Na Paddatang na Espiritu i Dios
2
Sin dinumatang ino tiyempu na Fiyesta na Pentecostes, nammu-ammung ino minangikkurug ira i Jesus so tata balay so Jerusalem. 2 Antu lannat a ana uni a naggabwat si langit kakunna yo uni na matuyag a leled anna nadingngag so interu a balay. 3 Nakaitera si manilla gumallayaf a afuy a naddattu so kada tata sikwara. 4 Na pakapangweno Espiritu i Dios e ana sikwara anna makaabid ira si naddadaruma a sapit a bakkanda a sapit.5 Sinoy a tiyempu, oddu a Hudyuwera si Jerusalem a ana talona sike Dios. Naggabwat ira so kada talubbunan na talubaggan. 6 Sin nadingngaggeno matuyag a leled, nammu-ammung ira so lugar na minangikkurug ira. Nalaggat ira amminan se nadingngagga a mabi-abid ino minangikkurug ira si sapit na maningnga-ningngag ira. 7 Nalaggat irengke antu kunda, “Bakkang kad a taga-Galilea iyawera a mabi-abid? 8 Kasanna a makaabid iyawera a tolayera si sapittam? 9 Naggabwat etam so Parthia, Media anna Elam anneno korwan ira e nagyan so Mesopotamia, Judea anna Cappadocia, Pontus anna Asia. 10 Ana yo tolayera na Frigia, Pamfilia, Ehipto anneno korwan ira e naggabwat so lubbun na Libya a aranni so Cirene anneno naggabwat ira so Roma, yo Hudyuwera anna bakkan a Hudyuwera a nanuntul so angngurug na Hudyuwera. 11 Naggabwat pay yo korwan ira so Creta anna si Arabia. Udde kasanna a makaabid iyawera a tolayera si sapittam meafu so kakkapallat a taddera i Dios?” 12 Nalaggat amminan ino tolayera e kunda a siggatatan, “Nenay kanggamma sapitan iyaw?” 13 Udde ana yo korwan sikwara a nangayoyung so minangikkurug ira e kunda, “Nabuk iyawera a tolayera!”
Nassapit i Pedro meafu sike Espiritu i Dios
14 Udde nattaddag i Pedro bulunneno tafulu tata disipuluwera e nassapit si matuyag, “Maningngag kayu, wawwayik a Hudyuwera anna ikkayu amminan a ana sitaw Jerusalem! Ana itunduk sikwayu a maawag a maammuwan diyaw. 15 Arig diyaw a nabuk iyawera a tolayera udde ammera se alas nuwebe kepay lamang si daddaramat. 16 Udde yo naitayu a nedemmu sikwami e antu yo kaparulotan ino neturak i profeta Joel:
17 ‘Na si uddi na awera, kunna i Dios,
‘Pigyanangkuneno Espirituk si amminan a tolayera,
na kebalinanna, ipakaammuneno anak diyawera a lallakiyera anna bafabbayereno tunturuk ira
anna itanneno sulteruyuwera na kanggammangku a maitara.
anna tenappanneno manannakam a lallakiyera a ipatenapkuna sikwara.
18 Se maski yo imbutkuwera a lallakiyera anna bafabbayera,
pigyanangkuneno Espirituk sikwara takesi itundura si korwan ira nu nenay yo nepakaammuk sikwara.
19 Anana yo kakkapallat a ipaitak so kalawatan
anna milagruwera pay sito lubag a mangipaitana si pakapangwak a pakegafuwan na oddu dā a matturut,
afuy anna makannag a atuk.
20 Mallammukngeno sinag
e mallibaganeno dakkag kakunna dā
liyeno kakkapallat anna kaawan a aw sin i Afu e umangnga a mannunut si amminan.a
21 Tabbutannana i Afu amminan a nangurug sikwak so akkastigu na liwa-liwatda.’ ”
22 Nebalinna i Pedro a nassapit, “Wawwayik a Israelitera, dingngaggan diyaweno sapitangku patamu sike Jesus a taga-Nazaret. Tinaddan i Dios a dinundunna i Jesus gumafu so oddu a kallalaggat a milagruwera a inangwana. Ammuyu a iyaw e gakkurug. 23 Nedawawa i Jesus sikwayu meantu so planu anna uray i Dios siin nabayagin a tiyempu. Nepapatak diyaw baggina so kurut anna nepapateyu so tolayera a ammera makimoray si katunungan i Dios. 24 Udde pinantotolay i Dios baggina se awan damana yo akkapatay a makapangwa sikwana.
