Maddidinnuffun Etam a Minangikkurug ira
6
Wawwayik ira si angngurug, nu wara bulun diyaw a nakaliwat, ikkayu a nakaarasaw si Espiritu i Dios e ikkayu nad yo mappauli sikwana si kinamatunung. Akwan diyaw inay si masinak anna mimud kayu a amme kayuna makakkap a malliwat. 2 Maddidinnuffun kayu si pakaburungan diyawera anna sikwayu a akwan iyaw, maparulot diyaweno katunungan i Kristo. 3 Nu ammeyu akwan iyaw gumafu se nonotan diyaw a kaawang kayuwengke udde si kagakkuruwanna bakkan kena, antu illo-illokun diyaw lamang yo baggiyu ingkepay. 4 Kada tata e itanna nad si mapiya nu yo akakwanna e fustu. Nu yo akakwanna e mapiya, maanggam nad baggina, anna ammena nad a iyarig so taddera na korwan ira. 5 Se amminan etam e makammu si aggangwatam ingkepay.6 Inoyera a natunturuwan si sapit i Dios e maawag a iballena amminan ino mapiya a kiya-kiyan so nanunturu sikwana.
7 Ammeyu ariggan a maillokuyu i Dios, illo-illokun diyaw lamang ino baggim. Nu yanyeno nemula na tata tolay antu pay yo ganinna. 8 Nu manolay kayu si maral a panggamman ino baggiyu, yo kebalinanna e patay amu-amu. Udde nu manolay kayu si urayeno Espiritu i Dios, maindan kayuna si angat a bulun i Dios amu-amu a maggabwat si Espirituna. 9 Ammetam nad antu mapakel a mangwa si mapiya se makaarasaw etamma si pammakapiyan nanu dumatang ino fustu a tiyempu nu ammetam mimemmak a mangwa si mapiya. 10 Kunnantu, nu wara makasta a tiyemputam, maawag a mangwa etam si mapiya si amminan a tolayera metalwaring si wawwayitam si angngurug.
Na Panguddi a Tunturu
11 Maitayu a dorokkal yo letrana iyaw a turak. Ikkanakun yo natturak sitaw!
12 Na korwan a minangikkurug a Hudyuwera e kumananda a mamuwersa sikwayu a mappabanggit anna akakwanda lamang iyaw takesi atannang yo aggiteno korwan a Hudyuwera sikwara. Mattalawera a melupet nu ibalaggora a tabbutanna etamma i Dios gumafu si pattalaktam so nabalin i Kristo sin natay baggina so kurut. 13 Nabanggit ira udde ammera lud pakimorayan amminan ino katunungan ira udde kanggamda a mappabanggit kayu takesi mepannokaldana yo pakimoreyu si tuntururera meafu si pabbanggit. 14 Ammena nad medemmu sikwak ino kunna sinay. Na ipannokalku e yo akkapatay i Afutam a Jesu Kristo so kurut. Gumafu sitaw, ammekun interesadu nu nenay a kaawan si tolayera a amme mangurug sike Dios anna ammekun pay interesadu si tolayera sito talubaggan. 15 Ammena kaawan nu nabanggit onnu ammena yo tata tolay. Na kaawan e inangkakwana i Dios baggina a bawu a tolay. 16 Idasalku sike Dios a mangaddana baggina si piya na nakam anna allakkanna amminan a manolay meantu sito bawu a kinatolay se baggireno gakkurug a tolayera i Dios.
17 Mamefu sitoye, awan nad a mangadda sikwak si pakaburungan. Se yo biyad ira sito baggik e mepaita a meyannungak sike Jesus.
18 Wawwayik ira si angngurug, Idasalku sike Afu Jesu Kristo a masimpatna baggina sikwayu amminan. Amen.