Panangumustera
16
Ipaammuknga sikwayu a talakkan diyaw i Febe a wayitam si angngurug a manuffu-nuffun so afu-afuwereno grupu na minangikkurug ira so Cencrea. 2 Arangngangku sikwayu a arasawan diyaw baggina se nangurug pay sike Afu Jesus, e antu yo meantu a akwan ino tolayera i Dios. Nu wara maawagnga, duffunan diyaw baggina se oddu yo naduffunanna maski ikkanak pay.3 Ikumustarak sikwara Priscila anni Akila a bulungkuwera a masserbi sike Kristo Jesus, 4 anna kinanggammanda keppay a matay tapenu mesalak yo angatku. Bakkanak lamang yo nappabalat sikwara udde kunnapayeno grupu na bakkan a minangikkurug a Hudyuwera. 5 Ikumustarak pay so grupu na minangikkurug ira a nammu-ammung so balera.
Kunnapay sike Epeneto a iddu-iddukangku a kolakku a antu yo palungu a nangurug sike Kristo so Asia. 6 Ikumustarak sike Maria a mapasensiyengke a masserbi sikwayu. 7 Ikumustarak sikwara Andronico anni Junia a ka-Hudyuwangkuwera anna nakabulunangku so paffukukan. Melawerengke so apostol ira anna palunguwera a nangurug sike Kristo ammat sikwak. 8 Ikumustarak sike Ampliato a antu yo iddu-iddukangku a kolak sike Kristo, 9 kunna pay i Urbano a buluntam a masserbi sike Kristo anni Estakis a iddu-iddukangku a kolak. 10 Ikumustarak pay sike Apeles a nataddan a gakkurug si angngurugnga sike Kristo. Kakunna pay so familya i Aristobulo. 11 Ikumustarak sike Herodion a ka-Hudyuwangku anna inoyera a mangurug sike Afu Jesus a meyannung so familya i Narciso. 12 Kunnapay sikwara Trifena anni Trifosa a gumasserbiyera i Afu Jesus, maski i Persida a iddu-iddukangku a nadidiyat a nasserbi sike Afu Jesus. 13 Ikumustarak pay sike Rufo a napili i Afu Jesus anna sike inana a nebilangku pay a inak. 14 Ikumustarak sikwara Asincrito, Flegonte, Hermes, Patrobas, Hermas anna so kaminangikkurug ira a bulunda. 15 Kunnapay sikwara Filologo anni Julia, i Nereo anni wayina a bafay, i Olimpas anna amminan a tolayera i Dios a bulunda. 16 Makkukumusta kayu a mangipaita a mawwawayi kayu amminan sike Kristo. Kumustan dakayu sitaweno amminan a grupu na minangikkurug ira i Kristo.
Na Panguddi a Pannunturuwera i Pablo so Turaknga
17 Wawwayik ira si angngurug, makilelawitak sikwayu a mimud kayu so tolayera a mappakaratway anna inoyera a mappaliwat sikwayu a metulyat so tunturuwera a nakalakammuyu. Aroyuwan diyawera. 18 Na tolayera a kunna sitan e ammera masserbi sike Afutam a Kristo. Na gakkadda e para si baggira lamang. Na sapitanda e mapiya a dingngaggan anna makilalammuwera tapenu maillokureno inosente a tolayera. 19 Na pakimoreyu si angngurug diyaw sike Kristo e naammuwan ino amminan a tolayera. Nabu, maanggammak ingke sikwayu udde kanggammangku a mangngammu kayu takesi ammuyuna a mangwa si mapiya anna awan a agginakamman diyaw a mangwa si maral. 20 I Dios a yo paggabwatan na piya e aranniyen a affutannana i Satanas megafu sikwayu. Idasalku sike Afu Jesu Kristo a ipaitananeno simpatna sikwayu amminan.
21 I Timoteo a bulungku a masserbi sike Kristo e kumustan nakayu anna kunnapay da Lucio, Jason, anni Sosipatro a ka-Hudyuwangkuwera.
22 Ikkanak iyaw, i Tercio a mattura-turak sitaw a turak i Pablo e kumustan takayu pay a mangurug sike Afu Jesus.
23 Ikkanak iyaw, i Pablo, migigyan so balay i Gayo anna nammungan ino grupu na minangikkurug ira. Kumustan dakayu pay i Gayo. I Erasto a gumàimfun si pirak sitaw a lubbun anni Cuarto a wayitam e kumustan dakayu pay.
24 [Idasalku a ipaitanana i Afu Jesu Kristo yo simpatna sikwayu amminan. Amen.]
Na Panguddi a Paddayaw sike Dios
25 Dayawantam i Dios! Baggineno makapatuyag si angngurug diyaw megafu so Mapiya a Baga meafu sike Jesu Kristo a nebalaggok. Iyaw a Mapiya a Baga e amme nepakaammu i Dios so tolayera si nabayag a tiyempu. 26 Udde sitoye, nepakaammu iyaw a Mapiya a Baga anna megafu so neturak ino profetanera siin nabayagin a tiyempu e nepakaammu iyaw so amminan a bakkan a Hudyuwera. I Dios a awan pakiyaranna e nedundunna iyaw sikwara takesi mangurug anna makimorayerana
27 si mittata a mangngammu a Dios. Dayawantam nad baggina amu-amu megafu sike Jesu Kristo. Amen.