Ananias anni Safira
5
Ana pay yo matawa a nallaku si lubagga. Ananias yo lalaki anni Safira yo atawana. 2 Nangadda lamang i Ananias si parte na pirak so apostol ira e neyimadna a inimfunanneno korwan a pirak para sikwana ingkepay. Ammuweno atawana meafu sitaw.3 Finuutna i Pedro sikwana, “Ananias, saay se napadandangka sike Satanas a massiri sike Espiritu i Dios? Netawum ingkepayeno korwan a pirak a naarasom so pallakum so lubag anna nassalasasangka a neyaddam sikwami amminan. 4 Liyem nelakuweno lubag, bakkang kad se akwam inay? Anna sin nelakum ino lubag, bakkang kad a akwam yo nallakkuwannu? Saay se ninonotnu a akwan inay anna kunnu a neyaddam amminan ino pagana? Ammeka nassiri si tolay udde sike Dios.”
5 Sin nadingngag i Ananias iyaw, nabaletwak baggina e natay. Natalawan amminan a nakadingngag sitaw a nedemmu. 6 Dinumatang ino sulteruwera e binabbattanneno baggina, antu nelawanda e netanamda baggina.
7 Nappasa si tallu orat, dinumatang pay i Safira a atawana. Ammena ammuweno nedemmu. 8 Kunna i Pedro sike Safira, “Antuweyaw kad amminan yo pageno lubag a nallakuwan diyaw a matawa?”
E kunna, “On, iyan amminan yo pagana.”
9 Antu kunna i Pedro sikwana, “Saay se inumannung kayu a matawa a illokun diyaweno Espiritu i Dios? Maningngag kayu! Na lallakiyera a nangitanam so atawam e ana so lenab. Ilawan dakana pay kakunna yo inangwara so atawam.”
10 Siddarat a nabaletwak i Safira so allangan i Pedro e natay. Sin tinumallung ino sulteruwera, naitara baggina a natayin. Nelawanda baggina e netanamda so karebbing na atawana. 11 Natalawan ingkeno amminan a grupu na minangikkurug ira so Jerusalem anneno korwan ira a nakadingngag so nedemmu sike Ananias anni Safira.
Oddu a Milagruwera a Inangweno Apostol ira
12 Inindan i Dios ino apostol ira si pakapangwa a mangwa si oddu a kallalaggat a milagruwera so tolayera. Naammung ino minangikkurug ira so lawan na Templu a maayan si Portico i Solomon. 13 Nattalaweno korwan ira a mebulun so minangikkurug ira udde dokal a pangilaweno tolayera sikwara. 14 Daggun, umoddu-oddu yo lallakiyera anna bafabbayera a mangurug sike Afu Jesus.
15 Anna gumafu so kakkapallat a taddera na apostol ira, neyang pay yo tolayera ino matakit ira so dalan ira. Nepaiddarera so piddandera takesi nu mattalebadna i Pedro, tantaro masiyongan ino korwan sikwara so aninuna e mapammapiyera. 16 Oddu a tolayera a dinumatang a naggabwat so lubbu-lubbun a lebut na Jerusalem. Neyanggeno matakit ira anna naaffunan ira si maral a espirituwera e pinammapiyera amminan i Dios.
Nelupe-lupet ino Apostol Ira
17 Mafuwengkeno katannangan a pari anneno Saduseowera a bulunna so Jerusalem anna naddesisyon ira nu nenay yo akwanda. 18 Antu ginafutdeno apostol ira e nepafukukdera. 19 Udde sinoy a gafi, ana tata anghel i Afu Dios a inang so paffukukan e binukkatanneno lenab e pinalawannera. Antu kunna sikwara, 20 “Umang kayu so lawan na Templu e tunturuwan diyaweno tolayera meafu si angat a bulun i Dios amu-amu.” 21 Kinuruggeno sinapit ino anghel antu tinumallung ira so Templu si maggibbat e nebalinda a nanunturu.
