Na Turak i Pablo so
Taga-Galacia
Meafu Sitaw a Libru
Nebalaggaw i Pablo ino mapiya a baga a yo tolay e nebilang i Dios a awan liwatna megafu lamang si angngurugnga sike Jesu Kristo. Sin nebalaggaw i Pablo ino Mapiya a Baga meafu sike Jesu Kristo so luga-lugar na bakkan a Hudyuwera so Galacia a talubbunan so Asia Minor, nanggam ira a nangarasaw sikwana a tata bisita so lugarda anna oddu yo nangurug. Udde sitan a tiyempu, ana grupu na Hudyuwera a nangurug sike Kristo, udde yo netunturura e ammena fustu patamu so bakkan a Hudyuwera nu kasanna a nebilangngera i Dios a matunung si aggitana. Ammena nabbayag, sin nanaw i Pablo so Galacia, ana korwan a Hudyuwera a minangikkurug a inang so Galacia a nattulyat so tunturuwera i Pablo. Kunda a bakkan a gakkurug a apostol baggina gumafu se bakkan baggina a tata so tafulu tata a apostol ira a nebumbulun sike Afu Jesus sin ana kepay baggina sito talubaggan. Kunda pay a bakkan a gakkurug a yo tata a tolay e nebilang i Dios a matunung si aggitana megafu si angngurug lamang udde maawag pay baggina a mabanggit anna makimoray si korwan a katunungan ira i Moises. Kunda pay a yo netunturuna i Pablo so mangurug ira sike Kristo e maral patamu si akkelibrera si pakimoray si katunungan gumafu se kunda a nu kunna sinay, annanot a malliwat irana. Iyawera yo netunturuweno Hudyuwera so minangikkurug ira so Galacia a nammu-ammung gumafu sike Dios.
Sin nadingngag i Pablo a oddu so minangikkurug ira a nailloku megafu sitawera a tunturu a ammena fustu, neturaknga iyaw a turak takesi pantotolinnanera so gakkurug a angngurugga sike Kristo.
So palungu a adwa kapitulu, dinefensanneno akka-apostolna. Netunduneno pappili i Dios sikwana a metunturuweno mapiya a baga so bakkan a Hudyuwera anna nimannutunnera pay a maski yo apostol ira so Jerusalem e nelawareno akka-apostolna.
So meka-tallu anna meka-appat a kapituluwera, nebarifitna a ibilangnga i Dios ino tolay a matunung si aggitana anna bakkan a megafu si pakimoray si katunungan udde megafu si angngurug lamang sike Kristo.
So mauddi a adwa kapituluwera, tinabbagngeno nassapit a maral para si tata tolay a malibre si pakandama na katunungan. Tinabarangngannera pay a matangngalan si Espiritu i Dios takesi yo akkatolera e mapiyana anna ammerana dandanan ino maral a panggamman na nonotdera.