Na Turak i Pablo so
Taga-Efeso
Meafu Sitaw a Libru
Dengke sitaw a turak i Pablo, neturaknga iyaw so minangikkurug ira na Efeso. Sin neturaknga iyaw, nakafukuk baggina so Roma gumafu si pangipakaammuna si mapiya a baga meafu sike Afu Jesu Kristo.
Iyaw a turaknga e meafu si planu i Dios a mapattaratanana amminan a pinaratuna, amminan a ana si langit anna sito lubag takesi i Kristo lamang ino Afura (1:10). Netunduna pay i Pablo so minangikkurug ira a mattatera gumafu se nattatera amminan sike Kristo takesi yo akkatolera e meantu si planu i Dios.
Dengke so nebarifit i Pablo sikwara patamu so pattarateno minangikkurug ira, antuweyaw yo nepangarignga. Kunna a amminan ino minangikkurug ira e neyarig si tata a baggi anna i Jesu Kristo ino ulu na iyan a baggi. Kunnapay a yo minangikkurug ira e mekunna si tata a balay, anna i Kristo e baggineno fundasyon na balay. Neyarignga payeno minangikkurug ira a neyatawa sike Kristo.
Netunturu pay i Pablo ino fustu a akwan para si matawa, gagginafan anneno anakdera anna imbut ira anna inoyera a ana imbutdera.
Na kauddiyanna iyaw a turak, natturak i Pablo patamu so neyaddana i Dios so minangikkurug ira takesi mapakwara i Satanas.