambana a indannana baggina anneno gakanera maski awan kepay anaknga sinoy. 6 Antuweyaw yo netundu i Dios sikwana a yo gakanera e ippingngera so korwan a talubaggan. Imbutandera sinay anna mapadiyatan ira si appat a tatut a dawun. 7 Kunna i Dios, ‘Udde kastiguwangkuneno tolayera a nimbut sikwara, e akkabalinna, anawandana iyan a lubbun e dayawandaknga sitaw a lugar.’ 8 Kunna i Dios sike Abraham a banggitandaneno anakdera a lallakiyera takesi mepaiteno tamba i Dios sikwara. Sin neyanak i Isaac a anak i Abraham, binanggitna baggina sin meka-walu aw. Binanggitna pay i Isaac ino anaknga a i Jacob. Kunnapay, antu yo inangwa i Jacob so tafulu adwa a anaknga a lallakiyera a aggidiyafuwantam ira.
9 “Gumafu so pafuweno aggidiyafuwantam ira a antuwera yo tammanakam a anak ira i Jacob sike Jose, nelakura i Jose so taga-Ehiptowera a nimbut sikwana sinay udde ana i Dios sikwana. 10 Dinuffunanna i Dios baggina so amminan a passufrina. Pinangngammuna i Jose a nakagafuwan i Faraon, patul na Ehipto a naanggamman sikwana. Antu dinutukanna i Faraon i Jose a gumattangngal na Ehipto anna so amminan a katalubbunanna. 11 Sitoye, ana dokal a bisin a nakwa so amminan a luga-lugar na Ehipto anna pay so Canaan e nadiyatan ino tolayera sinay. Maski yo aggidiyafuwantam e awan pangappanda si maakkan. 12 Sin naammuwan i Jacob a ana yo maakkan so Ehipto, dinundunneno anaknga a lallakiyera, ira yo aggidiyafuwantam sinay. Antuweyaw yo palungu a paddoyugga so Ehipto. 13 So meka-adwa a paddoyugga, nepaammu-ammu i Jose yo baggina so wawwayinera a lalaki anneno familyana sike Faraon. 14 Antu nepaayag i Jose i amana a i Jacob anna amminan a kawayyannera a umang so Ehipto. Pitufulu limera amminan. 15 Inang i Jacob anna amminan a katalubbunanna so Ehipto. Natay i Jacob sinay maski yo aggidiyafuwantam ira. 16 E neyanggeno baggira so Sikam a lubbunda anna netanam so lubag a nagatang i Abraham si diplata a pirak so anak ira i Hamor so Sikam.
17 “Sin aranniyen ino aweno kaparulotan ino tamba i Dios sike Abraham, umoddu-odduwen ino Israelitera so Ehipto. 18 Korwan a patul a namefu a mattangngal so Ehipto a awan ammuna meafu sike Jose. 19 Marakkat a pinureban iyan a patul a padiyatan ino aggidiyafuwantam ira e nassufriyera. Finuwersanera a anawandeno kalubitdera takesi matayera. 20 Sinoy a tiyempu, neyanak i Moises. Makasta baggina si aggita i Dios. Si tallu a dakkag neyimad baggina a nataron so balay i amana. 21 Sin maawag a maanawan ino gagginafan i Moises baggina, inappeno bafay a anak i Faraon e pinadokalna a kunnangke anaknga. 22 Tinunturuwan ino taga-Ehiptowera i Moises si amminan a ammura. Makapangwa baggina si amminan a sapitnera anna taddanera.
23 “Sin appat a fulu rawun i Moises, nanonotna a gannonan ino ka-Israelitanera. 24 Sin naitaneno tata sikwara a minaltratuweno taga-Ehipto, dinuffunanna baggina e napateneno taga-Ehipto. 25 Arig i Moises a yo ka-Israelitanera e maintindiyanda a megafu sikwana, isalakdera i Dios udde ammera maintindiyan. 26 Kadaddaramatanna, naitaneno adwa a Israelita a mappaparakwa e pinabbulunnera a nakkun, <Mawwayi kayu, saay se mappaparakwa kayu?’ 27 Udde yo tata nalliwat e netuyyudna i Moises a nakkun, “Yanya yo naddutuk sikwam a mattangngal anna mannunut sikwami? 28 Patayannak kad pay kakunna yo inangwam sin fuwab so taga-Ehipto?” 29 Sin nadingngag iyaw i Moises, nattamang baggina so Ehipto e nagyan so Midian a tata ipping. Nangatawa baggina sinay e naindan ira si adwa a anak a lalaki.
30 “Sin nappasa si appat a fulu rawun, nappaddeno anghel i Dios sikwana so kulolawat na Bakulud na Sinai so gumallayaf a matagga-taggab a ibbafa a kayu. 31 Nalaggat i Moises so naitana e inaranniyanna takesi munnakkannengke. Udde nadingngangngeno ngaral i Afu Dios a nakkun, 32 ‘Ikkanak i Dios na aggidiyafuwan diyaw a dinayora, Dios da Abraham, Isaac anni Jacob.’ Nayyayyak i Moises si talona e ammenan a initeno matagga-taggab a ibbafa a kayu. 33 Antu sinapit i Dios sikwana, ‘Arinnuweno sandalyatnu se sagradu a lugar yo pattadda-taddagannu. 34 Naitak ino pammaltratu so tolek ira a ana so Ehipto. Nadingngagkuweno paddayingga e inumullugak a mangisalak sikwara. Katawin, dundunan takana so Ehipto.’