25 Nelabbun i David siin nabayagin a tiyempu meafu sike Jesus a kunna,
‘Maumid a maitak i Afu Dios so allangangku,
se ana baggina so diwanangku a mimud sikwak takesi ammeknga mapalowan na kapakwak ira.
26 Kunnantu, mangga-anggammak
e mammalamuwangaknga a maddayaw sikwam.
Kunnapay, matolayaknga a ana inanama.
27 Se ammemma purayan a sigigyan ino karalwak so Hades a lugar na natayera.
Ammemma ipabulun a mabbayandag ino baggik, se makurugak anna maumid a makimoray a gumasserbi.
28 Nepakaammum sikwak nu kasanna a matolay,
mammalamuwangaknengke anna gumafu se bulun taka.’b”
29 Antu nebalinna i Pedro a nakkun, “Wawwayik a Israelitera, siguraduwak nu itunduk a i David a aggidiyafuwantam e natay anna netanam. Makiyad sitoye ana kepay sitaw yo nattanammanna. 30 Se i David e profeta i Dios, ammuna a netamba i Dios sikwana a tata so gakanera e mattabalina si patul. 31 Ammunan sinoy kepay nu nenay yo akwan i Dios meafu so panantotolay i Mesiya antu kunna,
‘Na karalwana e ammena nepabulun a sigigyan so Hades a lugar na natayera
anna ammena nabbayandag ino baggina.’
32 I Jesus e pinantotolay i Dios anna testigu kami amminan sinay a nedemmu. 33 Anna gumafu se dinayawengke i Dios i Jesus a pakegafuwan a mattangngal baggina so karebbingnga si langit anna gumafu se naarasawna i Jesus ino Espiritu i Dios a naggabwat sike Amana a netamba, nepigyanna pay i Jesus ino Espirituna i Dios sikwatam antu yo naitayu anna nadingngag diyaw. 34 Se ammena tinumullu i David si langit udde kunna meafu so Mesiya,
‘Kunna i Afu Dios sike Afuk,
“Mattuttudka sito diwanangku,
35 maaffutkuweno kapakwam ira anna iyekwak ira so pattangngalannu.” ’ ”
36 Antu kunna i Pedro, “Antu maawag a maammuwan amminan a taga-Israel a i Jesus a nepapatak diyaw so kurut e baggineno pinattabali i Dios a Afu anna Mesiya.”
37 Sin nadingngag ino tolayera ino sinapit i Pedro, naburungan irengke e finuutda sike Pedro anneno korwan a apostol ira a nakkun, “Wawwayik ira si angngurug, nenay a akwammi tapenu pakoman nakami i Dios?”
38 Kunna i Pedro, “Sittata sikwayu e mabboboli nad so liwa-liwat diyaw anna mabawtismuwan si ngan i Jesu Kristo takesi mapakomanneno liwa-liwat diyaw. Anna iyaddana i Dios sikwayuweno Espirituna. 39 Netamba i Afu Dios a iyaddaneno Espirituna so amminan a pinilina a mattabali a tolenera mesapat kayu anneno anak diyawera anna oddu a tolayera a naggabwat si aroyu a lubbu-lubbun.”
40 Oddu kepay yo sinapit i Pedro a gakkurug ingkeno sinapitna, anna tinabarangannera a nakkun, “Arangngan diyaw sike Dios a tabbutan nakayu si akkastigu a medemmuna so maral a tolayera.” 41 Oddu a nangurug so sinapit i Pedro e nabawtismuwan ira. Sinoy a aw, mattallurifu a tolayera a nedagga so minangikkurug ira i Jesus. 42 Antu nebalinda a maningngag anna makimoray so tunturuwera na apostol ira anna maumid ira a nammu-ammung a mangngan si tinapay a panandamman sike Jesus anna nattatera a naddasal.
Na Akkatolay na Minangikkurug Ira
43 Oddu a milagruwera anna kakkapallat a naangweno apostol ira gumafu si pakapangwa i Dios antu dokal ingke a pangilaweno amminan sike Dios. 44 Amminan a mangurug sike Jesus e maumid a mammu-ammung anna nu nenay yo ana sikwara e nabbaballayanda. 45 Nelakureno pakkukwara anneno nallakuwanda e neballera si kada tata meantu so maawagnga. 46 Kada aw, nammu-ammung ira so Templu. E kinaawera pay a mammalamuwang a mattata mangngan so balera dengke a panandamman sike Jesus. E inangwara iyaw a mangga-anggam a pabbaballayandeno akkananda so sittata sikwara. 47 Dengkera a inangwa iyaw, dinaya-dayora i Dios anna ira e nelawa na tolayera. Kada aw idaggana i Afu sikwareno tinabbutnera.