Naimbestigan da Pedro Anni Juan
4
Sikwara a makiteta-tetabbag da Pedro anni Juan so tolayera, inang sikwareno pariyera, Saduseowera anneno afu-afuweno guwardiyera na Templu. 2 Nakarangkag irengke a nanuntu-tunturu anna nangibala-balaggaw da Pedro anni Juan a mantotoleneno natayera gumafu se nantotolay i Jesus. 3 Antu nepagafutdera e nepafukukdera abbu makiyad si kadaddaramatanna gumafu se gafiyenin. 4 Udde maski kunna sinay, oddu yo tolayera a nakadingngag so annundura e nangurug sike Jesus. Mallimarifu a lallakiyera a nangurug.5 Kadaddaramatanna, nammu-ammung ino afu-afuwera na Hudyuwera, manannakam anneno mapoporay si katunungan so Jerusalem. 6 Bulunda i Anas, dati a katannangan a pari anni Caifas a maddaggun a katannangan a pari. Anna ana pay sinayeno adwa a dati a katannangan a pariyera a minganan si Juan anni Alejandro anneno korwan a lallakiyera a kawayyan na katannangan a pari. 7 Pinatallanggeno adwa a apostol sikwara e finuutdera, “Yanya yo nangadda sikwayu si pakapangwa onnu pakandama a mangwa sitawera?”
8 Megafu si pakapangweno Espiritu i Dios, netabbagnga i Pedro sikwara, “Gumattangngal na tolayera anna manannakam, 9 imbe-imbestigan dakami gumafu so mapiya a inangwami sitaw a tolay a pilay sinoy anna fuu-fuutan dakami nu kasannami a pinammapiya baggina. 10 Maningngag kayu, ikkayu amminan anna amminan a taga-Israel se itunduknga sikwayuweno gafuna. Iyaw a lalaki a pilay sinoy anna nakataddag so allangan diyaw e nammapiyen gumafu so pakapangwa i Jesu Kristo a taga-Nazaret a nepapatak diyaw so kurut udde pinantotolay i Dios baggina. 11 Antuweyaw yo neturak a sapit i Dios meafu sike Jesus,
‘Na batu a inammayan ino gumappataddag ira si balay,
antu yo nattabali si gakkurug a fundasyon na balay.’
12 I Jesus lamang yo makatabbut so tolayera se awan korwan a dinundun i Dios sito lubag a manabbut sikwatam so liwa-liwattam.”
13 Sin naiteno afu-afuwera na Hudyuwera ino matuyag a nonot da Pedro anni Juan a manabbag, nalaggat irengke metalwaring sin naammuwanda a ammera nakakalakammu anna bulun ira i Jesus. 14 Sin naitareno lalaki a nammapiyen a nakataddag so karebingga, awan a masapitda.
15 Antu netunda sike Pedro anni Juan a mallawan abbu so affuyug e nattaretabbag ira. 16 Kunneno tata sikwara, “Nenay akwantam sitaw a tolayera? Ammu amminan ino tolayera so Jerusalem anna naitareno kakkapallat a inangwara. Ammetam masapit a ammena nedemmu. 17 Tunduwantam a mimemmak ira a massapit meafu si ngan i Jesus takesi ammenana mewarak si kaodduwan.” 18 Akkabalinda a nattaretabbag, inayanda i Pedro anni Juan. Tinunandera a ammera massapit onnu manunturu imman meafu sike Jesus.
19 Udde tinabbaggera da Pedro anni Juan, “Nenay a fustu a manonot diyaw si aggita i Dios? Makimoray kami kad sikwayu onnu sike Dios? 20 Udde sikwami, ammemi mimemmak a itundu so tolayera ino naitami anna nadingngagmi.”
21 Akkabalinda imman a tantalawan i Pedro anni Juan, nelubbakdera sin awan a gafura a makastiguwera gumafu se yo tolayera e daya-dayawanda i Dios so naitara a nedemmu. 22 Na lalaki a napammapiya e maturuk si appat a fulu rawun.
Na Dasal na Minangikkurug Ira
23 Kapiyera nallawan da Pedro anni Juan, inang ira so kolakdera e nepakaammura amminan a netunduweno afu-afu a pariyera sikwara anneno manannakam na Hudyuwera.
24 Sin nadingngag ino minangikkurug ira yo netundu i Pedro, naggagarindan ira amminan a naddasal sike Dios e kunda, “Afu Dios a namaratu si langit anna lubag, si bebay anna si amminan a ana sinay. 25 Ikkeno nassapit megafu sike David a aggidiyafuwammi a gumasserbim a giniyeno Espiritum sin kunna,
‘Saay se makaallang ingkeno bakkan a Hudyuwera,
anneno Israelitera e mangwa-angwera si awan serbina?
26 Na patul ira sitaw a lubag e napparan a makigiyera,
anneno gumattangngal ira e nammu-ammung,
metulyat sike Dios anna sike Mesiyana.’a
27 Afu Dios, si kagakkuruwanna naparulot ino sinapit i David gumafu se sito Jerusalem, nammu-ammung da Herodes anni Poncio Pilato bulundeno korwan a Israelitera anneno bakkan a Hudyuwera anna naddesisyon ira a ipapatay i Jesus a makurug anna makimoray a gumasserbi a pinilim. 28 Megafu sitaw a tolayera nedemmuweno planum siin nabayagin ingke a tiyempu. Naangwa iyaw gumafu so pakapangwam anna urem. 29 E sitoye Afu, itannu, tantalawan dakami. Duffunan dakami a gumasserbim ira a manunturu si sapitnuwera a awan talaw. 30 Iyaddam sikwamiyeno pakapangwam a makapammapiya so matakit ira anna makaangwa si kallalaggat a milagruwera megafu so pakandama na makurug anna makimoray a gumasserbim a i Jesus.”
31 Sin nabalin a naddasal ino minangikkurug ira, nayuyyuk ino balay a nagyananda. Megafu si pakapangweno Espiritu i Dios, nattuyag ino nakamda a massapit si sapit i Dios.
Na Annuffun na Minangikkurug ira so Bafulundera
32 Na interu a minangikkurug ira i Jesus e nassittata si nakamda anna si nenay a panggammanda. Awan sikwara a nakkun a babaggindeno amminan a pakkukwarera udde iballera amminan a ana sikwara. 33 Megafu si pakapangwa i Dios, nebali-balin a nepakaammuweno apostol ira a i Jesus e nantotolay. E nangwa i Dios si mapiya sikwara amminan. 34 Awan sikwara a nakkurang si maski sanna se yo ana lubagga anna balera e nelakura anneno nallakuwanda 35 e neyaddara so apostol ira antu sittata sikwara e naindan nu nenay yo maawagga.