Napiliyeno Pitu a Masserbi
6
Sinoy a awera, umoddu-oddu yo bilang na disipuluwera a minangikkurug ira. Narreklamuweno minangikkurug ira a massapit si Griyegoa metulyat so minangikkurug ira a massapit si Hebreo. Kunda a napurayan ino balurera so kinaaw a pabbunnay si maakkan. 2 Antu yo tafulu adwa a apostol ira e inayandeno amminan a gumaladandan ira i Jesus e kunda, “Ammena fustu a purayammi yo annunturu si sapit i Dios tapenu mangibunnay si pakkatolayeno baluwera. 3 Kunnantu, wawwayik ira si angngurug, mappili kayu si pitu a lallakiyera a ilaweno tolayera anna igiyeno Espiritu i Dios anna mangngammuwera. Dutukammiyera a mangwa sitaw a tarabafu, 4 takesi usammiyeno tiyempumi si paddasal anna panunturu si sapit i Dios.”5 Naanggamman ino tolayera so sinapitda e pinilira i Esteban, tata lalaki a dokal ingkeno angngurugnga sike Dios anna negiyeno Espiritu i Dios baggina. Pinilira pay da Felipe, Procoro, Nicanor, Timon, Parmenas anni Nicolas a taga-Antiokia. Bakkan a Hudyu i Nicolas udde tinuntulneno gagangera. 6 Nepataddagga iyawera a pitu a lallakiyera so allangan na apostol ira a naddasal anna nepotundeno kamatda so ulura a marang sike Dios a indannera si nammu a makweno tarabafura.
7 Na sapit i Dios e nadingngag ino oddu a tolayera. Umoddu-odduwengke yo minangikkurug ira i Jesus so Jerusalem anna oddu so Hudyu a pariyera a nangurug sike Jesus.
Na Akkagafut i Esteban
8 Mapiyengke i Dios sike Esteban e inindanna baggina si nammu a mangwa si oddu a kakkapallat a milagruwera. 9 Udde ana yo korwan ira a nakitinnulyat sike Esteban a neyannung so sinagoga na Pinalawanb ira a nakaisapatan ino Hudyuwera a taga-Cirene, Alejandria, Cilicia, anna Asia. 10 Udde ammera maaffut baggina gumafu se yo Espiritu i Dios e manuffun sikwana a massapit a ana angngammuna. 11 Antu neyimadda a sinussuwan ino korwan a lallakiyera a massissiri metulyat sike Esteban e kunda, “Nadingngagmi i Esteban a mabid si maral metulyat sike Moises anni Dios.” 12 Antu sinay a sinapitda, napaallanggeno tolayera, ino manannakam anneno mestruwera na katunungan. Antu siddarat a tinallangga baggina e ginafutda anna neyangga baggina so Sanhedrin. 13 Nangitallang ira si korwan a tolayera so passosoronnunganda a maddakkig meafu sike Esteban e kunda, “Iyaw a tolay e ammena mimemmak a mabid si maral metulyat so Templu i Dios anneno dundun a neyaddana i Dios sike Moises. 14 Se nadingngagmi a sapi-sapitanna a i Jesus a taga-Nazaret e darallannana iyaw a Templu anna angkakwannaneno gagangetam a netunturu i Moises sikwatam.” 15 Anna pakatulangngan amminan a ana so Sanhedrin i Esteban e naitara a mallengke mutung na anghel yo mutungnga.