35 “I Moises yo inammayan ino Hudyuwera e sinapitda sikwana, ‘Yanya yo naddutuk sikwam a mattangngal anna mannunut sikwami?’ Nedundun i Dios baggina a mattangngal anna mallubbak so imbut ira megafu so anghel a nappadda sikwana so ibbafa a kayu. 36 Nelawan ira i Moises so Ehipto anna oddu inangwana a milagruwera so Libaga a Bebay sin naddammang ira anna so kulolawat pay si appat a fulu rawun. 37 Antuweyaw yo Moises a nangitundu so Israelitera, ‘Mappilina i Dios si profeta para sikwayu a maggabwat so toleyuwera ingkepay dengke a pinilinak.’ 38 Baggineno ana so pammu-ammungan na tolayera i Dios so kulolawat. Bulunneno anghel a nassapit sikwana so Bakulud na Sinai bulunneno aggidiyafuwantam ira. Naarasawna so anghel ino sapit ira a mangiyadda si angat a maggabwat sike Dios a meyaddana sikwatam.
39 “Udde ammera kanggam ino aggidiyafuwantam ira a makimoray sike Moises anna imbes inammayanda baggina. Nanonotda a muli so Ehipto. 40 Kunda sike Aaron, ‘Ipangwan dakami si dios ira a mangigiya so dalammi, se ammemi ammu nu nenay yo medemmuna sike Moises a nangilawan sikwatam so Ehipto.’ 41 Sitan a tiyempu, nangweno tolayera si sasan-dios ira a kunnaneno ubbun. Nangiwalliyera si aggayam ira anna korwan a kiya-kiyan e senelebrandeno sasan-dios ira a inangwara. 42 Udde tinalekkuran ira i Dios e pinurayannera a maddayaw so sinag, dakkag anna bitun ira se neturak so libru na profetera,
‘Ikkayu a Israelitera!
Bakkanak ino nangiwalliyan diyaw si naparti a aggayam ira si unagnga appat a fulu rawun sin ana kayu so kulolawat.
43 Udde nekangkalin diyaweno tolda a nakalawuman ino imahe i sasan-dios Molok
anneno bitun a imahe na sasan-dios diyaw a i Refan,
a inangwayu a dayawan,
iyang dakayu a fukuk ira so tafik kepay na Babilonya.’
44 “Nekangkalin ino aggidiyafuwantam ira yo tolda na Testimonyaa so kulolawat. Netundu i Dios sike Moises nu kasanna akwan iyaw a tolda. Inangwana iyaw i Moises kakunna yo panuntulan a nepaita i Dios sikwana. 45 Nekangkalin payeno aggidiyafuwantam ino tolda bulunda i Josua. Nekangkalinda iyaw sin pinuwersara a inappeno lubag na tolayera a pinatamang i Dios takesi mattabalineno lubag a pakkukwa na aggidiyafuwantam ira. Sigigyan ino tolda sinay makiyad so tiyempu i David. 46 Naanggamman i Dios sike David. Inarangnga sike Dios a pataddagganna baggina si Templu para so tolayera i Jacob. 47 Udde i Solomon ino namataddag si balay para sike Dios.
48 “Maski nu kunna sinay, i Dios a Makapangwengke si amminan e ammena nagyan so balayera a nepataddag ino tolayera dengke a neturak i profeta Isaias ino kunna i Dios,
49 ‘Na langit antu yo tronok,
na lubag antu yo pimemmangan na takkik,
Damayu kad a makapataddag si balay para sikwak?
onnu maawagku kad a tata lugar a pimemmangan?
50 Inangwak amminan iyaw a kiya-kiyan.’
51 “Ikkayu a afu-afuwera a Hudyuwera a mataggat a urena! Kakunnayu yo tolayera a ammera mangurug sike Dios, a ammera makimoray anna maski maningngag sikwana. Maumid a tulyatan diyaweno Espiritu i Dios a kakunna yo aggidiyafuwan diyawera. 52 Awan a profeta i Dios a amme nilupet ino aggidiyafuwan diyawera. Pinatera inoyera a nassapit so paddatang ino Matunung. E sitoye, trinaydor diyaweno Matunung anna pinateyu baggina. 53 Inarasoyuweno dundun a neyaddana i Dios megafu so anghel ira udde amme kayu nakimoray.”
Na Akkalappag i Esteban
54 Sin nadingngag ino Sanhedrin ino sinapit i Esteban, nakaallang ira anna nangngari-ngaritam ira. 55 Udde negiyeno i Espiritu i Dios i Esteban dengke a nattangaw baggina si langit e naitaneno kadayawan i Dios anni Jesus a aggataddag so diwanan i Dios. 56 Antu kunna, “Maitak a aggabukkat ino langit anneno Anak na Tolay a aggataddag so diwanan i Dios!”
57 Udde kinallabbandeno layaggera anna dinambalda i Esteban e ginira-girawanda. 58 Ginonggo-gonggonda baggina palawan so lubbun anna pinefunanda a lappaggan baggina. Na tolayera a nassissiri metulyat sike Esteban e neyekwareno tafáldera so dunan na takkineno sulteru a minganan si Saulo. 59 Sin lappa-lappagganda i Esteban, naddasal baggina, “Afu Jesus, arasawannuweno espirituk.” 60 Nammalitud i Esteban anna naggirawa si madappa a nakkun, “Afu, ammem ira a kastiguwan sitaw a liwat.” Sin sinapitna iyaw, natayin.