Daggun, sin naammung ino katannangan a pari anneno bulunnera, nayag ira si passosoronnungan na affuyug anneno amminan a manannakam a afu-afu a Hudyuwera. Akkabalinna iyaw, nanundun ira si guwardiya tapenu meiyang ino apostol ira sikwara. 22 Udde sin inang ino guwardiyera so paffukukan, awanin ino apostol ira sinay. Nuliyera so affuyug e kunneno tata sikwara, 23 “Sin inang kami so paffukukan, nakaalladduweno lenab e ana yo guwardiyera sinay. Tinumallung kami so paffukukan udde awan naitami maski tata so unag.” 24 Sin nadingngag ino kapitan na guwardiyera na Templu anneno katannangan a pariyera iyawera, naburungan ira e ninonotda nu nenay yo metufad a makwa.
25 Dinumatang ino tata lalaki e kunna, “Maningngag kayu! Na apostol ira a nepafukuk diyaw e nanuntu-tunturu so tolayera so lawan na Templu.” 26 Antu nanaweno kapitan anneno guwardiyera na Templu e inappareno apostol ira. Udde ammerera finuwersa a ginafut se mattalawera tantaro nu lappaggandereno tolayera.
27 Sin neyang ino apostol ira so interu a affuyug, finuutdereno katannangan a pari. 28 Kunna, “Nengangngadmi a netun a amme kayu manunturu meafu sike Jesus. Itan diyaweno inangwayu! Manuntu-tunturu kayu so amminan a tolayera so Jerusalem. Bakkan lamang iyan, ipaliwat diyaw pay sikwamiyeno akkapatena.”
29 Udde tinumabbag da Pedro anneno apostol ira, “I Dios lamang a pakimorayammi, bakkan a tolayera. 30 Na Dios na aggidiyafuwammiyera e pinantotolera i Jesus a nepapateyu anna nepapatak diyaw so kurut. 31 E dinayaw i Dios baggina e nepatuttudna so diwananna a tata Gumattangngal anna Mannabbut. Inangwa iyaw i Dios takesi mabboboliyeno Israelitera so liwa-liwatda e mapakomannera. 32 Ikkami yo manaddag sitawera anni Espiritu i Dios a neyaddana i Dios sikwara a makimoray sikwana.”
33 Sin nadingngaggeno sinapit i Pedro, nakaallang irengke e kanggamda a papatayan ira. 34 Udde ana tata Fariseo a minganan si Gamaliel a mestru pay na katunungan a ilawa amminan ino tolayera. Nattaddag baggina e kunna a palawanan abbuweno apostol ira. 35 Kunna so bulunnera, “Ka-Israelitak ira, nonotan diyaw si mapiya nu nenay yo akwan diyaw sitaw a tolayera. 36 Gumafu si pigya rawun a nappasa, ana tata lalaki a minganan si Teudas a nassapit so tolayera a kaawan a tolay baggina e màappat a tatut a lallakiyera a dinumandan sikwana. Udde sin pinatera baggina, amminan a dinumandan sikwana e nassasarinera. Awan a pattamuwanna yo pinefunanda. 37 Kapiyena baggina, i Judas a taga-Galilea e narrebelde pay so gubyernu na Romano sin tiyempu na sensus. Oddu a dinumandan sikwana udde sin pinapatera baggina, nassasarina pay yo dinumandan sikwana. 38 Antu sitoye, itunduk sikwayu. Ammeyu palowan iyawera a lallakiyera. Purayan diyawera, se nu naggabwat iyaw a planu si tolay, awan keppena pattamuwanna. 39 Udde nu uray i Dios, ammeyuwera maaffut se tantaro i Dios ino kontran diyaw.”
Na korwan a miyembruwera na affuyug e kinuruggeno sinapit i Gamaliel. 40 Nepatallungga imman ino apostol ira e nepalassitdera. Antu tinunandera a ammera massapit so tolayera meafu sike Jesus anna pinaanawdera.
41 Mammalamuwang ino apostol ira dengkera a inanawan ino lugar gumafu se nebilang ira i Dios a mepangngat a meyatatal gumafu so angngurugga sike Jesus. 42 Antu kada aw, nebali-balinda a inang so Templu anna nabbala-balayera. Nebali-balinda a manunturu anna mangibalaggaw si Mapiya a Baga meafu sike Jesus a i Mesiya.