Manolay para si Pammakapiyan na Korwan ira
15
Ikkanetam a matuyag yo angngurugnga, attammantam nad ino pakkurangan na wawwayitam si angngurug a makafuy yo angngurugga. Ammetam nad lamang nonotan ino makapaanggam sikwatam. 2 Akwantam nad amminan a makapaanggam so wawwayitam si angngurug tapenu mapatuyag ino angngurugga. 3 Se maski i Kristo e ammena ninonot ino makapaanggam sikwana maski sin nainsultu baggina. Se kunna so neturak a sapit i Dios, “Na tolayera a nanginsultu sikwam, Dios, ikkanak pay yo ininsultura.”a 4 Amminan a sapit i Dios a neturak siin e neturak tapenu matunturuwan etam, takesi megafu si pàattam anna pappatuyag si nakam a naggabwat si katurakkan e maindan etam si inanama. 5 Idasalku sike Dios a antu yo paggabwatan na pàattam anna tuyag na nakam a manolay kayu a ana pattatarata kakunna yo inangwa i Kristo Jesus, 6 takesi siggatatang kayuna a maddayaw sike Dios a antu yo Ama i Afutam a Jesu Kristo.Na Mapiya a Baga e Meyannung Pay so Bakkan a Hudyuwera
7 Kunnantu, arasawan diyaw nad ino korwan ira kakunna yo panangarasawna i Kristo sikwayu para si kadayawan i Dios. 8 Se itunduk sikwayu a i Kristo e nattabali a gumasserbi na Hudyuwera takesi ipaitana a i Dios e gakkurug a maparulot ino tambanera so aggidiyafuwandera. 9 Anna tapenu yo bakkan a Hudyuwera e maddayawna sike Dios gumafu si allaknga sikwara. Se kunna so neturak a sapit i Dios,
“Kunnantu, dayawan takana nu anaak so bakkan a Hudyuwera anna makkantaaknga si pammadayaw sikwam.”b
10 E kunna pay i David so neturak a sapit i Dios,
“Ikkayu a bakkan a Hudyuwera, mammalamuwang kayu a bulun ino tolayera i Dios.”c
11 E kunna pay i Moises so neturak a sapit i Dios,
“Ikkayu a bakkan a Hudyuwera, dayawan diyaw amminan i Afutam a Dios,
anna amminan a tolayera e maddayaw nad sikwana.”d
12 E kunna pay i Isaias so neturak so sapit i Dios,
“Ananeno gaka i Jesse,
a manangngalna so bakkan a Hudyuwera,
bagginaneno inanamara.”e
13 Idasalku sike Dios a antu yo paggabwatan na inanama a mangaddana sikwayu si napelalot a anggam anna ana piya si nakam diyaw sikwayu a mangurug sikwana takesi yo inanamayu e mallifina megafu si pakapangweno Espiritu i Dios.
Na Aggangwera a Netalak i Dios sike Pablo
14 Wawwayik ira si angngurug, mangurugak ingke a yo akakwan diyawera e gakkurug a mapiya, odduwen yo ammuyu meafu si angngurugtam anna matunturuwan diyawin yo siggatatan. 15 Udde maski kunna sinay, ana tuyag na nakamku a imannutunan takayu meafu si korwan a kiya-kiyan. Akwangku iyaw gumafu si damaramak a tata a apostol a neyaddana i Dios sikwak 16 takesi masserbiyaknga sike Kristo Jesus so bakkan a Hudyuwera kakunna yo tata pari sikwak a mangibalaggaw si Mapiya a Baga a naggabwat sike Dios takesi yo bakkan a Hudyuwera a mangurug mekunnerana si sakrifisyu a mewalli a kaangga-anggam sike Dios, sikwara a mesina si liwat megafu sike Espiritu i Dios takesi serbiyandana baggina. 17 Kunnantu, gumafu so pakisittatak sike Kristo Jesus, maipannokalkuweno inangwak para sike Dios. 18 Udde awan a korwan si sapitangku nu bakkan pelamang ino inangwa i Kristo Jesus megafu sikwak a maggiya so bakkan a Hudyuwera takesi makimorayera sike Dios, megafu si sapitkuwera anna taddak ira. 19 Anna nakimorayera sikwana gumafu si pakapangweno pemunuwan anna kallalaggat a milagruwera a nedemmu—amminan e gumafu si pakapangweno Espiritu i Dios. Nabu, sikwak a maddoyu-doyug, mamefu so Jerusalem makiyad so Ilirico, nepakaammuk si mapiyeno Mapiya a Baga meafu sike Kristo. 20 Kunnantu, kanggamku a ibalaggaw iyaw a Mapiya a Baga so lubbu-lubbun a awan kepay makaammu meafu sike Kristo takesi ammeknga ibali-balin ino tarabafu a napefuwanin ino korwan ira. 21 Se yo neturak a sapit i Dios e makkun,
“Inoyera a amme kepay nakaammu sikwana e maimunuwandana baggina,
anna inoyera a amme kepay nakadingngag meafu sikwana e maintindiyandana.”f
Na Gakkad i Pablo a Umang so Roma
(1 Corinto 16:1-7; 2 Corinto 8:16—9:5)
22 Gumafu so pangibalaggok si Mapiya a Baga so lubbu-lubbun, namimpigyaak a nafuwaddan a umang sikwayu. 23 Udde sitoye, awanin a luga-lugar para sikwak a umang sitawera a lubbu-lubbun anna oddu a rawunin a anappangku a umang sikwayu. 24 Gannonan takayuna nanu umangak so Espanya. Innanamangku a makkakainnita etamma so paddoyugku paumang sitan anna innanamangku pay a maduffunandak a makadutung sinay so Espanya akkabalintam a mabbafurulun si malan a tiyempu. 25 Udde sitoye, paumangak so Jerusalem a mangadda si pirak a duffun so tolayera i Dios sinay. 26 Se yo minangikkurug ira so Macedonia anna Acaya e naanggamman ira a mangadda si pirak a duffun so madidiyat a tolayera i Dios so Jerusalem. 27 Naanggamman ira a manuffun, udde yo kagakkuruwanna e maawag a akwanda iyaw sikwara. Gumafu se yo bakkan a Hudyuwera e naarasora yo mapiya a baga na pannabbut a naggabwat si Hudyuwera, maawag pay a masserbiyera sikwara megafu si pangiyadda si pirak. 28 Nabu, kapiyek a iyadda sikwara amminan yo nakampat a pirak so Hudyuwera so Jerusalem, massippalaknga sikwayu liyek a umang so Espanya. 29 Se ammuk a nanu umangak sikwayu, maanggam etamma ingke gumafu se indanna etamma i Kristo si oddu a mapiya a kiya-kiyan sikwatam a mammung.
30 Wawwayik, iyapilak sikwayu a idasallandak sike Dios se neyannung etam sike Afutam a Jesu Kristo anneno Espiritu i Dios e inindanna etam si idduk. 31 Idasal diyaw a imurannaknga i Dios so bakkan a minangikkurug ira a taga-Judea a mappalow sikwak anna payeno tolayera i Dios so Jerusalem e arasawandaneno duffun a iyangkuna sinay. 32 Si kunna sitan, nu antu yo uray i Dios, maanggammannak a umang sitan anna makipamemmang sikwayu. 33 Idasalku a i Dios a paggabwatan na piya e mamulun sikwayu amminan. Amen.