Pinammapiya i Pedro ino Pilay a Gumallimut
3
Sin tata aw, inang da Pedro anni Juan so lawan na Templu. Alas tres si fuwab antu yo orat para so Hudyuwera a maddasal. 2 Ana lalaki a neyanak a pilay a neyang sinay. Kada aw, pattutturan ino tolayera baggina so pattallungan na Templu a maayan si Makasta a Pattallungan takesi makilelimut so tolayera a tumallung sinay. 3 Sin naitana da Pedro anni Juan a paumang so lagwerta na Templu, nakilelimut baggina sikwara. 4 Pakatulangngan da Pedro anni Juan ino pilay e kunna i Pedro, “Itan dakami.” 5 Antu pakatulangngannera si mapiya se arignga maindanda baggina si pirak. 6 Udde kunna i Pedro, “Awan a pirakku, udde yo ana sikwak e iyaddak sikwam. Gumafu so pakapangwa i Jesu Kristo a taga-Nazaret, gumumbwatka e mallakadka.” 7 Iniggammanna i Pedro ino diwanan a kamat na pilay e dinuffunanna a nattaddag. Antu siddarat a nattuyag ino takkinera anna tumangngera. 8 Nattaddag baggina a nallattu e mallakarin. Tinumallung baggina so lawan na Templu a bulunnera a mallaka-lakad anna mallattu-lattu a maddaya-dayaw sike Dios. 9 Amminan a tolayera a ana sinay e naitareno tolay a mallaka-lakad anna maddaya-dayaw sike Dios. 10 E naimunuwanda baggina a aggatuttud so Makasta a Pattallungan so lawan na Templu a makileli-lelimut, anna nalaggat ira amminan so nedemmu sikwana. 11 Dengke a ginumafut baggina sike Pedro anni Juan, nalaggat amminan ino tolayera e nakkarantut ira sikwara paumang so lugar a maayan si Porticoa i Solomon.
Nakaabidna i Pedro ino Tolayera so Templu
12 Sin naitana i Pedro ino tolayera, kunna, “Wawwayik a taga-Israel, ammeyu nad a malaggat so nedemmu sitaw a tolay anna ammeyu kami a itan si kunna sitan. Kun diyaw nakuy a ikkamiyeno nakapammapiya sitaw a lalaki megafu si pakapangwami anna matolay kami meantu so uray i Dios. 13 Bakkang kamiyeno nakapammapiya sikwana udde i Dios a dinayaweno aggidiyafuwantam ira a da Abraham, Isaac anni Jacob. Pinadayawannengkeno gumasserbina a i Jesus a inakusan diyaw anna inammayan so allangan i Pilato maski naddesisyonin a palawananna i Jesus. 14 Awan liwatna anna matunung i Jesus udde inammayan diyaw baggina. Inarang diyaw sike Pilato a palawananneno tata gumappatay. 15 Pinateyuweno paggabwatan na angat, udde pinantotolay i Dios baggina e ikkamiyeno manestigu sitaw. 16 Nammapiya iyaw a tolay gumafu sike Jesus. Na pakapangwa i Jesus antu yo nappatuyag sikwana. Damayu a maita iyaw a tolay e ammuyu baggina. Nammapiyengke baggina gumafu so angngurugnga sike Jesus. Naitayu amminan iyaw a nedemmu!
17 “Wawwayik, ammuk a ammeyu ammu yo inangwayu sike Jesus, kunnapay yo afu-afuyuwera. 18 Udde so inangwayu, naparulot i Dios ino sinapitna megafu so profetera a i Mesiya e massufrina. 19 Kunnantu, mabboboli kayu si liwa-liwat diyaw e muli kayu sike Dios takesi pakomannaneno liwa-liwat diyaw. 20 Se nu antu yo akwan diyawna, anana yo tiyempu a bannayang kayuna i Afu Dios e dundunannana imman ino Mesiya a i Jesus a dinutukanna a mattangngal sikwatam. 21 Udde migyan nad i Jesus si langit makiyad si dumatangngeno tiyempu a i Dios e pabawuwannana amminan a pinaratuna se antuweyan ino sinapit i Dios so profetera siin nabayagin a tiyempu. 22 Kunna i Moises, ‘Mangidundunna i Afu Dios sikwayu si tata profeta a kakunnak. Tatana baggina so gakatam ira. Makimoray kayu so amminan a sapitanna sikwayu. 23 Seanya yo ammena makimoray anna maningngag sitan a profeta e mekatwena sike Dios so tolenera amu-amu. 24 Amminan a profetera, mamefu sike Samuel anna amminan a netufad sikwana e nangipakaammu pay meafu si mededemmu sitoye. 25 Na netambera i Dios megafu so profetera e para sikwayu a gakarera, anna bulung kayu so anu-anuwan a inangwa i Dios anneno aggidiyafuwan diyawera sin sapitanna sike Abraham, ‘Pakkapiyangkuna amminan a tolayera sito lubag megafu so gakam ira.’ 26 Antu nabalin a pinantotolay i Dios ino gumasserbina, palungu a nedundun baggina sikwayu takesi pammapiyan nakayu megafu so padduffunna a matalekkuran diyaweno maral a aggangwayu.”